«Ամանորը Առաջինում». ընտանեկան, ջերմ, հետաքրքիր

Blognews.am-ը գրում է.

Դեկտեմբերի 31-ին եւ նախորդող օրերին ամբողջությամբ կվերափոխվի Հանրային հեռուստաընկերության եթերացանցը: Առաջին ալիքի բոլոր հաղորդումները եթեր կհեռարձակվեն տոնական ձեւաչափով, իսկ երեկոյան Առաջին ալիքի հեռուստադիտողների համար նոր եւ հետաքրքիր ծրագիր է նախատեսված: Տարեմուտի գիշերը՝ ժամը 24:00-ից սկսած, Հանրայինի եթերում կլինի «Ամանորը Առաջինում» խորագրով տոնական համերգային ծրագիրը, որը հեռուստադիտողներին կփոխանցի ամենաընտանեկան եւ ուրախ տոնի ամենաջերմ զգացողությունները, ինչպես նաեւ ուրախ, աշխույժ եւ հետաքրքիր ժամանց կապահովի: Տոնական համերգային ծրագրի ընթացքում ելույթ կունենան հայ երգիչ-երգչուհիները, ովքեր կներկայանան արդեն սիրված ուրախ կատարումներով, որոշ դեպքերում նոր երգերի հեռուստատեսային պրեմիերաներով: Առաջին ալիքի հեռուստադիտողը Հանրայինի տոնական եթերում կտեսնի «Եվրատեսիլ-2016»-ի հայաստանյան ներկայացուցիչ Իվետա Մուկուչյանին, Արթուր Գրիգորյանին, Հայկոյին, Ռազմիկ Ամյանին, Ալլա Լեւոնյանին, Զարուհի Բաբայանին, Սոնա Շահգելդյանին, Լեյլա Սարիբեկյանին եւ այլոց: Պրեմիերաներով կներկայանան Էրիկը, Արամեն, Սիլվա Հակոբյանը, Արսեն Գրիգորյանը, Քրիստինե Պեպելյանը, Սոնան: Իսկ թե կոնկրետ ինչ կատարումներով են հանդես եկել սիրված արտիստները, հայտնի կդառնա տարեմուտի գիշերը: Դեկտեմբերի 31-ին Առաջին ալիքի բոլոր հաղորդումները կունենան տոնական ուղղվածություն: Սկսելով օրը «Առավոտ լուսո»-ի հետ՝ մեր հեռուստադիտողները կունենան դրական եւ ուրախ տրամադրվածության մեծ չափաբաժին, ականատես կլինեն տոնական անցուդարձին, որը կշարունակվի պահպանվել նաեւ ողջ օրվա ընթացքում առաջարկվող հաղորդումներում:

Այ օրինակ «Համի որակ» հաղորդաշարի տոնական թողարկման շրջանակում, պահպանելով հաղորդման ձեւաչափային եւ թեմատիկ առանձնահատկությունները, փորձագետ Կարեն Գիլոյանը, առանց նախապես իմանալու, թե ով է խոհարարը, կգնահատի հայտնի ու սիրված տանտիկինների կողմից պատրաստված բլինչիկների համն ու որակը: Տոնական ու հոբելյանական կլինի նաեւ «Հենց այսպես էլ ապրում ենք» հաղորդումը, որի ամանորի թողարկումը կլինի նաեւ «Մեր բակ»-ը ֆիլմի հոբելյանական միջոցառումների շրջանակում: Հրանտ Թոխատյանի հյուրերը կլինեն մարդիկ, ովքեր կանգնած էին ֆիլմի ստեղծման ակունքներում, ովքեր նորովի ճանաչվեցին եւ սիրվեցին ֆիլմում կերտած կերպարների շնորհիվ: Հատուկ հաղորդման նկարահանումներին մասնակցելու նպատակով Երեւան են ժամանել նաեւ ֆիլմի այն դերակատարները, ովքեր ապրում եմ դրսում, քիչ են երեւում եթերում: Նորովի մեկնաբանություններով կներկայացվեն նաեւ «Մեր բակ»-ի երաժշտական համարները:

Տոնական թեմատիկայով եթեր կհեռարձակվեն նաեւ «Երգ երգոց», «Գուշակիր մեղեդին», «Ամենակարող երգիչ» ծրագրերը, որոնց շրջանակում հնչող երաժշտությունը կլինի Նոր տարվան նվիրված եւ բարձր տրամադրություն կփոխանցի հեռուստադիտողներին: Տոնական օրերին Հանրայինի ողջ եթերացանցը հագեցած կլինի նաեւ հայկական եւ արտասահմանյան սիրված ֆիլմերով, մուլտֆիլմերով եւ համերգներով: Հանրայինի եթերում առաջին անգամ կներկայացվի «3 շաբաթ Հայաստանում» ֆիլմը: Բացառիկ իրավունքով եւ հայերեն կրկնօրինակմամբ կցուցադրվեն 20th century Fox, Disney, Warner Bros, Universal, Paramount եւ այլ հայտնի ընկերությունների՝ ամանորի թեմայով ֆիլմեր եւ մուլտֆիլմեր, որոնց շարքում են «Հարրի Փոթեր» ամենահայտնի ֆիլմի բոլոր 8 սերիաները, «Տանը մենակ», «Իմ ընկեր ձմեռ պապը», «Ձնագնդիկներով պատերազմ», «Հրեշների ընկերություն», «Ալիսան հրաշքների աշխարհում», «Դալմաթյան շներ», «Գեղեցկուհին եւ հրեշը», «Խիզախ արքայադուստրը» եւ այլն: Առաջինը նաեւ ավանդական անակնկալ ունի դասականի սիրահարների համար: Հունվարի 1-ին ուղիղ միացմամբ Հանրայինի եթերում կլինի Վիեննայի ֆիլհարմոնիկ նվագախմբի Ամանորին նվիրված տոնական համերգը: Առաջին ալիքը Ձեզ բարձր տրամադրություն եւ հաճելի դիտում է մաղթում:

Առաջին ալիք

Հասարակայնության հետ կապերի բաժին