Թաթուլ Բաղդասարյան. «Պատրաստ եմ 100 հազար դոլարը տալ մեր բանակին»

Այսօր «Հայացք» մամուլի ակումբի հյուր, գեներալ Հայկազ Բաղմանյանից տուժած գործարար, Մարտունի քաղա­քի «Պանրագործական ընկերություն» ԲԲԸ–ի տնօրեն Թաթուլ Բաղդասարյանը այս խոսքե­րով սկսեց մամուլի ասուլիսը՝ վստահեցնե­լով, որ այս տարիների ընթացքում իր կրած վնասների հատուցման դեպքում այդ գումա­րը կփոխանցի բանակին: Բաղդասարյանը դիմել էր քննչական կոմի­տե` Գեղարքունիքի մարզի կադաստրի աշ­խատակիցների կողմից կատարված կեղծի­քը բացահայտելու նպատակով:

Նրա խոս­քով՝ Գեղարքունիքի կադաստրի պետ Վրույր Վարդանյանը կեղծել է կադաստրում գտնվող իր ընկերության սեփականության վկայակա­նի օրինակը, սակայն մինչ օրս ո՛չ դատավո­ րը, ո՛չ դատախազը չեն կարողանում հայտ­նաբերել, թե ովքեր են կեղծարարները:

«Իմ ընկերությունը ունի 6 հա տարածք, 2005 թ. այն մասնավորեցվել է և կադաստրում կեղծ­վել է՝ հողամասի բաժնում նշելով ընդամենը 2,3 հա տարածք: Ես քանիցս ասել եմ, որ բե­րեք այս ձեռագրերի տեր մարդկանց, չեն բե­րում: Իսկ նա, ով լրացրել է վկայականը, հիմա աշխատում է Գեղարքունիքի կադաստ­րում՝ Ֆեդիա Գևորգյանի մասին է խոսքը: Առերեսում չեն կազմակերպում, կոծկում են գործը»,– նշում է նա:

8,5 ամիս տևած քննությունից հետո գործը կարճվել է և Բաղդասարյանը դիմել է Գեղար­քունիքի մարզի դատախազություն՝ քննիչի որոշումը վերացնելու համար: Դատախազը նույնպես կարճել է գործը: Այնուհետև նա դի­մել է Մարտունու Առաջին ատյանի դատա­րան, սակայն այստեղ էլ դատարանն իր բո­ղոքը մերժել է՝ անփոփոխ թողնելով քննիչնե­րի կայացրած որոշումը: Այժմ Թաթուլ Բաղ­դասարյանը դիմել է Վերաքննիչ դատարան:

Վերջինս ցանկություն ունի հանդիպել վար­չապետի և ԱԺ պատգամավորների հետ այս կեղծիքը բացահայտելու նպատակով: Ասում է, որ դիմել էր վարչապետի օգնական Նարեկ Ադոնցին՝ վարչապետի հետ հանդի­պում կազմակերպելու խնդրանքով, սակայն անարդյունք: Թաթուլ Բաղդասարյանը նշում է, որ Հայկազ Բաղմանյանը իր տա­րածքը վաճառել է այլ մարդկանց, ովքեր, ինչպես ինքն է իմացել, վարչապետի մերձա­վորներն են:

«Ինչ–ինչ հանգամանքներով էդ տարածքը գայթակղում է գեներալին և ներկայի սեփականատերերին: Բայց մինչ օրս գազալցակա­յանը շահագործվում է ապօրինի կարգով, որևէ թույլտվություն չունեն»,– հավելեց նա: