Թուրքիայի քրդամետ կուսակցությունը հետ է կանգնել խորհրդարանը լքելու որոշումից. Կարո Փայլանն ու իր թիմակիցները վերադառնում են Մեջլիս

Թուրքիայի քրդամետ Ժողովրդադեմոկրատական կուսակցության՝ Ստամբուլի գրասենյակի ղեկավար Դոան Էրբաշը հայտարարել է, որ կուսակցության պատգամավորները նորից կսկսեն մասնակցել խորհրդարանական նիստերին, որոնք բոյկոտել էին ավելի վաղ: Այս մասին գրում է թուրքական habervan.com կայքը:

Էրբաշը նշել է, որ ԺԴԿ-ի պատգամավորները որոշել են վերադառնալ Մեջլիս և ավելի ակտիվ ու ավելի արդյունավետ աշխատանք տանել երկրում առկա խնդիրների քննարկումների ժամանակ:

Հիշեցնենք, որ ավելի վաղ կուսակցության գլխավոր շտաբը պաշտոնական հայտարարություն էր տարածել Թուրքիայի խորհրդարանում կուսակցության խմբակցության աշխատանքի դադարեցման մասին:

ԺԴԿ անդամ է նաև հայազգի պատգամավոր Կարո Փայլանը:

Հիշեցնենք, որ նոյեմբերի 4-ին Դիարբեքիրում և Անկարայում ձերբակալվել է քրդամետ Ժողովրդադեմոկրատական կուսակցության 13 անդամ, այդ թվում` կուսակցության համանախագահներ Սելահաթթին Դեմիրթաշն ու Ֆիգեն Յուքսեքդաղը: 

Դեռևս մայիս ամսին Թուրքիայի խորհրդարանական սահմանադրական հանձնաժողովն ընդունել է Ժողովրդադեմոկրատական կուսակցության խմբակցության մի շարք պատգամավորների անձեռնմխելիությունից զրկելու մասին որոշում:

Այժմ մի շարք պատգամավորների անձեռնմխելիության մասին օրենքը, որն ամրագրված էր Սահմանադրության 83-րդ հոդվածով և արգելում էր պատգամավորներին «կալանավորել, հարցաքննել, դատապարտել առանց խորհրդարանի թույլտվության», համարվում է անվավեր: