Վենդետա Հրազդանում. դանակի մի քանի հարվածներից հիվանդանոց է տեղափոխվել 7-ամյա երեխային մահվան ելքով վրաերթ կատարած ու դատարանից ազատ արձակված խմած վարորդը.ֆոտոռեպորտաժ

ОБЩЕСТВО 6 Сентябрь, 2016 22:35

Այսօր՝ սեպտեմբերի 5-ին, վենդետա-դեպք է տեղի ունեցել Կոտայքի մարզում:

Ժամը 17:50-ի սահմաններում Հրազդանի բժշկական կենտրոն է տեղափոխվել Հրազդան քաղաքի Միկրոշրջան թաղամասի 130 շենքի 2-րդ բնակարանի բնակիչ, 38-ամյա Վանիկ Սարգսյանը: Ինչպես հայտնում է ֆոտոլրագրող Գագիկ Շամշյանը, Վ. Սարգսյանը հիվանդանոց է տեղափոխվել Հրազդան քաղաքի Մարշալ Բաղրամյան թաղամասում գտնվող Էլեկտրաէներգիայի բաշխիչ կայանի մոտից: Հիվանդանոց է մեկնել ոստիկանության Հրազդանի բաժնի օպերատիվ խումբը՝ բաժնի պետի գլխավորությամբ:

Ժամանել են նաև Հայաստանի քննչական կոմիտեի Կոտայքի մարզային քննչական վարչության քննիչները՝ քննչական վարչության պետ Մհեր Վարդանյանի գլխավորությամբ: Ոստիկաններն ու քննիչները պարզել են, որ Վ. Սարգսյանին սուր կտրող-ծակող առարկայով մարմնական վնասվածքներ է պատճառել Հրազդան քաղաքի Միկրոշրջան թաղամասի 53 շենքի 7-րդ բնակարանի բնակիչ, 36-ամյա Գագիկ Խամփերյանը, ում ոստիկաններն ու քննիչները կարճ ժամանակում կարողացել են հայտնաբերել և տեղափոխել ոստիկանության Հրազդանի բաժին:

Այս պահին Վ. Սարգսյանը գտնվում է հիվանդանոցի վիրահատարանում, որտեղ բժիշկները պայքարում են նրա կյանքի համար: Ֆոտոլրագրողը հայտնում է, որ Վ. Սարգսյանը այն ստահակն է, ով այս տարվա հուլիսի 4-ին ոչ սթափ (խմած) վիճակում վրաերթի էր ենթարկել Գ. Խամփերյանի երեխային ՝ 7 տարեկան Արմեն Խամփերյանին, ով տեղում մահացել էր:

Վ. Սարգսյանին այն ժամանակ կարողացել էին հաշվեհարդարից փրկել Հրազդանի ոստիկաններն ու քննիչները, որից հետո մարզի վարչության պետ Մհեր Վարդանյանի կարգադրությամբ նույն պահին հարուցվել էր քրեական գործ, իսկ հետո արդեն քննիչը միջնորդել էր Կոտայքի մարզի ընդհանուր իրավասության դատարան, որպեսզի դատարանը որպես խափանման միջոց երկամսյա կալանքի որոշում կայացնի նրա նկատմամբ: Դատարանը բավարարել էր և նա կալանավորվել էր: Հուլիսի 28-ին խմած վարորդի փաստաբանը դիմել էր վերաքննիչ դատարան՝ պահանջելով, որպեսզի դատարանը ազատ արձակի ճիվաղին, ինչը դատավոր Ալեքսանդր Ազարյանի կողմից բավարավել էր և նա ազատ էր արձակվել:

Այդ մասին իմանալով ողջ Հրազդանը շոկի մեջ էր հայտնվել՝ դատապարտելով դատարանի անարդարացի որոշումը և մարդիկ ասում էին. «Էլ ինչ արդարության մասին կարող է խոսք լինել, երբ նման որոշում է կայացվում: Այդ դեպքում մարդիկ առաջնորդվելու են ինքնադատաստանի սկզբունքով, ինչը տեղի ունեցավ այսօր»: Ֆոտոլրագրողի հետ զրուցում հրազդանցիների մեծ մասը այսօրվա տեղի ունեցածի համար մեղադրում էին վերաքննիչ դատարանին, ասելով՝ «Հրազդանի ոստիկաններն ու մարզի քննիչները գործեցին օպերատիվ և պրոֆեսիոնալ ու տականքը կանալավորվեց, իսկ վերաքննիչը՝ զարմացանք, որ նրան ազատ արձակեց»: Նույնիսկ խոսում էին, որ երեխայի հարազատները պատրաստ են եղել հաշվեհարդար տեսնել նաև դատավորի նկատմամբ ու եթե այդ տեղեկությունները հավաստի է, ստացվում է՝ Հրազդանի ոստիկաններն ու Կոտայքի մարզի քննիչները այս անգամ էլ փրկեցին դատավորին:

Փաստի առթիվ Հայաստանի քննչական կոմիտեի Կոտայքի մարզային քննչական վարչության պետ, գնդապետ Մհեր Վարդանյանի որոշմամբ ստեղծվել է քննչական խումբ՝ հատկապես կարևոր գործերով քննիչ Արման Հարությունյանի և ավագ քննիչ Հրանտ Վարդանյանի գլխավորությամբ: Փաստի առթիվ հարուցվել է քրեական գործ՝ 34-104 հոդվածի ( սպանության փորձ) հատկանիշով: Գ. Խամփերյանը ձերբակալվել է:

Ինչպես ավելի վաղ դեպքի վայրից հայտնել էր ֆոտոլրագրողը, հուլիսի 4-ին ողբերգական վրաերթ էր տեղի ունեցել Կոտայքի մարզում: Ժամը 20:00-ի սահմաններում Հրազդան քաղաքի բնակիչ, 39-ամյա Վանիկ Սարգսյանը իր վարած ВАЗ 2104 մակնիշի T 716 CB 78 ՌԴ համարանիշի ավտոմեքենայով Հրազդան միկրոթաղամասի Անդրանիկի փողոցում՝ «Վեվ» խանութի դիմաց, վրաերթի էր ենթարկել 7-ամյա Արմեն Խամփերյանին:

Երեխան տեղում մահացել էր, իսկ վարորդին ոստիկանության Հրազդանի բաժնի օպերատիվ խումբը` բաժի պետ Կարեն Գրիգորյանի և Ճանապարհային ոստիկանության 2-րդ սպայական գումարտակի 3-րդ վաշտի աշխատակիցները` վաշտի հրամանատար Արթուր Պետրոսյանի գլխավորությամբ տեղափոխել էին ոստիկանության Հրազդանի բաժին, քանի որ երեխայի հարազատները փորձում էին հաշվեհարդար տեսնել ճիվաղի նկատմամբ: Ֆոտոլրագրողը հայտնել էր նաև, որ վարորդը եղել էր ոչ սթափ (խմած) վիճակում:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Լուսանկարները ՝ Գագիկ Շամշյանի