Անի Բայաթյանը՝ երկարատեւ լռությունից հետո հեռուստաէկրաններ վերադառնալու մասին

ЛАЙФ 5 Сентябрь, 2016 21:18

Երկարատեւ էկրանային լռությունից հետո դերասանուհի Անի Բայաթյանը կրկին հեռուստէկրաններին է հայտնվել: Օրերս մեկնարկած «Փոխնակ մայրը» հեռուստասերիալի շրջանակում Անի Բայաթյանը կմարմնավորի հանցագործ կնոջ, ով հայտնվել է բանտում:

Life.panorama.am-ի հետ զրույցում Անի Բայաթյանը պատմել է ոչ միայն իր մարմնավորած հերոսուհու, այլեւ նկարահանվելու առաջարկը ընդունելու պատճառների եւ վարձատրության մասին:

Ինչպես Անին նախորդ հարցազրույցների ժամանակ էր նշում՝ վերջին տարիներին իրեն հայկական սերիալներն այնքան էլ չէին գոհացնում ու դա էր պատճառը, որ դերասանուհին հաճախ էր մերժում դրանցում նկարահանվելու առաջարկները: Հետաքրքրվելով, թե ինչն է պատճառ դարձել այս անգամ ստացած առաջարկը չմերժելու համար, Անին պատմեց.

«Նախ պետք է ասեմ, որ չգոհացնել ասելով միշտ նկատի եմ ունեցել այն, որ այսօր ինչ-ինչ պատճառներով ավելի շատ նկարահանվում են մասնագիտությամբ ոչ դերասաններ, ինչը իրական դերասանների համար մեծ բարդություններ է ստեղծում հենց նկարհանման հրապարակում, էլ չասեմ, որ էապես ազդում է տվյալ արտադրանքի որակի վրա: Ինչ վերաբերվում է այս սերիալում նկարահանվելու առաջարկը ընդունելուն, ապա նշեմ, որ այդ հարցում մեծ նշանակություն ունեցավ սերիալի սցենարի համահեղինակը՝ Ռոման Մուշեղյանն, ում հետ ոչ միայն գործընկերներ ենք, այլեւ մանկության ընկերներ: Այս առաջարկը ընդունելուս հարցում Ռոմանի ազդեցությունը իսկապես մեծ էր, բացի դա, ինձ շատ հետաքրքրեց սերիալի թեման, որը պատմում է սուրոգատ մոր մասին: Թեման նուրբ է, շատերի համար անգամ ոչ այնքան հասկանալի, այնպես որ հուսանք, որ սերիալը ինչ-որ իմաստով ճանաչողական նշանակություն կունենա»:

Իր կերպարի մասին խոսելիս՝ Անին նկատեց, որ ապագա զարգացումներին ինքն էլ տտեղյակ չէ, բայց իր հերոսուհու էությունն արդեն ընկալել է.

«Մարմնավորում եմ հանցագործ կնոջ, ով հայտնվել է կանանց գաղութում: Իրականում ինքս էլ չգիտեմ, թե ինչ զարգացումներ կունենա կերպարս, սակայն մի բան պարզ է՝ իմ հերոսուհին մեծ ազդեցություն ունի բանտում մտերմացած ընկերուհու վրա, նա անընդհատ փորձում է ընկերուհուն ճիշտ ուղիները մատնացույց անել եւ օգնել: Միանշանակ ասել, որ իմ հանցագործ հերոսուհին բացասական կերպար է, ինչ խոսք, սխալ կլինի, քանի որ հետագա զարգացումները գուցե հակառակն ապացուցեն»,- նշեց դերասանուհին ու պատմեց կերպարի մարմնավորման հետ կապված դժվարությունների մասին.

«Միշտ եմ ասել՝ ոչ մի կերպար էլ հեշտ չէ մարմնավորել, որովհետեւ ուղնուծուծով դերսան լինելու դեպքում պետք է ամեն մանրուք հաշվի առնել: Սերիալում խաղալն էլ ավելի դժվար է, քանի որ դերի ընկալման ու մանրմնավորման համար ժամանակը քիչ է, արդյունքում օգնության է հասնում պրոֆեսիոնալիզմը: Այս կերպարս ճիշտ մամնավորելու համար ներդրել եմ ողջ ուժերս՝ փորձել եմ իրականում նման կանանցից որոշ բաներ վերցնել, հասկանալ նրանց հոգեբանությունն ու հենց նրանց խաղալ: Դժվարությունս միայն մի բանի հետ է կապված՝ բանտախցում հայտնված կինը պետք է խոսի համապատասխան լեքսիկոնով, ինչը իրական Անի Բայաթյանից շատ հեռու է: Ինձ դժվար դերասանական խաղին, միմիկաներին զուգահեռ ասել օրինակ «սռոկ ադբիտ անել» եւ նման այլ բառեր: Իրականում այդ լեքսիկոնից հեռու մարդուն դժվար է դա յուրացնելը, բայց ես ամեն ինչ անում եմ, որպեսզի նախ ինքս իմ խաղից հաճույք ստանամ, հետո նաեւ հեռուստադիտողին ճիշտ ներկայանամ: Առհասարակ, կյանքում առաջնորդվում եմ հետեւյալ սկզբունքով՝ «Ինչ էլ որ անեմ, պետք է լավն անեմ, քանի որ վատն այսպես, թե այնպես կստացվի»»:

Հետաքրքրվելով, թե Անի Բայաթյանը գո՞հ է արդյոք «Փոխնակ մայրը» հեռուստասերիալում խաղալու դիմաց իր վարձատրությունից, դերասանուհին պատասխանեց՝ անդրադառնալով ավելի խորքային խնդիրներին.

«Իհարկե, ցանկացածս էլ կարող ենք միլիոններով գնահատել մեր աշխատանքը, բայց ժլատությունը լավ բան չէ, միաժամանակ, այսօր շատ դժվար է դարձել ապրելը, որովհետեւ ամեն բան թանկացել է ու երբեմն հասարակ թվացող հաճույքներից օգտվելը շռայլություն է թվում: Հաշվի առնելով այդ խնդիրները, իհարկե, քիչ է դերասանի վարձատրությունը: Այս խնդիրը էլ ավելի ցավոտ է, երբ պրոֆեսիոնալ ու իրական մասնագետ դերասաններն ու ոչ դերասանները վարձատրվում են միեւնույն չափի գումարով: Միաժամանակ՝ չեմ էլ կարող չնշել, որ սերիալները շատ դերասանների համար ուղղակի փրկություն են, քանի որ թատրոնի վարձատրությունն ավելի շատ աղքատավարձ է, քան աշխատավարձ»,- հավելեց նա:

Անդրադառնալով Անիի 5-ամսյա դստերը, դերասանուհին մեծ ոգեւորությամբ պատմեց ոչ միայն կրտսեր, այլ նաեւ ավագ դուստրերից.

«Փոքրիկիս խնամքով մեծամասամբ զբաղվում ենք ես ու մեծ աղջիկս՝ Վիոլան: Ուրախ եմ, որ մեր տանը չբախվեցինք մեծ աղջկաս խանդային դրսեւորումներին, քանի որ տարիքային մեծ տարբերությամբ երեխաներ ունենալը հաճախ հանգեցնում է նման խնդիրների: Կարծում եմ՝ որպես մայր ես կարողանում եմ հավասար ուշադրություն ու սեր տալ երեխաներիս: Ես անգամ սերիալում նկարահանվելուց առաջ պայմանավորվեցի կազմակերպիչների հետ, որպեսզի զբաղվածությունս մեծ չլինի, քանի որ ինձ համար մայրական սերն ու խնամքը շատ ավելի կարեւոր են, քան նկարահանումները»,- հավելեց նա: