Վենետիկի կինոփառատոնը մեկնարկում է հոլիվուդյան մյուզիքլի ցուցադրությամբ

 Իտալիայի Լիդո կղզում օգոստոսի 31-ին 73-րդ անգամ մեկնարկում է կինեմատոգրաֆիական արվեստի միջազգային ցուցահանդեսը, ինչպես պաշտոնապես անվանվում է Վենետիկի կինոփառատոնը՝ աշխարհում հնագույն կինոստուգատեսը, որն անցկացվում է 1932 թվականից:

Ամեն ինչ պատրաստ է Կինոյի պալատում, ինչպես նաեւ փառատոնի եւս մի քանի սրահներում համաշխարհային կինոյի աստղերի, բազմաթիվ լրագրողների, միջազգային քննադատների ընդունման համար: Այս տարի այդ սրահներին նոր հարթակ է գումարվել բաց երկնքի տակ, որը հայտնվել է նոր կինոպալատի վաղուց դադարեցված շինության տեղում: Դրա համար պատրաստվել է «Կինոն պարտեզում» հատուկ արտամրցույթային ծրագիրը, որում տեղ են գտել, մասնավորապես, ամերիկացի Ջեյմս Ֆրանկոյի, իտալացի Գաբրիելե Մուչինոյի, հարավկորեացի Կիմ Կի Դուկի ֆիլմերը:

Հիմնական մրցութային ծրագիրը, որը ներառում է 20 կինոնկար, ամբողջությամբ բաղկացած է ճանաչված «գրանդների» այդ թվում՝ Վիմ Վենդերսի, Ֆրանսուա Օզոնի, Էմիր Կուստուրիցայի, Թերենս Մալիքի գործերից:

Կինոփառատոնը բացելու է ամերիկացի ռեժիսոր Դեմիեն Շազելի «Լա Լա Լենդ» մրցութային ժապավենը: Այն կատակերգական մյուզիքլ է ամերիկյան մյուզիքլի ժանի պատմության մասին:

Ֆիլմերը գնահատելու է միջազգային ժյուրին՝ անգլիացի ռեժիսոր Սեմ Մենդեսի գլխավորությամբ, որը նկարահանել է «Գեղեցկություն ամերիկյան ձեւով» ֆիլմը եւ բոնդապատումի երկու մասեր՝ «007. «Սքայֆոլ» կոորդինատները» եւ «007. Սպեկտր»-ը: Այս տարի ժյուրիի կազմում գերակշռում են դերասանուհիները, նրանց թվում են՝ Մարչելո Մաստրոյանի եւ Կատրին Դենյով ստեղծագործական զույգի դուստրը՝ ֆրանս-իտալական դերասանուհի Կիյարա Մաստրոյանին, ամերիկացի դերասանուհի, երգչուհի, նկարչուհի եւ ռեժիսոր Լորի Անդերսոնը, գերմանացի դերասանուհի Նինա Հոսսը, բր իտանացի դերասանուհի Ջեմմա Արտերտոնը, ինչպես նաեւ չինացի դերասանուհի եւ ռեժիսոր Չժաո Վեյը:

Այս տարվա նորույթների թվում են «Սուրբ Մարկոսի արծաթե առյուծ» երկու մրցանակները: Արձանիկներից մեկը կհանձնվի լավագույն ռեժիսուրայի համար, մյուսը կհավասարեցվի ժյուրիի Գրան պրիին, որն ավելի վաղ հանձնվում էր մրցույթի երկրորդ լավագույն ֆիլմին:

10 տարի անց ռեժիսորական նոր աշխատանքով վերադառնում է ամերիկացի նշանավոր դերասան Մել Գիբսոնը: Այս անգամ «Քրիստոսի չարչարանքների» եւ «Ապոկալիպսիսի» հեղինակը նկարահանել է «Խղճի նկատառումներով» զինվորական դրաման, որը պատմում է Դեսմոնդ Դոսսի իրական կերպարի մասին, որը հրաժարվում է պատերազմել, եւ դառնում է ռազմադաշտային բժիշկ:

Արդեն մի քանի տարի փառատոնում մոդայիկ են դարձել հեռուստատեսային ֆիլմերի առաջին պիլոտային սերիաների պրեմիերաները: Վենետիկում կցուցադրեն սեզոնի ամենասպասված սերիալներից մեկի՝ իտալացի «օսկարակիր» ռեժիսոր Պաոլո Սորենտինոյի «Երիտասարդ Հռոմի պապը» սերիալի երկու մասերը:

Կինոստուգատեսը սեպտեմբերի 10-ին կեզրափակի «Հիանալի յոթնյակը» լեգենդար վեստեռնի ռեմեյքի արտամրցույթային ցուցադրումը՝ Դենզել Վաշինգտոնի եւ Իթան Հրուքի մասնակցությամբ, հաղորդել է ՏԱՍՍ-ը: