Գյումրեցիները կատակներ պարունակող Android հավելված են ստեղծել

ОБЩЕСТВО 27 Август, 2016 13:40

«Կատակում են գյումրեցիները» Android հավելված է, որն ստեղծվել է «Աննանիկս» ՍՊԸ-ի, «Գյումրին մեր տունն է» նախաձեռնության եւ «Կատակում են գյումրեցիները» ֆեսբուքյան խմբի համահիմնադիրների ջանքերով:

«65.000-ից ավելի կատակասեր ունեցող խմբի ռեսուրսները չէինք ուզում` կորչեր եւ որոշեցինք կատակները համախմբել մի տեղ ու այն փոխանցել մեր հայրենակիցներին՝ հավելվածի տեսքով»,- պատմում է հավելվածն ստեղծած թիմի անդամ Արսեն Վարդանյանը:

Մոտ 1200 կատակ պարունակող հավելվածն առայժմ 0 դրամով սկսած սթարթափ ծրագիր է, բոլոր աշխատանքները կազմակերպվել են նախաձեռնող խմբի ռեսուրսներով, սակայն ios եւ այլ տարբերակներով աշխատելու հնարավորությամբ հավելվածներ թողարկելու համար աղբյուրներ են փնտրում: Նույնիսկ 200 դոլարը բավարար կլինի նման գաղափարը կյանքի կոչելու համար: Հավելվածը կատակների առաջին հավելվածն է, որից օգտվելուց պարտադիր պետք է որեւէ մաթեմատիկական գործողություն կատարես, այլապես հնարավորություն չես ունենա կատակը կարդալ:
«Սա արել ենք, որովհետեւ նկատում ենք, որ մեր կյանքում ամեն ինչն է ավտոմատացված եւ պարզ հաշվարկներն են նույնիսկ հաշվիչ մեքենաներով արվում: Որոշեցինք նպաստել ավելի շատ մաթեմատիկական գործողություններ անելու գործընթացին: Մարդիկ հնարավորություն ունեն ավելացնել նոր կատակներ, որոնք կհրապարակվեն թարմացումների ժամանակ՝ մասնակիցների անուններով: Տեխնիկապես շատ պարզ ենք պատրաստել, որպեսզի հասանելի լինի բոլոր տեխնիկական գիտելիքների տեր մարդկանց համար»,- նշում է Արսենը:

Հավելվածն աշխատում է եւ օնլայն եւ օֆլայն ռեժիմով: Այստեղ պարտադիր չէ ինտերնետի առկայությունը: Ըստ հավելվածը ստեղծողների՝ այն հիանալի շանս է բոլորի համար ճամփորդելիս, արշավների ժամանակ, տոնակատարությունների ժամանակ ինչ-որ սուր միտք կամ կատակ կարդալու, վայելելու, ընկերների հետ կիսվելու համար: «Մեկ-երկու ամսից գուցե դրամաշնորհների եւ մրցույթների դիմենք ու ավելի խելոք ձեւաչափով հանդես գանք»,- հույս է հայտնում Past.am-ի զրուցակիցը:

Հավելվածը թողարկվել է ընդամենը օրեր առաջ՝ օգոստոսի 24-ին, եւ առաջին 5 ժամերի ընթացքում 526 օգտատեր արդեն ներբեռնել էր հավելվածը:
Android հավելվածը կարելի է ներբեռնել այստեղից՝
https://play.google.com/store/apps/details?id=com.Annaniks.Joke

Քրիստինա Տեր-Մաթեւոսյան