Սպառողների իրավունքների պաշտպանները խորհուրդ են տալիս պոլիէթիլենայինի փոխարեն պահանջել թղթե տոպրակ և թան չգնել խանութից

Սպառողը պետք է պահանջի, որ էկոլոգիայի համար պայքարելիս, խանութում իրեն տան թղթե տոպրակ:«Արմենպրես»-ի հաղորդմամբ, այս մասին օգոստոսի 13-ին լրագրողների հետ հանդիպման ժամանակ նշեց Սպառողների ազգային ասոցիացիայի նախագահ Մելիտա Հակոբյանը: Նա, անդրադառնալով որոշ խանութներում էկոլոգիայի պահպանման պատճառաբանությամբ պոլիէթիլենյին տոպրակների վաճառքին,  նշեց, որ տարբեր երկրներում այդ մեթոդն օգտագործվում է, սակայն այնտեղ առաջարկում են այլընտրանքային տարբերակ՝ թղթե տոպրակներ:

«Ազգաբնակչությանը հարկավոր է տեղյակ պահել, որ սա սպառողից նորից շորթելու, ավելի գումար վերցնելու միջոց է: Մենք ուսումնասիրություն ենք կատարել, և տոպրակ արտադրող կազմակերպությունից մեզ ասել են, որ իրենց մոտ տոպրակի գինն սկսվում է 0,3 դրամից, իսկ ամենաթանկ տոպրակները 2-3 դրամ են: Այսինքն` մեր վրա, ի՞նչ է, առևտո՞ւր են անում: Առանց այդ էլ դրամարկղի միջոցով տարբեր ձևի ավտոմատացված խաբեություններ են անում, մինչև 4 դրամը կլորացնում են սպառողի օգտին, իսկ դրանից անցնելու դեպքում իրենք են վերցնում 6 դրամը:

Սպառողը պետք է պահանջի, որ էկոլոգիայի համար պայքարելիս, իրեն տան թղթե տոպրակ, ինչպես այսօր մի 2 խանութներում արվում է: Հացը, օրինակ, տաք վիճակում դնում են պոլիէթիլենային տոպրակի մեջ և վաճառում են: Տոպրակի մեջ կաթիլներ են առաջանում և ներսի շերտի պոլիմերները ընկնում են հացի վրա, իսկ հացը չի մշակվում: Այն կարող է առաջացնել խրոնիկական թունավորում, որը հենց այդ րոպեին չենք զգում»,- նշեց Մելիտա Հակոբյանը:

Նա նաև շեշտեց, որ երեխաներին դպրոց, մանկապարտեզ կամ ճամբար ուղարկելիս, ծնողները պետք է պարբերաբար այցելեն ստուգելու այնտեղի խոհանոցը, տեսնելու, թե ինչ սննդամթերք են տալիս երեխաներին: «Մենք՝ սպառողներս, այնքան իրավունք ունենք, որ մենք էլ չգիտենք»,- ասաց նա:

Սպառողների ազգային ասոցիացիայի փոխնախագահ Միլետա Արիստակեսյանի խոսքով՝ որոշ ապրանքների օգտագործումից հետո մնացած ապակյա տարաների հանձնումը հարմար է և սպառողի և արտադրողների համար: «Մեզ մոտ ապակյա տարաների հանձնումը ընդունված չէ, քանի որ որոշ արտադրողներ ասում են, որ առևտրի, սպասարկման ոլորտը չի ցանկանում: Դա  պետք է արվի վերջապես, որ այդքան ապակյա տարաները չդառնան աղբ, այլ հանձնվեն: Այս մեթոդը շահավետ կլինի, քանի որ տարաները թանկացնում են ապրանքի արժեքը»,- նշեց Միլետա Արիստակեսյանը:

Սպառողների ազգային ասոցիացիայի նախագահն ու փոխնախագահն անդրադառնալով վերջին շրջանում թունավորման դեպքերի շատացմանը և խորհուրդ տվեցին քիչ օգտվել կոնսերվացված ապրանքներից, հատկապես ձկնատեսակներից, ավելի շատ բնական հեղուկներ օգտագործել, ճարպ պարունակող սննդամթերքներ քիչ օգտագործել, օրական 3 լիտր ջուր խմել և ամենակարևորը մեծ ուշադրություն դարձնել ապրանքների ժամկետներին:

«Այս ժամանակահատվածում շատ են թունավորման դեպքերը, քանի որ շատ լուծույթներ ենք օգտագործում և դրանց միջոցով նվազեցնում ստամոքսի թթվայնության քանակը, որն էլ առաջացնում է ինֆեկցիոն հիվանդություններ»,-ասաց ասոցիացիայի նախագահը:

Ասոցիացիայի փոխնախագահն իր հերթին նշեց, որ խանութներում հանդիպող թաների վրա պիտանելիության ժամկետը նշված է լինում 10 օր և ավելի, ինչը վկայում է այն մասին, որ դրանց մեջ ավելացնում են պահածոյացնող նյութեր՝ կոնսերվանտներ: Նրա խոսքով` դրանք ցիկլիկ միացություններ են, որոնք, ինչպես հայտնի է, ուռուցք առաջացնող են: Արիստակեսյանը խորհուրդ տվեց թանը պատրաստել տանը և թարմ վիճակում օգտագործել: