S&P-ն «նեգատիվ» մակարդակի է իջեցրել Ադրբեջանի պետական նավթային ընկերության վարկանիշը

МЕЖДУНАРОДНОЕ 11 Август, 2016 13:19

Վարկային վարկանիշների S&P Global Ratings միջազգային գործակալությունը Ադրբեջանի պետական նավթային ընկերության` SOCAR-ի եւ էլեկտրաէներգիայի արտադրության գծով պետական մենատեր «Ազերէներժի» ԲԲԸ կառույցների երկարաժամկետ վարկային վարկանիշը հաստատել է BB մակարդակի վրա:

Այս մասին ասվում է գործակալության կայքում, որտեղ նշվում է, որ ադրբեջանական պետական այդ ընկերությունների վարկանիշի կանխատեսումը «կայունից» փոխվել է «նեգատիվի»:

Գործակալության այդ վարկանիշային գործողությունը հետեւել է Ադրբեջանի սուվերեն վարկանիշը BB+/B մակարդակի վրա հաստատվելուց հետո: Ընդ որում՝ գործակալությունը Ադրբեջանի վարկանիշների կանխատեսումը «կայունից» փոխել է մինչեւ «նեգատիվի»:

«Ազադլըգ» թերթը հայտնել է, որ ընթացիկ տարվա հունվար-հուլիս ամիսներին SOCAR-ի արդյունահանած 4 420,7 մլն տ նավթի 639 հազար տ մասն ընկել է հուլիսի վրա, ինչը անցյալ տարվա նույն ժամանակաշրջանի համեմատ, 9 տոկոսով ցածր է:

Բացի այդ, հղում կատարելով SOCAR-ի հավաստի աղբյուրներին, թերթը հայտնել է, որ 2015 թվականին Ադրբեջանի պետական նավթային ընկերության աշխատակիցների ընդհանուր թիվը կազմել էր 52 հազար 104 հոգի: 2014 թվականի վերջին SOCAR-ի աշխատակիցների թիվը եղել է 54 հազար 714 հոգի: Այսպիսով, մեկ տարվա ընթացքում SOCAR-ը աշխատանքից ազատել է 2 հազար 610 աշխատակցի:

Թերթն ավելի վաղ հայտնել էր, որ Ադրբեջանում գազի արդյունահանման ծավալը 10 տոկոսով նվազել է: Ընթացիկ տարվա հունիսին Ադրբեջանի պետական նավթային ընկերության` SOCAR-ի կողմից արդյունահանվել է 512 հազար խոր.մ գազ, ինչը, անցյալ տարվա նույն ժամանակաշրջանի համեմատ, 10,3 տոկոսով ցածր է:

Բաքվում հասարակական կազմակերպությունների ներկայացուցիչների հետ օրերս տեղի ունեցած հանդիպման ժամանակ SOCAR-ի տնտեսական հարցերով փոխնախագահ Սուլեյման Գասըմովը հայտարարել է, որ ընկերության ներքին պարտքը կազմում է 1,095 մլրդ դոլար, իսկ կոնսոլիդացված պարտքը` 6,3 մլրդ դոլար կամ մոտ 9,4 մլրդ մանաթ: SOCAR-ը հանդիսանում է Ադրբեջանի Նավթի հիմնադրամի եւ պետբյուջեի գլխավոր մատակարարը:

«Թուրան» լրատվական գործակալությունը հաղորդել է, որ երկար ժամանակ հսկայական միջոցներ քամուն տալուց հետո, այդ թվում` տարօրինակ լոբբիստական նախագծեր ու միջազգային մրցումների հովանավորում, SOCAR-ը փակել է իր գրասենյակները ԱՄՆ-ում, Գերմանիայում, Բելգիայում եւ Շվեյցարիայում:

«Ազադլըգ» ռադիոկայանը հայտնել էր, որ SOCAR Trading Group-ը վերջին մեկ տարում մոտ 7,5 մլրդ դոլարի վարկեր է վերցրել միջազգային ֆինանսական կառույցներին, ինչի վերաբերյալ Ադրբեջանի ընդդիմությունը համոզմունք է հայտնել, որ վերջնարդյունքում SOCAR-ի վերցրած վարկերը վճարելու է պետությունը:

Ադրբեջանի պետական նավթային ընկերությունը (SOCAR) «Ինտերֆաքս-Ազերբայջան»-ին ավելի վաղ հայտնել էր, որ SOCAR-ը 2016 թվականի հունվար-ապրիլին, անցյալ տարվա նույն ժամանակահատվածի համեմատ, 8,5 տոկոսով կրճատել է նավթի արդյունահանման ծավալը, ինչը կապված է ինչպես նավթի համաշխարհային շուկայում պահանջարկի նվազման, այնպես էլ ադրբեջանական նավթահանքերում նավթի պակասելու հետ:

ԱՊԱ լրատվական գործակալությունն ավելի վաղ հաղորդել էր, որ Միջազգային վարկանիշային Moody`s գործակալությունը Ադրբեջանի պետական նավթային ընկերության` SOCAR-ի CFR (Corporate Family Rating) վարկանիշը` էմիտենտի սեփական պարտավորությունները կատարելու ունակությունը հաստատել է Ba1 մակարդակի: SOCAR-ի SUR (Senior Unsecured Rating) վարկանիշը (խոշոր պարտքային պարտավորությունները) եւ դեֆոլտի հավանականության գծով վարկանիշը եւս Ba1 մակարդակի վրա է, իսկ SOCAR-ի վարկանիշների գծով կանխատեսումը նեգատիվ է:

Ադրբեջանական ԶԼՄ-ներն ավելի վաղ հայտնել են, որ անցյալ տարվանից նավթի համաշխարհային գների անկման հետեւանքով ադրբեջանական մանաթի արդեն մոտ 150 տոկոսով արժեզրկման պատճառով 2016 թվականի սկզբից մինչ այժմ Ադրբեջանի ՀՆԱ-ն 40 տոկոսով նվազել է, Ադրբեջանի արտաքին առեւտրաշրջանառությունը մոտ կիսով չափ կրճատվել է, Ադրբեջանի տնտեսությունն սկսել է արագորեն անկում ապրել:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրների արտահանումից ստացվող եկամուտների հաշվին: