Ինչպես հաջող ամուսնանալ

Իդեալիզմն ու ռոմանտիկան վաղուց արդեն նորաձեւ չեն (թեեւ հազվադեպ հանդիպում են այնպիսի մարդիկ, որոնց համար սերն ինչ-որ արժեք ունի): Հաշվարկը դարի գլխավոր գաղափարն է: Բնականաբար, փոխվում են նաեւ մարդկանց կարծրատիպերը: Թեեւ հարկ է նշել, որ եթե դեռ 7-8 տարի առաջ կանացի գրեթե բոլոր հրատարակությունները, հետեւելով ընթերցողների տրամադրությանը, կանանց առաջարկում էին ընտրել բացառապես ֆինանսական անկախություն, ապա հիմա շատ կանայք արդեն գիտակցում են, որ ավելի լավ է հետեւել ընտանեկան հին արժեքներին, քանի որ դրանք, ի տարբերություն աշխատանքային կարիերայի, բնականոն կյանքի մեծ հնարավորություններ են ենթադրում:

Կանացի ամսագրերի նոր թեման կյանքի ճիշտ ուղեկից գտնելու մասին հոգեբանների խորհուրդներն են: Որպես կանոն, ձեզ պատմում են, թե ինչպես ճիշտ ընտրություն կատարել եւ կյանքի հարմար ուղեկից ընտրել՝ միաժամանակ խուսափելով սխալներից: Ըստ հոգեբանների, ոչ բոլոր տղամարդիկ են պատրաստ դիմանալ ամուսնական հարաբերություններին: Ուժեղ սեռի որոշ ներկայացուցիչների հետ ամուսնությունն ի սկզբանե բաժանության է դատապարտված: Եվ իրենց ժամանակը, էներգիան եւ ուժերն իզուր չվատնելու համար կանայք պետք է խուսափեն տղամարդկանց հետեւյալ մի քանի տեսակից:

1. Միայնակները: Դրանք այն տղամարդիկ են, ովքեր երկար ժամանակ ինքնուրույն են ապրել: Հատկապես անհուսալի են նրանք, ովքեր խուսափում են կամ կապ չեն պահպանում իրենց հարազատների հետ: Ամբողջ ժամանակն իրենց են նվիրում եւ այդպիսի կյանքից հաճույք են ստանում: Բնականաբար, ամուսնությունը նրանց զրկելու է այդ ազատությունից, ինչը նշանակում է, որ այդ նրանց մոտ միայն դժգոհություն է հարուցելու, ոչ ավելին: Այդպիսի տղամարդկանց համար ամուսնությունը «կապող շղթա» է, եւ եթե անգամ նրանք կապկպվեն այդ շղթայով, հետո այն պոկելու միջոցներ են փնտրելու:

2. Սեւ կամ սպիտակ: Սրանք այն դեմքերն են, ովքեր ամեն ինչ ընդունում են կա՛մ որպես հաղթանակ, կա՛մ պարտություն, նրանց մոտ միջինը չկա: Նրանց համար մարդկային զգացմունքները բարձրագույն մաթեմատիկա են: Նրանք չափից դուրս ռացիոնալ են: Չեն կարողանում ու չեն ցանկանում ուրիշների արարքներին տարբեր տեսանկյուններից մոտենալ: Կյանքը նրանց հետ բարդ ու լարված կլինի:

3. Երազողներ: Մարդիկ, ովքեր իրենց երեւակայական աշխարհում են ապրում եւ չեն ցանկանում հրաժարվել իրենց կենսակերպից: Յուրաքանչյուր հարաբերություն, առավել եւս՝ ամուսնությունը, բեռ է նրանց համար, որը կարող է ստիպել կյանքը տեսնել այնպիսին, ինչպիսին կա, ինչն էլ նրանց համար անընդունելի է:

4. Տղամարդիկ, ում համար հավատարմությունը ոչինչ չի նշանակում: Այդ բառը բացակայում է նրանց բառապաշարից: Նրանք չեն կարողանում եւ չեն ցանկանում զուգընկերուհու հանդեպ հավատարիմ լինել եւ չեն հասկանում, թե ինչու իրենց ամուսնությունը չի կարող ամուր լինել: Մի քանի տարի անց կամ ավելի շուտ, այդ ամուսնությունը կործանվում է:

5. Ամաչկոտներ: Երբ դուք ընտանիք եք կազմում, առօրյայում միմյանց մասին տեղեկություններ եք փոխանակում: Բայց կան մարդիկ, ովքեր ավելի շատ նախընտրում են փակվել իրենց մեջ, իրենց մտքերի հետ միայնակ մնալ, քան շփվել շրջապատի հետ: Դրանք ամաչկոտ կամ բարդույթավորված մարդիկ են: Ավելի լավ է խուսափել նման մարդկանցից, քանի որ կահույքի հետ շփումը ձեզ հաճույք չի պատճառի:

6. Բծախնդրություն: Սկզբում այդ շատ քնքուշ ու նույնիսկ զվարճալի է թվում, երբ մարդը շատ մեծ ուշադրություն է դարձնում սննդի մանրուքներին, բնակարանի դասավորվածությանը եւ այլն: Բայց ժամանակի ընթացքում այդ ձանձրացնում ու բարկացնում է, հատկապես եթե փորձում են իրերի նկատմամբ նման վերաբերմունքը նաեւ ձեզ պարտադրել:

7. Երեխաների նկատմամբ սիրո բացակայություն: Երբ ուրիշի երեխաները նրա մոտ ոչ մի զգացմունք չեն առաջացնում, բացի բարկությունից, դժվար թե նա իր երեխաներին սիրով վերաբերվի:

8. Ինքնավստահություն, ինքնահուսալիություն, ամեն ինչում առաջին տեղում սեփական «Ես»-ը: Ինքնագնահատականի բարձրացում՝ մյուսինն իջեցնելու հաշվին: Այստեղից էլ առաջանում է պահանջատիրությունն ընտանիքի յուրաքանչյուր անդամից:

9. Տղամարդիկ, ովքեր երկար են ընտրել եւ հիմա չեն կարողանում ճիշտ ընտրություն կատարել:

Այո, ամուսնության հարցին պետք է մոտենալ ոչ միայն երբ սեր կա, այլեւ մի փոքր հաշվարկով: Այդ կօգնի ամրացնել ձեր ընտանեկան կապը: