Արմինկան թողարկել է հագուստի իր հավաքածուն. ի՞նչ զգեստներ է նա մոդելավորել

Blognews.am-ը գրում է.

Երգչուհի Արմինկան հայկական շոու բիզնեսում հայտնի է որպես ամենաոճայիններից մեկը։ Արմինկայի երկրպագուները գիտեն, թե նա որքան հետաքրքրված է նորաձևությամբ։ Նախորդ տարի էլ նա հատուկ մեկնել էր մասնակցելու Միլանի նորաձևության շաբաթին։ Երգչուհու հոբբին արդեն նաև աշխատանք է. օրերս Արմինկան թողարկել է հագուստի իր հավաքածուն, իսկ բացառիկ հարցազրույցը վստահել է BlogNews-ին։ Երգչուհու բրենդը կրում է իր անունը և արդեն պաշտոնապես գրանցված է, առաջին նմուշներն էլ հենց ինքն է ցուցադրել։

-Արմինկա, տարիներ շարունակ ունեցել ես հայկական շոու բիզնեսի ամենաոճային երգչուհու համբավը, օրեր առաջ ներկայացրիր «Արմինկա»  հագուստի հավաքածուն։ Ինչո՞ւ հենց հիմա որոշեցիր հիմնել այս բիզնեսը։

-Որևէ մեկի համար գաղտնիք չէ, որ երգարվեստում պասիվացել եմ։ Ես սովոր եմ աշխատելու, ստեղծագործելու, փորձեցի ստեղծագործական մտքերս ռեալիզաացնել հագուստի ստեղծման մեջ։ Այս դեպքում աանկությունն ու անհրաժեշտությունը միաժամանակ եկան։

-Ինչի՞ց ես ոգեշնչվել հավաքածուն ստեղծելիս, ի՞նչ անվանում ունի այն։

-Անվանում չունի։ Ես ամեն ինչից կարող եմ ոգեշնչվել՝ կլինի բնություն, երաժշտություն, թե այլ բան։ Նոր գաղափարներ անընդհատ ծագում են, որովհետև միշտ նորաձևության մեջ եմ, հետևում եմ տենդենցներին, առավել ևս, երբ որոշում ես ինչ-որ բան ստեղծել, ավելի շատ ես նոր գաղափարներ ունենում, քան կարող էիր պատկերացնել։

-Հավաքածուում ավելի շատ նկատելի են դասական  հագուստներ։ Այսինքն՝ քեզանից պետք է սպասենք  դասակա՞ն հավաքածուների, թե  տեսականին կընդլայնես։

-Ես չեմ համարում, որ այս հավաքածուն դասական է։ Փորձել եմ պրակտիկ հավաքածու թողարկել։ Կան նաև «կոմբինիզոններ», հագուստ, որը կարելի է կրել թե՛ առօրյայում, թե՛ երեկույթների ժամանակ՝ համադրելով բարձրակրունկ կոշիկի և որևէ զարդի հետ։ իհարկե, կան նաև երեկոյան զգեստներ։

Այս անգամ զգեստներն էին գերիշխում, սակայն գաղափարները շատ էին, պարզապես ուզում էի հնարավորինս շուտ տեղավորվել ժամկետների մեջ ու ներկայացնել հավաքածուն։ Առաջիկայում կլինեն նաև տարբեր ոճերի միքսեր։ Ես այդպես արել եմ երաժշտության մեջ, կանեմ նաև հագուստի արտադրության մեջ։

-Այս հավաքածուդ միայն կանանց համար է, իսկ տղամարդկանց ու երեխաների համար հավաքածու թողարկել պատրաստվո՞ւմ ես։

-Ես մտածում եմ նաև դեռահաս և մանուկ աղջիկների հագուստ արտադրել, որովհետև շատ սիրում եմ։ Առաջին փորձն արդեն ունեմ, սակայն կներկայացնեմ ավելի ուշ, սակայն չեմ ասի, թե շեշտ կդնեմ մանկական հագուստի արտադրության  վրա։ Տղամարդկանց մասով կարող եմ ասել, որ կան հետաքրքիր գաղափարներ, սակայն դրանք դեռ «եփման» փուլում են։

- Բնականաբար, բիզնես սկսելիս կարևոր է հաշվարկել նաև շահույթը։ Ովքե՞ր են քո թիրախային լսարանը։ Արդյոք բիզնեսդ շահութաբեր կլինի։ 

-Իհարկե։ Որքանով հասցրել եմ  ուսումնասիրել, հասկացել եմ, որ հայ կինը միշտ պատրաստ է գումար ծախսել իր արտաքինի համար, կլինի մատնահարդարում, վարսահարդարում, թե հագուստի ընտրություն։ Հայ կանայք չեն սիրում կրկնել զգեստները միջոցառումների ժամանակ և չեն ափսոսում լավ, որակյալ հագուստի համար գումար ծախսել։ Նորաձևությունն ինձ համար հոբբիից  վերածվեց փոքրիկ բիզնեսիև նախատեսում եմ, որ պիտի լինի նաև ընտանեկան հոգսերս հոգալու միջոց։ Ոչ ոքի համար գաղտնիք չէ, որ երգարվեստով վաղուց գումար չեմ վաստակում։

Ինձ համար առաջին ուրախալի փաստն այն էր, որ նրանք, ովքեր տեղյակ էին գաղափարիս մասին, միաբերան ողջունեցին քայլս։ Շատերն ասում էին՝ պիտի վաղուց անեիր սա, մի բան էլ ուշացրել ես, սակայն ես գիտեմ, որ ամեն բան ունի իր ժամանակը։

Շատերն ինձանից սպասում են որակյալ, ճաշակով և, ամենակարևորը, տարբերվող հագուստ։ Առաջին հավաքածուի մասին արձագանքներն ապացուցում են դա։ Ցուցադրությունն օնլայն եմ արել, մեզ շատ են գրում, որ տարբերվող հավաքածու է, միաժամանակ շատ համարձակ ու գեղեցիկ։ Սա ամենակարևոր գնահատականն էր, որն ակնկալում էի։

-Շոու բիզնեսի գործընկերներդ կա՞ն հաճախորդներիդ ցանկում։

-Կան մարդիկ, ովքեր սպասում են հարմար առիթի, որպեսզի իրենց համար հագուստ մտածեմ, կան մարդիկ, ովքեր ոգևորված են, որ ես կմտածեմ իրենց հագուստները։ Մոդելավորողների հետ աշխատելիս ինքս միշտ ասել եմ՝ կարո՞ղ եք Արմինկային մի փոքր այլ ռակուրսից տեսնել, հիմա մարդիկ նույնն ինձնից են ակնկալում։

-Ի՞նչ գնային քաղաքականություն ես վարում, որքանո՞վ են մատչելի քո բրենդի հագուստները։

-Հետաքրքրված մարդկանց մոտ մեծ ոգևորվածություն կա, որովհետև մեզ մոտ գները միջին սանդղակի վրա են։ Բնականաբար, շատ թանկ կտորներից կարվող երեկոյան շքեղ զգեստները համապատասխանաբար թանկ կլինեն, մնացած ամեն բան հնարավորինս մատրչելի կլինի։ Ինքս շատ լավ գիտեմ՝ ինչ է կատարվում հայկական շուկայում, ինչ գներ են գործում երևանյան խանութներում։ Ամեն ինչ արել եմ, որ մարդիկ կարողանան հանգիստ հագնվել։

- Հայկական շուկայում հաճախ նկատում ենք, որ տեղական խանութներից ձեռք բերված կտորները ներկայացվում են որպես արտերկրից հատուկ բերված։ Դու ի՞նչ կտորներով ես աշխատում։

-Խանութներում վաճառվող կտորներն էլ Հայաստանում չեն  արտադրված։ Ես չեմ ասի, թե կտորները հատուկ իմ հավաքածուի համար են բերվել արտերկրից, որովհետև այդպես չէ, սակայն հաջորդ հավաքածուների համար պատրաստվում եմ ինքս բերել կտորները։ Առաջին հավաքածուի համար էլ էի պատրաստվում արտերկրից կտոր բերել, որպեսզի  տեղական շուկայում առաջարկվող կտորները ճանաչելի չլինեն, բայց չկարողացա ինձ էդպիսի բան թույլ տալ։ Հիմա ամեն բան անում եմ, որպեսզի մյուս հավաքածուի համար ինքս գնամ արտերկիր և ընտրեմ կտորները, որովհետև դա շատ ավելի ճիշտ ու գրագետ է,  ընտրությունն էլ ավելի մեծ է։ 

Այս հավաքածուի համար տեղի խանութներից շատ երկար  ու դժվարությամբ եմ ընտրել կտորները, որովհետև փորձում էի ընտրել այնպիսիք, որոնք ճանաչելի չեն լինի։

Ես չեմ աշխատում շատ էժան կտորներով, իմ սկզբունքներից մեկն է չաշխատել էժանագին ու անորակ կտորներով։ Հիմնականում աշխատում եմ բնական և լավ կտորներով, երեկոյան զգեստների դեպքում գնում եմ թանկարժեք կտորներ։ Այդպիսիք կան նաև հավաքածուում։

-Արմինկա, ատելյեդ արդեն գործում է, իսկ խանութ բացել պատրաստվո՞ւմ ես։

-Խանութ դեռ չկա։ Առայժմ անում ենք հավաքածուներ, որոնց նմուշները ներկայացնում ենք մեկական օրինակով։ Դրանք ենթական են վաճառքի, բացի այդ, յուրաքանչյուր ոք կարող է  պատվիրել դրանք՝ ըստ իր նախընտրելի գույնի և չափսի։ Մենք ընդունում ենք նաև անհատական պատվերներ։ Դեռ հավաքածուն չէր ցուցադրվել, բայց արդեն հասցրել ենք շքեղ երեկոյան զգեստների մեծ պատվերներ ստանալ։ Խանութ կամ ցուցասրահ ունենալն արդեն հետագայի հարց է։

-Հավաքածուի ցուցադրություն լինելո՞ւ է։

-Հիմա ոչ, որովհետև ես դիզայներ չեմ և երբեք չեմ դառնալու։ Այո, ես պատրաստվում եմ նաև մասնագիտանալ նաև այդ գործում, սակայն ես երբեք չեմ եղել և չեմ լինելու դիզայներ։  Ես ունեմ մտահղացումներ, որոնք իմ թիմի հետ կարողանում ենք  հանձնել թղթին, որովհետև ինքս նկարել չգիտեմ։ Իմ թիմում կա շատ լավ տեխնոլոգ-մոդելիեր, ով ինձ օգնում է գաղափարներս հանձնել թղթին։

-Մասնագիտանալ պատրաստվո՞ւմ ես։

-Անպայման, որովհետև շատ եմ սիրել ու ոգեշնչվել այս  աշխատանքով։ Հենց դրա համար առայժմ չեմ պատրաստվում ցուցադրություն անել։ Սա իմ առաջին փոքրիկ փորձնական քայլն էր, հետո, երբ հավաքածուները մի փոքր ավելի լուրջ կլինեն, կզգամ, որ անհրաժեշտություն կա, կանեմ նաև ցուցադրություն։

        

Զրույցը՝ Ամալյա Հովհաննիսյանի