Հրդեհ Բաքվի ավտոմեքենաների շուկայում

Բաքվի ավտոմեքենաների շուկայում տեղի ունեցած հրդեհի հետևանքով այրվել են 60-ից ավելի խանութներ, նրանց տերերը խոշոր վնասներ են կրել:

Վկայակոչելով ադրբեջանական ԶԼՄ-ները, այրվել են շուկայի առաջին շարքում գտնվող բոլոր պահեստամասերի խանութները, երկրորդ շարքն այրվել է մասնակիորեն:  Շուկայում, որի մակերեսը մոտ 1000 քմ է, երեք շարք խանութներ են եղել:

Ներկայում շուկան փակ է, այնտեղ աշխատում են քննչական մարմինները, որոնք խանութների տերերին եւ լրագրողներին թույլ չեն տալիս մուտք գործել տարածք:

Տուժած առեւտրականներից Սաբիր Իմանովը ԶԼՄ-ներին հայտնել է, որ հրդեհի հետեւանքով 300 հազար մանաթ (մոտ 150 հազար դոլար) է կորցրել:

«25 տարի է` այստեղ եմ աշխատում: Կարծում եմ դիտավորյալ հրդեհել են, քանի որ շուկան աշխատում է մինչեւ 19:00-ն, իսկ հրդեհը տեղի է ունեցել 21:00-ին, երբ էլեկտրականությունն արդեն անջատված է եղել: Այս շուկայում ոչ ջուր կա, ոչ էլ հակահրդեհային վերահսկողություն: 2-3 թմրամոլի նստեցրել են որպես պահակ, եւ վերջ», -ասել է նա:

Մի այլ առեւտրական՝ Սուլթան Մամեդովն ասել է, որ շատ խանութպաններ այդ հրդեհում միլիոնավոր մանաթի ապրանք են կորցրել, սակայն ոչ ոք փոխհատուցման հույս չի կարող ունենալ, քանի որ նրանց խանութները ապահովագրված չեն եղել:

Նախնական տվյալներով` հրդեհը տեղի է ունեցել էլեկտրահաղորդման գծում կարճ միացման հետեւանքով:

Այսօր արտադրական վթարի պատճառով պայթյուն է տեղի ունեցել Baku Steel Company գործարանում:

Report.az լրատվական կայքը հայտնել է, որ պայթյունի հետեւանքով 5 աշխատակից տարբեր մարմնական վնասվածքներով տեղափոխվել են հիվանդանոցներ: