Earlyone թիմը գնում է Շվեյցարիա, իսկ Tripl-E-ն ստացավ 120 հազար դոլար IBM-ի ծառայությունների կտրոն

ОБЩЕСТВО 28 Июнь, 2016 16:37

Մայքրոսոֆթ ինովացիոն կենտրոն Հայաստանը, Ձեռնարկությունների ինկուբատոր հիմնադրամը և IBM Ինովացիոն լուծումների և տեխնոլոգիաների կենտրոնը հունիսի 25-ին կազմակերպել էին ՏՏ ոլորտի ստարտափերին նվիրված մրցութային օր:

Seedstars Երևան

Արդեն երրորդ տարին համագործակցելով Seedstars World-ի հետ՝ Մայքրոսոֆթ ինովացիոն կենտրոնը և Ձեռնարկությունների ինկուբատոր հիմնադրամն անցկացրեցին Seedstars միջազգային մրցույթի երևանյան փուլը:

Seedstars World-ը սթարթափերի բացառիկ մրցույթ է՝ զարգացող շուկաների և արագ զարգացող ձեռնարկատիրական էկոհամակարգերի համար: Այն հանդիսանում է կամուրջ ներդրողների և նորաստեղծ ստարտափերի միջև՝ գրավելով Սիլիկոնյան հովտի, ինչպես նաև Արևմտյան Եվրոպայի խոշոր ներդրողների ուշադրությունը։ Մրցույթի տեղական հովանավորներն են ԲեթԿոնստրակտ ընկերությունը և Շվեյցարիայի դեսպանությունը Հայաստանում։ Մրցույթի կազմակերպմանն աջակցում են HIVE ընկերությունը, STARTITUP կենտրոնը, WICASTR ընկերությունը և Հայաստանի ամերիկյան համալսարանը։

Միջոցառման ընթացքում 50 հայտադիմումներից ընտրված 12 ստարտափեր ներկայացրեցին իրենց արտադրանքը միջազգային և տեղական մասնագետներից կազմված ժյուրիի անդամներին։ Մրցույթի հաղթող ճանաչվեց և Շվեյցարիայում կայանալիք մրցույթի ուղեգիր ստացավ Earlyone թիմը:

IBM ISTC Startup Challenge Դեմո օր

Ձեռնարկությունների ինկուբատոր հիմնադրամի, IBM Ինովացիոն լուծումների և տեխնոլոգիաների կենտրոնի և USAID Armenia-ի կողմից կազմակերպվել է նաև ISTC Startup Challenge-ի ավարտական ծրագրերի Դեմո օրը:

40 դիմորդներից մրցութային փուլին մասնակցելու համար ընտրվել էին 10-ը, որից 6 թիմն անցել էր եզրափակիչ փուլ: Վերջիններս Դեմո օրվա ընթացքում ներկայացրեցին իրենց գաղափարները, որի համար օգտագործել էին IBM Watson արհեստական բանականության կողմից տրամադրվող ծառայությունները, ինչը հնարավորություն է տալիս սեփական լուծումը դարձնել «խելացի»՝ առանց մեծ ջանքեր գործադրելու:

Մրցույթի արդյունքում հաղթեցին երեք թիմեր. Rumors Monitoring-ն ու Linklt-ը ստացան $1000-ին համարժեք դրամական մրցանակներ: Իսկ Tripl-E թիմը ստացավ հատուկ մրցանակ՝ $120 հազարի կտրոն՝ IBM-ի ծառայություններից օգտվելու համար: Մյուս լավագույն թիմերն էլ հնարավորություն ունեն շարունակել իրենց աքսելերացիան ISTC կենտրոնում: