Կեղծել է հանրաքվեի արդյունքները

Երեւան քաղաքի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում հարուցվել է քրեական գործ սահամանադրական փոփոխությունների հանրաքվեի ժամանակ հանձնաժողովի նախագահի կողմից արդյուննքերը կեղծելու դեպքի առթիվ:

Մասնավորապես, ըստ Դատական տեղեկատվական համակարգի՝ ՀՀ Սահմանադրության փոփոխությունների հանրաքվեի թիվ 4/20 տեղամասային հանձնաժողովի նախագահ Նիկոլայ Մոսինյանին մեղադրանք է առաջադրվել այն բանի համար, որ նա 2015թ. դեկտեմբերի 6-ի քվեարկության արդյունքների վերաբերյալ կազմված ընտրական փաստաթղթերում եւ արձանագրություններում ակնհայտ սխալ տվյալներ հաստատելու, ինչպես նաեւ այլ եղանակով կեղծել է քվեարկության արդյունքները:

Դատական գործին որպես իրեղեն ապացույց են կցվել թիվ 4/20 ընտրատեղամասի ընտրական փաստաթղթերի փակված եւ կնիքված պարկը, նույն ընտրատեղամասի գրանցամատյանը, ԿԸՀ եւ ԸԸՀ արդյունքների ամփոփման երկու արձանագրությունները` մեկ փաթեթում, եւ ընտրատեղամասի ընտրողների երեք ցուցակները` մեկ փաթեթում կնքված մատյանները: Նիկոլայ Մոսինյանին մեղադրանք է առաջադրվել Քրեական օրենսգրքի 150-րդ հոդվածի համաձայն: Այժմ նրան սպառնում է երկուսից հինգ տարի ժամկետով ազատազրկում:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ,քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի`օրինական ուժի մեջ մտած դատավճռով:

Քրիստինա Տեր-Մաթեւոսյան