Հայտնի հայուհիներ, ովքեր իրենց հարուստ արքայազնին գտել են Հայաստանից դուրս

Ամեն առիթով հայրենիքից, հայրենասիրությունից և այլ բարձրագոչ արժեքներից խոսել սիրող մեր հայերին բավական է տեսնել գրին քարտի բաղձալի կանաչը, կամ մեկ ուղղությամբ Հայաստանից դուրս տանող տոմս, և միանգամից այդ արժեքները հօդս են ցնդում կամ էլ դառնում են «ես հեռվից կսիրեմ իմ երկիրը և կապս երբեք չեմ խզի նրա հետ» 1 գործողությամբ դրամա...

Հեռանալ հայրենի երկրից, մոռանալ այստեղ առկա բոլոր խնդիրներն ու անհոգ, երջանիկ ապրել ամուսնուդ հետ, իսկ ինչու ոչ: Հատկապես, երբ ամուսինն ապահովված է և կարող է նրան էլ ապահովել այն ամենով, ինչը չի կարող տալ Հայաստանում բնակվող, աշխատավարձի հույսին ապրող ամուսինը, մոռանում են «սիրում են առանց պատճառի» ծեծված ու վաղուց իրականության հետ կապ չունեցող արտահայտությունը:

Անհոգ կյանքի այս հեշտ տոմսն են գնել հայ հայտնիներից շատերը: Այսօր որոշել եմ հավաքել և ձեզ ներկայացնել իրենց  կյանքի արքայազնին այլ երկրում գտած հայուհիներին:

Ամենաթարմը մեր հիշողության մեջ Էմմիի ամուսնությունն է: Երգչուհին երկար ժամանակ հանրությունից թաքցնում էր, որ ամուսնացել է ԱՄՆ-ում և տեղափոխվել այնտեղ մշտական բնակության: Միայն Էմմիի հղիության մասին լուրերի տարածումից հետո նա խոստովանեց իր գաղտնի ամուսնության մասին և խոստացավ չմոռանալ հայրենիքն ու հայերին...Էմմիի ամուսինը հանրային մարդ չէ, և չի սիրում լրագրողներին ու նրանց տեսախցիկները: 

Հաջորդ ամուսնությունը, որը շատ քննարկվեց և տարբեր բամբասանքերի ու չպարզաբանված ասեկոսեների պատճառ դարձավ, սերիալային դերասանուհի Մարիամ Մելիքյանիամուսնությունն է: Մարիամի ամուսինը` Գոռը,  կապ ունի Ստամբուլում «Gucci» խանութների ցանցի հետ ու նրանցից մի քանիսի ղեկավարումն անձամբ է իրականացնում։

 Խոսակցություններ էին տարածվել, որ  Մարիամը   խաբել է ամբողջ ազգին ու ասել, թե ամուսնացել է Անգլիայում բնակվող հայ երիտասարդի հետ, ում անունը Գոռ է, բայց  իրականում ամուսնացել է թուրքի հետ և բնակության է մեկնել ոչ թե Լոնդոն, այլ Ստամբուլ։ Դերասանուհին այդպես էլ չարձագանքեց այդ խոսակցություններին: Հիմա նա Հայաստանում է, այստեղ է անցկացնում հղիության վերջին ամիսները: Գուցե ուզում է, որ իր երեխան հայ, այլ ոչ թե թուրք ծնվի:

Մի քանի ամիս առաջ Հայաստանը և ամենացանկալի հարսնացուների ցանկը լքեց  21TVհեռուստաալիքի հաղորդավարուհի Անի Դաշյանը: Անիի ընտրյալը ռուսաստանաբնակ Լյուդվիգ Կարապետյանն է:  Ամուսնությունից հետո Անին տեղափոխվել է Մոսկվա՝ ամուսնու մոտ, սակայն գործունեությունը չի դադարեցնելու։ Նրա փոխանցմամբ՝ Մոսկվայից շարունակելու է աշխատել 21TV-ի համար։ 

2012 թվականին իր արքայազնի հետևից Փարիզ բնակության մեկնեց երգչուհի Արևիկ Ալավերդյանը: Արևիկի ամուսինը  Հայկո Շահբազյանն է: Նա ապրում է Փարիզում և զբաղվում է ռեստորանային բիզնեսով: 

Նույն թվականին  ATV հեռուստաընկերության «Բուդուար» և «7 երգ» հաղորդումների հաղորդավարուհի Էմմա Բալբաբյանն   ամուսնացավ և մեկնեց ԱՄՆ: Ամուսնությունից հետո Էմման անհետացավ հեռուստաէկրաններից, ամսագրերի ու աստղային կյանքը լուսաբանող կայքերի էջերից: Եվ ահա 2013 թվականին Էմմա Բալբաբյանը կրկին երևաց էկրանին. ամերիկյան ARTN «Շանթ» հեռուստաընկերությամբ նա վարում էր նորաձևության մասին իր հեղինակային հաղորդումը` «Fashion with Emma»: Իսկ արդեն 2014 թվականից նա վարում է նաև առավոտյան «Նոր օր» ծրագիրը: 

«Միսս Հայաստան 1998», «Միսս ԱՊՀ 1999», «Միսիս Գլոբ 2009-2010», գեղեցկուհի Գոհար Հարությունյանն արդեն փորձառու և վաստակաշատ մայրիկ է: Նա ևս ամուսնությունից հետո մեկնեց Հայաստանից: Գոհարի ամուսինը` Միքայելը, Մոսկվայում բիզնեսով է զբաղվում:

Բոլորն են հիշում «Ալֆրեդի սենյակի» սիրունիկ բնակչուհի, «Թեժ անկյուն» հաղորդման հաղորդավարուհի  Դինա Ավետիսյանին, ով հետո դարձավ «Մանե» կոնյակի գովազդային դեմքը և շարունակում է մեզ ժպտալ փողոցներում փակցված մեծ գովազդային  վահանակներից: Դինա Ավետիսյանն այժմ բացակայում է եթերից ու Հայաստանից: Հաղորդավարուհին ամուսնացել և իր նորաստեղծ ընտանիքի հետ բնակվում է Լոս Անջելեսում: Նրա ամուսինը Մարտինը, արվեստագետ է, ով նույնպես չի սիրում տեսախցիկները և հայտնիությունը,  Միացյալ Նահանգների քաղաքացի է: Դինայի և իր ամուսնու միջև տարիքային տարբերությունը բավականին մեծ է: