Life.panorama.am-գրում է.
Մայիսի 18-ին նշվում է «Թանգարանների միջազգային օրը»: Այսօր ժամը 10:00-18:00-ն մասնակից-թանգարաններն անվճար էին գործում բոլոր այցելուների համար, իսկ մայիսի 21-ին՝ «Թանգարանային գիշեր» տոնի կապակցությամբ ժամը 18:00-24:00-ը թանգարանները բաց կլինեն այցելութների համար եւ կրկին անվճար կգործեն:
Այս թեմայի շուրջ Life.panorama.am-ը զրուցել է Հովհաննես Թումանյանի անվան տուն-թանգարանի տնօրեն Նարինե Թուխիկյանի հետ: Մեզ հետ զրույցում տնօրենը տեղեկացրեց, որ Հ. Թումանյանի անվան տուն-թանգարանը գարնանային այս տոների կապակցությամբ հանդես կգա հատուկ ծրագրով.
«Մեր թանգարանը այս տարի վերանայել է տարեկան օրակարգն ու ապրիլյան քառօրյա պատերազմից հետո որոշում ենք կայացրել, որ այն գումարը, որ պետք է ծախսվեր արտաբյուջեից «Թանգարանային գիշերը» զվարճալի եւ ուրախ կազմակերպելու համար, մենք կուղղենք արցախյան պատերազմում վիրավորված Էրիկ Բաբայանին, ով վիրավորվել է Թալիշում ու մինչ այսօր գտնվում է վերակենդանացման բաժանմունքում: Նաեւ մայիսի 21-ին մեզ մոտ փոքրիկ միջոցառում կկազմակերպվի՝ նվիրված Էրիկին, կներկայացվի նրա պատմությունը ու հատուկ հանգանականություն կհավաքվի, իսկ հաջորդ օրը՝ մայիսի 22-ին, ժամը 12:00-ին, կրկին մեր այցելուները կարող են գալ մեզ մոտ՝ ներկա գտնվելու գանձանակի բացմանն ու հավաքված գումարը զինվորի մորը փոխանցվելու կարգին: Սա նաեւ Հ. Թումանյանի կոչն է եղել բոլոր ժամանկների համար, նա ասել է, որ յուրաքանչյուր ընտանիք իր տուրքը պետք է մատուցի բանակին: Ի դեպ՝ նշեմ, որ մեր այս նախաձեռնությունը շարունակական կլինի եւ ապագայում մենք կրկին կկազմակերպենք նման միջոցառումներ ու մեր օգնությունը կցուցաբերենք հայ զինվորներին»,- պատմեց Նարինե Թուխիկյանը ու ավելացրեց.
«Բացի վերոնշյալ միջոցառումը՝ մենք կունենանք այլ միջոցառումներ եւս: Քանի որ այս տարվա կարգախոսն է` «Թանգարանները և մշակութային լանդշաֆտները», մեր ձմեռային այգում կանցկացվի փոքրիկ բեմականացում, որի շրջանակներում առկա արձանիկները կկենդանանան»:
Ն. Թուխիկյանը «Թանգարանների միջազգային օրվա» եւ «Թանգարանային գիշերների» այցելուների մեծ քանակը կապում է անվճար մուտքի հետ.
«Այդ օրերին թանգարաններում մարդկանց մեծ հոսք կա, ինչի հիմքում ընկած է անվճար մուտքը: Բաց դռները մարդկանց բերում է թանգարաններ, սակայն այլ ծառայություններից օգտվելու համար մարդիկ պետք է վճարեն: Սա սոցիալական հարց չէ, իհարկե, չեմ ժխտում, որ մարդկանց մեծ մասն անվճարունակ են, սակայն այս դեպքը դրա հետ կապ չունի: Երեւի նորմալ է, որ մարդիկ փորձում են անվճար օգտվել այն ամենից, ինչի համար պետք է վճարեին: Սա այլեւս կարեւոր չէ, կարեւորն այն է, որ մշակույթ է ձեւավորվել, մարդիկ սպասում են մայիսյան թանգարանային տոներին, գալիս են թանգարան ու հաճելի ժամանակ են անցկացնում»,- նկատեց Հ. Թումանյանի անվան տուն-թանգարանի տնօրենն ու ավելացրեց.
«Բացի անվճար մուտքից այս օրերին այցելուներին թանգարաններ են բերում կազմակերպվող հետաքրքիր միջոցառումները, որոնք տոն են դարձնում այս օրը: Պետք է անկեղծ գտնվեմ ու ասեմ, որ այդ օրերին մարդկանց հոսքն այնքան մեծ է, որ թանգարանային ժառանգությունները ճանաչելը գրեթե անհնար է, մեզ մոտ անգամ անվտանգության նկատառումից ելնելով փակ է լինում Թումանյանի տունը: Այդ օրերին ավելի շատ հետաքրքրական են լինում միջոցառումները, որոնք հաճելի ժամանակ են պարգեւում այցելուներին»,- նշեց տնօրենը:
Հիշեցնենք, որ թանգարանային տոները իրականացվում է մշակութային ժառանգության պահպանության բնագավառում ամենահին միջազգային կազմակերպություններից մեկի` Թանգարանների միջազգային խորհրդի /ԻԿՕՄ/ առաջարկով: 1977 թվականից ի վեր մայիսի 18-ը՝ «Թանգարանների միջազգային օրը» համախմբում է աշխարհի 5 մայրցամաքների, ավելի քան 30 հազար թանգարանների` կոչ անելով տարվա համար առաջարկված թեմայի շրջանակում հանդես գալ հատուկ միջոցառումներով ու նախաձեռնություններով: Այս տարվա կարգախոսն է` «Թանգարանները և մշակութային լանդշաֆտները»:
