Նարե Գևորգյան. «Սպասելիքներ ընդհարապես չունեի, ոչինչ չէր ստացվում, տխրում էի, լաց լինում»

Blognews.am-ը գրում է.

Երեկ ավարտվեց «Շանթ» հեռուստաընկերության «Պրեմիերա» նախագիծը, որում հաղթելու համար թեժ պայքար էր ընթանում Նիկ Էգիբյանի «Իմ փոխարեն», Նարե Գևորգյանի «Արև» և Հայկ Հունանյանի «Էլ չեմ գտնի» երգերի միջև։ Նախագծի հաղթող ճանաչվեց Նարե Գևորգյանն իր «Արև» երգով, իսկ Նիկ Էգիբյանի «Իմ փոխարեն» երգը հաղթող էր ճանաչվել յութուբյան դիտումների, «21TV»-ի, «Ռադիո Վանի» և Հանրային ռադիոյի քվեարկություններով։ Հատկանշական է, որ այս երկու երգերի հեղինակն էլ նույն մարդն է՝ Լիանա Թորոսյանը։ «Արևի» դեպքում նա գրել է և՛ երաժշտությունը, և՛ խոսքերը, «Իմ փոխարենի» դեպքում՝ երաժշտությունը նա է գրել, խոսքերը՝ Սերգեյ Սարգսյանը։  Ի դեպ, մինչ հաղթողի անունը հնչեցնելը Հայկ Հունանյանը գրազ էր եկել Նարեի հետ, որ իրենցից հենց նա է հաղթելու։ Այնպես որ, նա էլ իր հաղթանակն ունի:)

Նարեն չափազանց հուզված էր, քանի որ «Արևն» ի սկզբանե նույնիսկ իր լավագույն եռյակում չի եղել,  երգը մեխանիկորեն է մնացել Նարեի մոտ։ ««Արևի» դեպքում սպասելիքներ ընդհարապես չունեի, բայց չեմ կարող ասել, որ պակաս սիրեցի այս երգը։ Ինձ համար շատ դժվար էր այս երգի համար գործիքավորում ընտրելը, որովհետև չէիք կողմնորոշվում. բլյուզային վիճակների մեջ էինք սարքում, չէր ստացվում, ռոքային վիճակների մեջ էինք սարքում, չէր ստացվում, տխրում էի, լաց լինում։ Մտածում էի՝ ի վերջո սա է իմ երգը, այլ տարբերակ չունեմ, պիտի սրանից ստանամ շատ գեղեցիկ երգ ստանամ (իհարկե, երգը գեղեցիկ էր, բայց ես  չէի կողմնորոշվում գործիքավորման հարցում)։ Շնորհիվ Գիսանե Պալյանի և Կարեն Արզումանյանի ստացանք իմ սրտով գործիքավորում։ Երգում մնաց արևային, պոզիտիվ էներգիան, որի շնորհիվ էլ, կարծում եմ, երգս գերեց մարդկանց սրտերը»,- BlogNews-ին ասաց Նարեն։

Մեդիաների հարթակներում հաղթած «Իմ փոխարեն» երգն իսկական կռվախնձոր էր դարձել Նարեի, Նիկի և Ժաննայի միջև։ Համացանցում էլ ակտիվ քննարկվեց Նարեի հուզիչ կատարումը։ Նարեն Խոստովանեց, որ եթե այդ երգն իրեն բաժին հասներ, էլ չէր մտածի հաղթանակի մասին, որովհետև դա արդեն կլիներ իր հաղթանակը. «Նիկը մի քանի անգամ ասել է, որ կարող ենք և՛ ես, և՛ Ժաննան երգել այդ երգը, որովհետև ինքն էլ հասկացավ, որ  շատ ենք սիրել այն։ Ես Նիկի կատարմամբ էլ եմ շատ սիրում այս երգը, նույն կերպ հուզվում եմ ու նույն ապրումներն եմ ունենում»։

Նիկն էլ նշեց, որ շնորհակալ եմ Նարեին, քանի որ հենց այդ քննարկման պատճառով երգն ավելի մեծ ճանաչում ստացավ ու ավելի շատ սիրվեց։

Երգիչն ասաց, որ շատ է սիրում այս երգն ու ուրախ է, որ այն սիրվել է։ «Երկու տարբերակով եմ ներկայացնելու երգը, մեկն ակուստիկ է։ Երկուսի հիման վրա էլ արդեն տեսահոլովակ եմ նկարահանելու ու շուտով ներկայացնելու եմ հանդիսատեսին։ Ինձ ավելի հոգեհարազատ է ռիթմիկ տարբերակը, քանի որ իմ երգերն ավելի մելամաղձոտ են, էս դեպքում փորձեցի նոր մի բան անել։ Ակուստիկ տարբերակն ավելի կոմերցիոն է, բայց ևս շատ գեղեցիկ է։

                               

Նյութը՝ Ամալյա Հովհաննիսյանի

Լուսանկարները՝ Կարեն Հովհաննիսյանի