Թուրքիայի վարչապետը հնարավոր է, որ հրաժարական տա

Թուրքիայի իշխող «Արդարություն եւ զարգացում» կուսակցությունը (ԱԶԿ) մոտ ժամանակում արտահերթ համագումար կանցկացնի, որում այդ երկրի վարչապետ Ահմեթ Դավութօղլուն չի առաջադրվելու կուսակցության ղեկավարի պաշտոնում:

Այս մասին, ինչպես հաղորդում է «Արմենպրես»-ը, հայտնում են թուրքական ԶԼՄ-ները` նշելով, որ արտահերթ համագումարի անցկացման մասին որոշումն ընդունվել է չորեքշաբթի այդ երկրի նախագահ Ռեջեփ Թայիփ Էրդողանի եւ Դավութօղլուի հանդիպման ժամանակ:

Թուրքիայում ավանդաբար վարչապետը հանդիսանում է իշխող կուսակցության ղեկավարը:

Թուրքական մամուլը նման զարգացումը կապում է վերջին շրջանում Էրդողան-Դավութօղլու հարաբերություններում հակասությունների պատճառով ծագած լարվածության հետ, ինչը որոշ ԶԼՄ-ներ անգամ ճգնաժամ են բնութագրում:

Թուրքիայի գործող սահմանադրությամբ երկրի ղեկավարը հանդիսանում է վարչապետը, իսկ նախագահի պաշտոնը գլխավորապես արարողակարգային գործառույթներ կատարողի իմաստ է կրում:

Էրդողանի եւ Դավութօղլուի միջեւ հակասությունները սկսվել են Էրդողանի Թուրքիայի նախագահ դառնալուց հետո, երբ վերջինս ոչ մի կերպ չի ցանկանում հետեւել երկրի սահմանադրական պահանջին եւ ցանկանում է շարունակել միայնակ կառավարել Թուրքիան:

Էրդողան-Դավութօղլու ճգնաժամը գագաթնակետին է հասել Եվրամիությանը Թուրքիայի անդամակցության, Մերձավոր Արեւելքի հետ կապված խնդիրներում, սիրիացի փախստականների հետ կապված ԵՄ հետ պայմանավորվածություններում անհամաձայնությունների պատճառով: Բացի այդ, Էրդողանի կամայական որոշումով կառավարության անդամներին նշանակելու սահմանադրական լիազորությունը վարչապետից խլվել եւ փոխանցվել է ԱԶԿ-ի վարչական խորհրդին, ինչը նշանակում է, որ Էրդողանը նրանից խլել է այդ լիազորությունը եւս: 

«Անատոլու» լրատվական գործակալությունը հաղորդում է, որ այսօր Անկարայում պետք է տեղի ունենա ԱԶԿ-ի կենտրոնական վարչական խորհրդի նիստը, որից հետո Դավութօղլուն հանդես կգա մամուլի ասուլիսով:

Ենթադրվում է, որ ԱԶԿ-ի համագումարում Դավութօղլուն կուսակցության առաջնորդի պաշտոնում չի առաջադրվելու:

Թուրք քաղաքական վերլուծաբաններն ընթացող զարգացումներն անվանել են «մայիսի չորսի նախագահական հեղաշրջում»: Ենթադրվում է, որ ԱԶԿ-ի համագումարը, որի ժամանակ Դավութօղլուն հրաժարական կտա, կանցակցվի      առաջիկա 20 օրում:

Ստացվում է, որ Դավութօղլուն Թուրքիայի վարչապետի պաշտոնում մնաց 21 ամիս:

Ըստ թուրքական մամուլի` Էրդողանը ցանկանում է վարչապետի պաշտոնում նշանակել իրեն հլու հնազանդ մեկին, որը կկատարի իր բոլոր կուլիսային որոշումները` դրանով ապահովելու Թուրքիայի իր միակ իշխանությունը մինչեւ նոր սահմանադրությամբ երկրում նախագահական համակարգի հաստատումը:

Անկարայի կուլիսներում Թուրքիայի նոր վարչապետի պաշտոնի համար շրջանառվում է 4 անուն. Էրդողանի փեսա Բերաթ Ալբայրաք, կառավարության խոսնակ Նուման Քուրթուլմուշ, արդարադատության նախարար Բեքիր Բոզդաղ, տրանսպորտի նախարար Բինալի Յըլդըրըմ:-