Անհապաղ ազատ արձակել Խադիջա Իսմայիլովային. Քրիս Սմիթ

ԱՄՆ-ի Կոնգրեսի Հելսինկյան հանձնաժողովի նախագահ Քրիս Սմիթը Մամուլի ազատության համաշխարհային օրվա կապակցությամբ մայիսի 3-ին արած հայտարարության մեջ Ադրբեջանի ղեկավարությանը կոչ է արել անհապաղ բանտից ազատել «Ազատություն» ռադիոկայանի աշխատակցուհի Խադիջա Իսմայիլովային, որին այդ երկրում բանտ են նետել շինծու մեղադրանքներով` երկրի ղեկավարի եւ նրա շրջապատի միլիրադավոր դոլարների կոռուպցիոն գործունեությունը բացահայտելու համար:

Ինչպես հաղորդում է «Արմենպրես»-ը, հայտարարության մեջ Սմիթը Ադրբեջանի ղեկավարությանը հիշեցրել է, որ միջազգային հանրությունը չի մոռացել լրագրողուհու նկատմամբ ադրբեջանական իշխանությունների ցուցադրած անարդարությունները:

«Այսօր մենք հիշում ենք Խադիջա Իսմայիլովայի մասին, անվախ լրագրող-հետազոտողի, որը Ադրբեջանում հետապնդումների է ենթարկվել եւ դատապարտվել իշխանությունների կողմից», -ասվում է հայտարարության մեջ:

2010 թվականից սկսած Իսմայիլովան լրագրողական հետազոտություններ է հրապարակում Ադրբեջանի վերին ատյաններում կոռուպցիայի մասին: Դրան ի պատասխան, երկրի հատուկ ծառայությունները փորձել են հետապնդել նրան, երբ դա նրանց չի հաջողվել, իշխանությունները նրան 2014 թվականին ձերբակալել են շինծու մեղադրանքներով:

«Եթե Ադրբեջանի իշխանությունները կարծում են, թե կարող են ուշադրությունը շեղել իրենց իրավախախտումներից, բանտ նետելով Խադիջային, ապա նրանք լրջորեն սխալվում են:

Իրականում, Խադիջայի բանտում գտնվելը միայն ծառայում է այն կոռուպցիայի մասին հիշելուն, որը նա բացահայտել է: Նրա կալանումն անօրինական է եւ նա պետք է անհապաղ ազատ արձակվի», -ասվում է հայտարարության մեջ:

Խադիջա Իսմայիլովան Ադրբեջանում ձերբակալվել է անցյալ տարվա դեկտեմբերի 5-ին` նախկին գործընկերոջը ինքնասպանության հասցնելու շինծու մեղադրանքով, եւ հետո «խոշոր չափերի յուրացում եւ զեղծարարության», «ապօրինի ձեռնարկատիրության», «հարկերի վճարումից խուսափելու», «պաշտոնեական լիազորությունները չարաշահելու» կեղծ մեղադրանքներով դատապարտվել 7,5 տարվա ազատազրկության:

Խադիջա Իսմայիլովան Ադրբեջանի իշխանությունների թիրախ է դարձել իր լրագրողական գործունեության համար: Իսմայիլովան հանդիսանում է Ադրբեջանում իշխանության վերին էշելոններում կոռուպցիոն փաստերի լրագրողական հետաքննությունների հեղինակ, որոնց արդյունքում բացահայտվել է նաեւ Ադրբեջանի նախագահ Իլհամ Ալիեւի եւ նրա ընտանիքի օֆշորյան գոտիներում ունեցած հարյուրավոր միլիոն դոլարիների հասնող ունեցվածքը:

Բանտում գտնվելու ժամանակահատվածում Խադիջա Իսմայիլովան արժանացել է Գյոթեբորգի Handels-och-Sjofarstidning (GHT) լիբերալ թերթի «Holme տարվա հերոս», միջազգային հեղինակավոր Alison Des Forges, ԱՄՆ-ի Ազգային մամուլի ակումբի Մամուլի ազատության, միջազգային «PEN/Barbara Goldsmith գրելու ազատություն», IRE-ի Tom Renner, UNESCO-ի 2016 թվականի Guillermo Cano Համաշխարհային մամուլի ազատության եւ Շվեդիայի ազգային մամուլի ակումբի «Աննա Պոլիտկովսկայա խոսքի ազատություն» պարգեւներին:  

Foreign Policy հանդեսը Ադրբեջանում շինծու մեղադրանքներով եւ քաղաքական դրդապատճառներով դատապարտված ադրբեջանցի լրագրող Խադիջա Իսմայիլովային մտցրել է 100 գլխավոր համաշխարհային մտածողների ցուցակ:  Amnesty International-ը եւ այլ միջազգային կազմակերպություններ նրան ճանաչել են «խղճի դատապարտյալ»: