«Ռեալ»-ին Մանչեսթերում ամենևին գրկաբաց չեն ընդունելու

Չեմպիոնների լիգայի ընթացիկ մրցաշրջանի խաղարկության կիսաեզրափակիչ փուլի առաջին հանդիպումը կայանալու է ապրիլի 26-ին Մանչեսթերի «Էտիհադ» մարզադաշտում. սեփական հարկի տակ «Մանչեսթեր Սիթի»-ն ուժերը կչափի Մադրիդի «Ռեալ»-ի դեմ: «Արմենպրես»-ը հայտնում է, որ պատմության մեջ առաջին անգամ մրցաշարի կիսաեզրափակիչ փուլ դուրս եկած «Սիթի»-ն ամենևին էլ հեշտությամբ չի պատրաստվում զիջել առավել փորձառու և տիտղոսակիր մրցակցին:

Միայն այն հանգամանքը, որ ներկայում «Սիթի»-ն մարզում է չիլիացի մասնագետ Մանուել Պելեգրինին, արդեն հավելյալ հետաքրքրություն է առաջացնում «Մանչեսթեր Սիթի»-«Ռեալ» դիմակայության և այս զույգի հաղթողին որոշելու պայքարում. 2009-2010 թթ. մրցաշրջանում Պելեգրինին գլխավորել է հենց «Ռեալ»-ը, սակայն մեկ մրցաշրջանից ավելի աշխատել Մադրիդում նրան թույլ չեն տվել: Հաստատապես «Սիթի»-ի գլխավոր մարզիչն անձնական հաշիվներ կունենա «Ռեալ»-ի ղեկավարության հետ, որը կարող է առավել սկզբունքային դարձնել երկու ակումբների պայքարը:

Մադրիդի «Ռեալ»-ն էլ իր հերթին մրցաշրջանը փրկելու միակ իրական հնարավորությունն ունի, պետք է ուղղակի հաղթել Չեմպիոնների լիգայում: Իսպանական «Լա լիգա»-ում չնայած «Ռեալ»-ի և 1-ին հորիզոնականը կիսող թիմերի միջև տարբերությունը 1 միավոր է, այնուամենայնիվ այդտեղ շատ բաներ «Ռեալ»-ից ուղղակի կախված չեն. եթե առաջատարը շարունակի հաղթել մոտակա 3 տուրում, ապա «Արքայական» ակումբի համար չեմպիոնության հարցը փակված կլինի:

«Ռեալ»-ի համար Չեմպիոնների լիգայի կիսաեզրափակչում խաղալն ամենևին էլ նոր երևույթ չէ. վերջին 6 մրցաշրջաններում իսպանական գերակումբին հաջողվել է հեշտորեն լուծել կիսաեզրափակիչ փուլ դուրս գալու հարցը, սակայն հաջորդ փուլ՝ եզրափակիչ դուրս գալը հեշտ չի տրվել «Ռեալ»-ին: Միայն 2013-2014 թթ. մրցաշրջանում էր թիմին հաջողվել դուրս գալ եզրափակիչ և հաղթել այնտեղ՝ նվաճելով ակումբի պատմության 10-րդ գավաթը ամենահեղինակավոր մրցաշարում:

Հաշվետու խաղից առաջ երկու թիմերի գլխավոր մարզիչները միմյանց մասին բավականին կոռեկտ են խոսել՝ կենտրոնանալով հիմնականում իրենց թիմերի առջև դրված խնդիրների վրա: «Սիթի»-ում վերջին մրցաշրջանն անցկացնող Մանուել Պելեգրինին նշել է, որ իր թիմը չպետք է միմիայն պաշտպանությունից խաղա. «Ես միշտ իմ մարզած թիմերին սովորեցրել եմ հարձակողական ֆուտբոլ խաղալ: Մեզ կդիմակայի մրցակից, որը ևս հաղթական է տրամադրված լինելու: Մենք գործելու ենք շատ կենտրոնացած և խաղալու ենք երկրպագուների համար: Պետք է կառավարենք մեր էմոցիաներն այսպիսի մրցակցի դ եմ պայքարում»:

 «Սիթի»-ն կադրային խնդիրներ է ունենալու «Ռեալ»-ի դեմ խաղում, սակայն «Արքայական» ակումբը ևս ոչ բոլոր առաջատարներին կարող է օգտագործել: Հավանականությունը մեծ է, որ «Ռեալ»-ի՝ շաբաթ օրը՝ ապրիլի 23-ին, «Ռայո Վալյեկանո»-ի դեմ կայացած խաղը բաց թողնելուց հետո մեկնարկային կազմում կլինի Քրիշտիանու Ռոնալդուն:

«Ռայո»-ի դեմ արտագնա խաղում հերոսացած Գարեթ Բեյլը, ով «Ռեալ»-ի խաղացողի կարգավիճակում ապրիլի 26-ին խաղ կանցկացնի Անգլիայում, հայտարարել է, որ միշտ էլ հետաքրքիր ու գեղեցիկ է Անգլիայում խաղալը. «Վերադարձն Անգլիա բավականին հետաքրքիր կլինի: Կփորձենք այս խաղում տալ մի քանի հարցերի պատասխան, հասնել դրական արդյունքի նախքան պատասխան խաղը»:

Մադրիդի «Ռեալ»-ի գլխավոր մարզիչ Զինեդին Զիդանը նախախաղային մամուլի ասուլիսի ժամանակ չի բացառել, որ ներկայում իր թիմը լավագույն մարզավիճակում է. «Պետք է լավ ֆուտբոլ ցուցադրենք: Լավ կլինի՝ գոլ խփենք և մրցակցի գրոհները չեզոքացնենք: Այս դիմակայությունում մեր շանսերը ես 50/50 եմ գնահատում: Կարևորը «Էտիհադ»-ում կայանալիք հանդիպմանը նվիրումով խաղալն է: Մեզ հիանալի թիմ է բաժին ընկել, որը գլխավորում է հիանալի մասնագետ: Չպետք է մրցակցին ազատ տարածություններ տալ խաղադաշտում, քանի որ «Սիթի»-ին տեխնիկապես լավ պատրաստված թիմ է»:

Անգլո-իսպանական այս դիմակայության պատմության մասին խոսելիս հարկ է ընդգծել, որ «Մանչեսթեր Սիթի»-ն ու «Ռեալ»-ը իրար դեմ 2 պաշտոնական հանդիպում են անցկացրել: Չեմպիոնների լիգայի շրջանակում 2012 թ. թիմերը հանդիպել են մրցաշարի խմբային փուլում: Մադրիդյան ակումբը 1-ին խաղում հաղթել է 1 գոլի առավելությամբ՝ 3-2 հաշվով, իսկ պատասխան խաղում ոչ-ոքի է գրանցվել՝ 1-1:

Այսպիսով, ֆուտբոլասերներին ապրիլի 26-ին Երևանի ժամանակով 22:45-ին բավականին հետաքրքիր մրցավեճ է սպասում, որի հաղթողը լուրջ հայտ կներկայացնի Միլանում կայանալիք եզրափակիչ խաղին մասնակցելու առումով: Իհարկե, այս դիմակայության հիմնական ճակատագիրը որոշվելու է Մադրիդում, սակայն բացառել առաջին խաղի հետաքրքրությունը և սկզբունքայնությունը չարժե:

Հարություն Ծատրյան