Ադրբեջանի գիտությունների ակադեմիան շարունակում է կեղծել պատմությունը

Ադրբեջանի գիտությունների ակադեմիայի պատմության ինստիտուտի տնօրեն Յագուբ Մամեդովը կառույցի գիտխորհրդում «ԱԳԱ-ում բարեփոխումներ եւ արդի փուլում Ադրբեջանի պատմության ակտուալ խնդիրները» թեմայով ունեցած ելույթում հայտարարել է, որ «միջնակարգ դպրոցների պատմության դասագրքերը պետք է փոխվեն»: Նա նաեւ հավելել է, որ Դերբենդը, Բորչալուն պետք է նորից ուսումնասիրվեն, քանի որ չի կարելի «մոռանալ մեր պատմական հողերը»:

Այս մասին, հայտնում է ԱՊԱ լրատվական գործակալությունը:

Ադրբեջանի ակադեմիկոս-պատգամավորը դժգոհություն է հայտնել այն առնչությամբ, որ բազմաթիվ մայրաքաղաքներում հիմնվելով համաշխարհային պատմագիտության վրա համոզմունք ենք հայտնում, որ Ադրբեջանը պետականության պատմություն չի ունեցել, իրանական Ատրպատականում բնակվող, իր խոսքով` «ադրբեջանցիներն» էլ ներկայացվում են որպես «հետագայում թուրքալեզու դարձած պարսիկներ»:

Պատգամավորի խոսքով` ներկայում պատրաստվում են Ադրբեջանի պատմության  նոր ակադեմիական հրապարակմանը:

Նա հավելել է, որ Դերբենդի, Բորչալուի պատմությունը պետք է նորից ուսումնասիրվի:

Ադրբեջանցի ակադեմիկոսն անդրադարձել է նաեւ «Վիքիպեդիա» ինտերնետյաին հանրագիտարանին, որում, իր խոսքով, իբր, «ստորացվում է Ադրբեջանի պատմության անհատականությունները»:

«Ադրբեջանի պատմագիտության մեջ արգելված խնդիրներ կան: Այսօր դոկտորական թեզերում Ադրբեջանի տարածք ասելիս նկատի է առնվում Խորհրդային միության կազմում Ադրբեջանի տարածքը: Այլ երկրների նկատմամբ տարածքային պնդումներ չունենք, սակայն, մենք պատմական հողեր ունենք: Հենց այդ պատճառով պատմության դասագրքերը, ակադեմիական հրապարակումները խեղված վիճակում են: Ինչպես այսօր մենք ձեռք չենք քաշում Ֆիզուլիից, այնպես էլ չպետք է մոռանանք մեր պատմական հողերը: Մի հարց էլ նշեմ, որ Վիքիպեդիայի հանրագիտարանում ստորացվում է Ադրբեջանի պատմության անհատականությունները», -նշել է նա:

Նա նշել է, որ անհրաժեշտ է նորից վերանայել եւ վերաշարադրել 19-20-րդ դարերի Ադրբեջանի եւ Երկրորդ համաշխարհային պատերազմի պատմությունները:

ԱԳԱ-ի գիտխորհուրդը կոնֆերանսում Յակուբ Մահմուդովին խորհուրդ է տվել հանդես գալ կոնկրետ առաջարկություններով:

Յագուբ Մամեդովը դեռեւս 2011 թվականին հայտարարել էր, որ իր ղեկավարած ինստիտուտը պատրաստում է հրատարակել «Ադրբեջանի պատմություն» նոր գիրքը:

Այն ժամանակ նա հայտարարել էր, որ «ավելի վաղ հրատարակված «Ադրբեջանի պատմություն» եռահատորում չեն ներառվել «ադրբեջանական Երեւանյան խանությունը» (Ադրբեջանի առաջնորդ Իլհամ Ալիեւի սիրած բազմիցս արած արտահայտությունը), Դերբենդի խանությունը (Դաղստան), Բորչալուն (Վրաստան) եւ «Հաավային Ադրբեջանը» (իրանական Ատրպատականի արեւելյան եւ արեւմտյան հատվածները):

«Ադրբեջանի պատմության» նոր հրատարակության մեջ ներառվելու են ադրբեջանական բոլոր պատմական հողերը», -ասել է նա:

Ինչպես երեւում է` Ադրբեջանի «գիտությունների» ակադեմիայում որոշել են կրկին վերանկարել երկրի պատմությունը` բացահայտորեն նկրտումներ ունենալով այս անգամ արդեն Վրաստանի եւ Ռուսաստանի տարածքների նկատմամբ եւս:

Հետքարքիր է, որ Ադրբեջանի վայ պատմաբանների «գիտական» հայտնագործությունները ծաղրի է արժանանում նաեւ ադրբեջանցիների կողմից: Այսպես, 2011 թվականի օգոստոսին vesti.az կայքը գրել էր. «Մեր ներկայիս պատմաբաններն ավելի շատ պիտանի են քարեր քարշ տալ, քան զբաղվել պատմությամբ»: