Էրիկի կոչը ՄԱԿ-ին և «Եվրոնյուզ» հեռուստաալիքին

Life.panorama.am-ը գրում է.

Երգիչ Էրիկը եւս միացավ հայ աստղերին՝ «Ոչ ռասիզմին, կանգնեցրեք Ալիեւին» ենթատեքստով բաց նամակ հղելով ՄԱԿ-ին:

Life.panorama.am-ի հետ զրույցում Էրիկը նշեց, որ իր պարտքն է համարում պայքարել Արցախի խաղաղության համար եւ հայտնեց, որ ՀՀ շատ արվեստագետներ կմիանան այս կոչին:

«Սա մի նախաձեռնություն է, որին օր օրի ավելանում են իրենց մասնակցությունը հայտնել ցանկացող աստղերը: Էությունը կայանում է նրանում, որ այն հայտնի մարդիկ, ովքեր ունեն ֆեյսբուքյան պաշտոնական էջ եւ հետեւորդների մեծ քանակ, իրենց էջերի միջոցով բաց նամակ հղեն միջազգային կազմակերպություններին եւ կոչ անեն՝ հետամուտ լինելու Արցախի խաղաղությանը եւ Ալիեւի սադրիչ գործողություններին»,- նշեց երգիչն ու ավելացրեց.

«Այսօր տեղեկատվական տեխնոլոգիաները մարդկանց կյանքում շատ մեծ դեր ունեն եւ երբեմն ոչ պակաս ազդեցիկ են նաեւ տեղեկատվական պատերազմները: Վերջին օրերին հաճախ կարող ենք լսել, թե գնացեք Արցախ, զենք վերցրեք ու կռվեք, բայց պետք է հասկանալ, որ այնքան էլ հեշտ չէ գնալ սահման ու կռիվ տալ: Իհարկե, Աստված ոչ անի, հարկ եղած դեպքում բոլորս էլ կգնանք եւ կպաշտպանենք մեր հայրենիքը, բայց այս պահին սահմանագծի կռիվը տեղափոխվել է նաեւ ինֆորմացիոն դաշտ: Ըստ իս՝ հայ հայտնի մարդիկ պետք է զբաղվեն տեղեկատվական պատերազմով եւ փորձել մեր պահանջը լսելի դարձնել աշխարհին. կարծում եմ՝ ինֆորմացիոն ճիշտ մարտավարությունը կարող է մեծ ազդեցություն ունենալ յուրաքանչյուր խնդրում»:

Ի դեպ՝ Էրիկը նույն կոչով դիմել է նաեւ հայտնի «Եվրոնյուզ» հեռուստաալիքին.

«Իմ էջից որոշեցի նամակ ուղարկել նաեւ «Եվրոնյուզ» հեռուստաալիքին, որպեսզի նրանք էլ ուշադրություն դարձնեն եւ անաչառ կերպով լուսաբանեն իմ երկրում տեղի ունեցող իրադարձությունները: Իմ կոչի էությունը կայանում է նրանում, որ ես դեմ եմ պատերազմներին, որ իմ երկրում տեղի են ունենում իրադարձություններ միայն նրա համար, որովհետեւ դա Ալիեւի քմահաճույքն է: Ես վստահ եմ, որ Ադրբեջանի բնակչությունը եւս չի ուզում այս պատերազմը, որ նրանց զինվորները ստիպված են գնալ պատերազմելու»,- նկատեց նա:

Էրիկը հույս հայտնեց.

«Ես վստահ եմ, որ աշխարհում եւ նույնիսկ մեր հարեւան պետություններում բավականին լավ են հասկանում մեր կոչի արդարացիությունը, սակայն այսօր շատերին ուղղակի ձեռք չի տալիս ընդունել դա ու փորձում են չեզոք վերաբերմունք ցուցաբերել: Այս պարագայում հույս ունեմ, որ մենք՝ հայտնիներս գուցե որեւէ կերպ օգտակար լինենք, քանի որ նստել ու ոչինչ չանելն էլ ինձ համար անընդունելի է: Այսօր ամեն հայ ինչով կարող է, պետք է օգնի մեր երկրին, այս պարագայում շատ կարեւոր է, որպեսզի մեր կոչը հնարավորինս շատ տարածվի, որպեսզի այն տեսնեն ողջ աշխարհում, ուստի կխնդրեմ, որպեսի այն մարդիկ, ովքեր մեզ սիրում ու հետեւում են, ավելի ակտիվ լինեն եւ տարածեն այս կարեւոր ուղերձը՝ այն ավելի մասսայական դարձնելու համար: Շատ եմ արժեւորում այս փասը, որ մենք համախմբված ենք գործում, քանի որ բոլորիս մեկ նպատակ է ուղղորդում՝ «Ոչ ռասիզմին, կանգնեցրեք Ալիեւին». Այս համախմբվածության համար ես ողջ ազգիս եմ շնորհակալ»:

Հեղինակ՝ Անուշիկ Մելքոնյան