Դեմքը թաքցնող ընտրակեղծարարը պնդում է՝ իրեն ոչ ոք չի հրահանգել (տեսանյութ)

Շենգավիթ վարչական շրջանի առաջին ատյանի դատարանում դատավոր Նելլի Բաղդասարյանի նախագահությամբ շարունակվում էր Վեներա Թորոսյանի գործի քննությունը: Թորոսյանը ընդունել է իր դեմ ներկայացված մեղադրանքը, վճիռը կհրապարակվի ապրիլի 19-ին: Ընտրակեղծարարության մեջ մեղադրվող Վեներա Թորոսյանը, սակայն, խուսափում էր խոսել լրագրողների հետ, թաքցնում էր իր դեմքը. դատական նիստի ժամանակ անգամ հուզվել էր: Past.am-ի հարցին, թե ում կարգադրությամբ է հօգուտ Հանրապետականի կատարել կեղծիք, արձագանքեց, թե ոչ ոք իրեն չի հրահանգել, ընտրակեղծիք կատարել է սեփական նախաձեռնությամբ:

Հիշեցնենք՝ Վեներա Թորոսյանը մեղադրվում է սահմանադրական փոփոխությունների հանրաքվեի օրը այլ անձանց փոխարեն քվեարկելու մեջ: Նրան մեղադրանք է առաջադրվել, որ նա Սահմանադրության փոփոխությունների հանրաքվեի ժամանակ Երեւան քաղաքի Շեւչենկո փողոցի թիվ 34/1 հասցեում գտնվող թիվ 8/31 ընտրական տեղամասում, լինելով հանձնաժողովի նախագահ, այլ անձանց` Նարեկ Ալեքսանյանի եւ Վալենտինա Ալեքսանյանի փոխարեն քվեարկելու դիտավորությամբ` նշված ընտրատեղամասի ընտրողների ցուցակում վերջիններիս անվան դիմաց լրացրել է պատահական` համապատասխանաբար անձնագրային տվյալները եւ ստորագրել վերջիններիս փոխարեն, կնքել է ընտրողների ցուցակում, որից հետո հանձնաժողովի մյուս անդամներից աննկատ կատարել է քվեարկություն:

Մանրամասները՝ տեսանյութում.

Լիլիթ Լալայան