Լավրով. ՌԴ-ն Ղարաբաղի խնդրի կարգավորման կոնկրետ քայլեր պարունակող փաստաթղթի ընդունման կողմնակից է

Լեռնային Ղարաբաղում խնդրի կարգավորման համար անհրաժեշտ է կոնկրետ քայլերով փաստաթուղթ ընդունել։ Այս մասին ՏԱՍՍ-ի հետ զրույցում հայտնել է ՌԴ արտգործնախարար Սերգեյ Լավրովը։

«Հիմա գլխավոր խնդիրը նորից բռնության պոռթկում թույլ չտալն է։ Այստեղ մենք նորից Ադրբեջանի նախագահի հետ քննարկել ենք, եւ հուսամ, որ դա կքննարկվի նաեւ հայկական կողմի մասնակցությամբ, շատ կարեւոր է վերադառնալ այն գաղափարներին, որոնք ամրապնդված են դեռեւս 3-4 տարի առաջ Ռուսաստանի, Ադրբեջանի եւ Հայաստանի համատեղ հայտարարություններում, երբ մեր երկրների նախագահների մասնակցությամբ հանդիպումներ էին ընթանում»,- ասել է Լավրովը։

Նրա խոսքով՝ քաղաքական կարգավորման եւ իրավիճակը հանգուցալուծելու ուղիներ փնտրելուց բացի քննարկվել են նաեւ շփման գծում վստահության միջոցներին վերաբերող հարցեր։ «Նկատի ունենալով, որ երկու կողմից էլ կան զոհեր, պետք է նրանց մարմինները փոխանակել, կան գերիներ։ Եղել է նաեւ շփման գծից դիպուկահարներին մի փոքր հետ քաշելու  գաղափարը։ Շատ ռիսկային է, երբ մարդիկ ամեն ժամ, ամեն րոպե թիրախում տեսնում են իրար, ինչ-որ մեկի նյարդերը չեն դիմանում»։

Լավրովի խոսքով՝ այդ քայլերը վաղուց պլանավորված էին։ «Ադրբեջանի, Հայաստանի եւ Ռուսաստանի նախագահների պայմանավորվածությամբ ԵԱՀԿ-ն ՄԽ համանախագահների հետ զբաղվում էր կոնկրետ քայլեր մշակելով։ Սա դեռեւս մինչեւ վերջ չձեւակերպված փաստաթուղթ է, սակայն այն կա, դրա վրա արդեն մի քանի տարի աշխատում են։ Կարծում եմ, որ ներկայիս իրավիճակը մեզ բոլորիս ուշքի կբերի եւ կստիպի արագ հավանություն տալ այդ մեթոդներին եւ գործողությունների դիմել»,- հավելել է Լավրովը։

Նա հայտնել է, որ այդ հարցը քննարկվել է Ադրբեջանի նախագահ Իլհամ Ալիեւի հետ իր հանդիպման ժամանակ: «Նա պաշտպանեց այդ մոտեցումը: Իհարկե, հասկանալով, որ մենք այդ միջոցառումները ներդնում են ոչ թե ստատուս քվոն հավերժացնելու համար, ոչ ոք դա չի ուզում, այլ նրա համար, որ ավելի բարենպաստ մթնոլորտ ստեղծվի քաղաքական գործընթացի համար, որի շրջանակներում Ռուսաստանը, երեք համանախագահների ջանքերին զուգահեռ, կիրառում է սեփական նախաձեռնությունները»,-ասել է Լավրովը:

«Նախագահ Պուտինը, իսկ դրանից առաջ նախագահ Մեդվեդեւն ակտիվորեն տարբեր գաղափարներ են առաջ մղել, որոնք թույլ կտան ապաշրջափակել իրավիճակը Ղարաբաղի շուրջ առկա տարածքների վերադարձի միջոցով, միաժամանակ լուծելով ԼՂ կարգավիճակի հարցը: Չեմ ուզում մանրամասների մեջ մտնել, բայց մի քանի տարբերակներ բանակցային սեղանին կան: Մենք երեկ նույնպես Ադրբեջանի նախագահի հետ հանդիպման ժամանակ դրան անդրադարձել ենք: Մեն ջանքերը կշարունակենք»,-ընդգծել է Ռուսաստանի ԱԳ նախարարը:

Լավրովը ուշադրություն է դարձրել այն բանի վրա, որ ռազմական գործողությունները դադարեցնելու մասին պայմանավորվածությունը ձեռք է բերվել Մոսկվայի անմիջական միջնորդությամբ. «ՌԴ նախագահ Վլադիմիր Պուտինը հեռախոսազրույց է ունեցել Հայաստանի եւ Ադրբեջանի նախագահների հետ: Վարչապետ Դմիտրի Մեդվեդեւն այսօր ժամանում է Երեւան, իսկ վաղը կլինի բաքվում: Ադրբեջանի, Հայաստանի եւ Ռուսաստանի բանակի գլխավոր շտաբների պետերի մակարդակով մենք միջնորդություն ենք իրականացրել այդ հարցում»:

«Ռազմական գործողությունները եւ կրակը դադարեցնելու մասին պայմանավորվածություն է ձեռք բերվել, որի մասին հայտարարվել է, այն հիմնականում պահպանվում է: Մենք հետեւում ենք իրավիճակին: Գլխավորն այն է, որ երկու կողմերը հաստատել են իրենց հավատարմությունն այդ ռեժիմին»,-նշել է Լավրովը:

Նա հայտնել է, որ մտադիր է շարունակել զրույցն իր հայ եւ ադրբեջանցի գործընկերների հետ: Մասնավորապես, ապրիլի 8-ին ինքը Մոսկվայում հանդիպելու է Հայաստանի ԱԳ նախարարին՝ ԱՊՀ երկրների ԱԳ նախարարների խորհրդի նիստի շրջանակներում: