Սոֆի Մխեյանի ապրիլյոթյան շնորհավորանքը զինվորների մայրերին. Նա ծննդյան օրը կանցկացնի Արցախում

Life.panorama.am-ը գրում է.

Այսօր՝ «Մայրության եւ գեղեցկության» օրը, երգչուհի Սոֆի Մխեյանն, ով արդեն երկու օր է գտնվում է Լեռնային Ղարաբաղում, Life.panorama.am-ի հետ զրույցում իր շնորհավորանքն է հղել հայ զինվորների մայրերին ու պատմել Արցախում տիրող տրամադրության մասին.

«Այսօր նախեւառաջ մայրության օրն է, իսկ հայ զինվորների մայրերը վերջին օրերին ապրում են անհավանական զգացողութուններ: Թերեւս նրանց ուղղված բարեմաղթանքիս մեջ ամենակարեւորը ցանկանամ համբերություն ու հավատ, որ Աստծո կամոք իրենց զինվոր որդիները ժպիտն երեսին տուն գան. նրանք գալու են հաղթանակած ու հայրենիքի սահամնները պաշտպանած»,- նշեց Սոֆին ու շարունակեց.

«Պատկերացնելն անգամ սարսափելի է այն ծնողների, այն մայրերի վիճակը, ում զավակները վերջին օրերին կենաց մահու կռիվ են տալիս՝ պաշտպանելով մեր սահամանների անառիկությունը: Փառք ու պատիվ մեր զինվորներին ու իրենց ծնողներին, հենց նրանց շնորհիվ է, երբեմն նույնիսկ նրանց կյանքի շնորհիվ է, որ մենք այսօր քնում ու արթնանում ենք խաղաղ պայմաններում: Ես չգիտեմ, թե այսօր ինչ մաղթեմ մեր զինվորների մայրերին, այսօր, երբ նրանք դիմանում են այս ծանր իրադարձություններին, հենց մոր անհավանական բնությունից ելնելով է»:

Սոֆի Մխեյանը փաստեց՝ Արցախում բարձր տրամադրություն է իշխում, արցախցիները շարունակում են ժպտալ.

«Շատ կարեւոր է նշել, որ այստեղ տրամադրությունը շատ հանգիստ ու խաղաղ է, այն խիզախությունն ու ուժը, որն ունի յուրաքանչյուր արցախցի, ուղղակի աննկարագարելի է եւ միայն տեսնել է պետք: Այսօր կարծես թե հենց արցախցիներն են մեզ ուժ տալիս, ժպիտ փոխանցում: Վերջին օրերին ընկերներիս հետ այստեղ ենք, իհարկե, հասկանում ենք, թե ինչ ծանր վիճակ է մեր երկրի համար, բայց մենք փորձում ենք ժպտալ միմյանց, արցախցինեը թույլ չեն տա տխրել: Այո, բոլորս գիտակցում ենք, որ մեր տղաները իսկական կռվի մեջ են ու սգում ենք զոհերի վառ հիշատակը, բայց եւ պետք է արցախցու նման ուժեղ լինել, մենք պարտավոր ենք իրենց հետ հավասար դիմակայել ու սիրել միմյանց, քանի որ հենց միմյանց նկատմամբ սերն է մեզ ուժ տալիս, սերը հենց կյանքն է, որ կա»,- նշեց երգչուհին:

Անդրադառնալով հայտնիների՝ Արցախ մեկնելու վերաբերյալ քննադատություններին, շեշտեց.

«Շատ կցանկանամ, որ մարդիկ այս պահին լցվեն բարությամբ, այո, գուցե նրանք մտածեն, թե ինչ են էնտեղ անում հայտնիները, բայց հավատացեք բնակչության համար իսկապես փոքրիկ ուրախություն է, որ մենք իրենց կողքին ենք եւ կիսում ենք իրենց համար դժվարին այս իրավիճակը: Այնպես չէ, որ մենք այսօր ժպտում ենք ու դա նշանակում է, թե մենք չենք սգում. Կյանքը ոչ միայն շարունակվում է, այլ կյանքը հենց արցախցիների այսօրվա ժպիտի մեջ է ու մենք բոլորս պետք է իրենց կողքին լինենք: Կցանկանայի, որ քննդատող մարդիկ խոսելու փոխարեն, վեր կենան ու գան Ղարաբաղ: Այստեղ ես ինձ ավելի կարող եմ զգում, քան առաջին օրերին, երբ Երեւանում էի: Այսօր պատերազմ են գնում պարելով եւ երգելով, այսինքն՝ վստահությամբ, որ լավ է լինելու»:

Վաղը Սոֆի Մխեյանի ծննդյան օրն է, նա խորհրդանշական է համարում, որ ծննդյան օրն անցկացնելու է արցախցիների կողքին.

«Վաղը ծննդյանս օրն է ու ինձ համար շատ կարեւոր է վաղը լինել արցախցիների կողքին: Իհարկե, կցանկանայի ծննդյանս օրն անցկացնել Ղարաբաղում, բայց ավելի խաղաղ պայմաններում, այնուամենայնիվ, այս պարագայում էլ ինձ համար ուղղակի մեծ բան է լինել մեր ժողովրդի կողքին ու կիսել նրանց տխրությունն ու ժպիտը: Չեմ ուզում ասել, թե մենք սա ենք անում, նա ենք անում, չէ որ յուրաքանչյուր մարդ ինքն իր ներսում գիտի, թե ինչ է անում: Նախապես ինքս ինձ բարեմաղթանք հղելով՝ ուզում եմ ոչ միայն ինձ, այլեւ հայ ժողովրդին մաղթել ուժ, եռանդ ու հաղթանակ: Հորդորում եմ լինել զինվորների կողքին, աղոթել նրանց համար ու փառք տալ հերոսաբար զոհված մեր հերոսներին»,- ավարտեց Սոֆի Մխեյանը:

Հեղինակ՝ Անուշիկ Մելքոնյան