Ընդդիմադիրները չեն անցնի ԱԺ, եթե չունենան իշխանության «օրհնանքը». Լևոն Շիրինյան

Քաղաքագետ Լևոն Շիրինյանը Past.am-ի հետ զրույցում ասաց, որ չի հետևում Ընտրական օրենսգքրի շուրջ ծավալվող «4+4+4» ձևաչափի քննակումներին, քանի որ հետաքրքրություն չի տեսնում: «3, 4, հետո մեկը խռովում է, նախկին ձևերն են էլի:

Ասեմ, թե ինչն է հարցը՝ ընդդիմադիրները լավ չպահեն իրենց, ապա պատգամավոր չեն դառնա, որովհետև իրենք այն վստահությունն ու թիկունքը, որը պետք է ունենային ժողովրդի կողմից, այսօր արդեն չունեն: Մարդիկ սովոր են պատգամավոր լինել, դա աշխատանք է: Ընդդիմադիր լինելն էլ է աշխատանք Հայաստանում:

Ընդդիմադիրները չեն անցնի ԱԺ, եթե չունենան իշխանության «օրհնանքը», որովհետև իրենք այդ հնարավորություն չունեն: Ոչ էլ ժողովրդի մեջ մի տեսանելի խարիզմա ունեն: Ուրեմն պետք է մի քիչ քննադատեն, մի քիչ էլ դուր գան և չափի մեջ լինեն ընդդիմադիր, ինչն ուզում է իշխանությունը:

Իշխանության ռազմավարությունը շատ հստակ ձևակերպել է Հովիկ Աբրահամյանը. «Բանակցել չի նշանակում չի զիջել»: Այսինքն՝ ոչինչ չեք ստանա, բայց եկեք, խոսենք: Վենետիկի հանձնաժողովն էլ կասի՝ ok, էս ինչ լավ է»,- նշեց Լևոն Շիրինյանը՝ հավելելով, որ քաղաքական գործընթացը Հայաստանում լեգիտիմանում է աշխարհի համար:

«Սրանից Հայաստանը բան չի շահում, կրճատվում է գործազուրկների և հանրօգուտ աշխատանքով զբաղվողների քանակը»,- ասաց մեր զրուցակիցը՝ նկատի ունենալով քաղաքական գործիչներին:

Լևոն Փանոսյան