Մենք սպասում էինք, որ Բաքվի Եվրոպական խաղերից հետո սահմանային իրավիճակը կրկին կլարվի. Դավիթ Ջամալյան

ИНТЕРВЬЮ 24 Июль, 2015 23:13

Ադրբեջանական զինված ուժերի կողմից այս շաբաթ նկատվեց սահմանային սադրանքների աճ:

Past.am-ի հետ զրույցում այդ ամենի պատճառները վերլուծեց ռազմական փորձագետ Դավիթ Ջամալյանը:

«Մենք սպասում էինք, որ Բաքվի Եվրոպական խաղերից հետո սահմանային իրավիճակը կրկին կլարվի: Մեզ համար անսպասելի ոչինչ տեղի չի ունեցել: Մենք շատ լավ գիտակցում ենք, որ Բաքվում քաղաքական կուրս չի փոխվել: Ինչպես նախկինում, այնպես էլ հիմա պաշտոնական Բաքուն շահագրգռված է պետական սահմանին պարբերաբար լարվածության օջախներ ստեղծել»,- ասաց Դավիթ Ջամալյանը:

Վերջինս մեզ հետ զրույցում նշեց, որ աչքի առաջ ունենալով ադրբեջանցիների քաղաքական կուրսը՝ մենք պատրաստ ենք դիմակայել այդ նախահարձակ գործողություններին:

«Կարող եմ ամենայն պատասխանատվությամբ հայտարարել, որ մեր զինված ուժերը միշտ պատրաստ են թշնամու այս կամ այն անակնկալին հավուր պատշաճի պատասխանել: Անհրաժեշտության դեպքում կարող ենք դիմել կանխարգելիչ գործողությունների: Պաշտպանության նախարարի շատ կոնկրետ ու հստակ դիրքորոշումն է՝ թույլ չտալ, որպեսզի պետական սահմանին թշնամին ունենա առավելություն՝ լինի դա հոգեբանական, բուն ռազմական, մարտավարական, թե տեղային»,- ասաց ռազմական փորձագետը:

Հարցին՝ ԵԱՀԿ Մինսկի խմբի համանախագահների տարածաշրջանային այցելությա՞մբ են պայմանավորված են այս սադրանքները, փորձագետը պատասխանեց, որ երբ Ադրբեջանն ապակայունացնում է սահմանը, նա մի քանի խնդիր է փորձում դրանով լուծել՝ ներքաղաքական, արտաքին քաղաքական: Դավիթ Ջամալյանի կարծիքով՝ չի կարելի նաև բացառել միջնորդ երկրների համանախագահների այցերի հանգամանքը:

«Կրկնում եմ՝ շատ լավ գիտենք, որ Ադրբեջանում շահագրգռված են սրել թե՛ Հայաստանի Հանրապետության, թե՛ Արցախի պետական սահմանի իրավիճակը: Իրատես լինենք, այդ կուրսը նրանք երկար են շարունակելու: Պատրանքների պետք չէ տրվել, մենք պետք է պատրաստ լինենք ոչ միայն պատասխան տալ, այլև չեզոքացնել բոլոր ռազմական վտանգները»,-ասաց Դավիթ Ջամալյանը:

Լևոն Փանոսյան