Ադրբեջանում հայերի նկատմամբ հանդուրժողականությունը «ազգային ինքնությանը հարված եւ անկախության սպառնալիք» են համարում

ОБЩЕСТВО 15 Март, 2016 19:24

Ադրբեջանում պաշտոնական մակարդակով տարվող հայատյացությանը միացել է նաեւ Աշխարհի ադրբեջանցիների կոնգրեսի (DAK) գործադիր խորհրդի ղեկավար Սամիր Ադըգյոզալովը:

Ինչպես հաղորդում է «Արմենպրես»-ը, moderator.az-ին տված հարցազրույցում, անդրադառնալով ոչ կառավարական կազմակերպություններին Ադրբեջանի նախագահին կից պետական աջակցության խորհրդի կազմի ընտրություններին, Ադըգյոզալովն ափսոսանք է հայտնել է, որ իր տեղեկություններով` խորհրդի անդամության թեկնածուների մեջ «հայի թոռ» էլ կա:

«Ամենասարսափելին այն է, որ խորհրդի թեկնածուների մեջ հայի թոռ կա: Այդ լուրը պետք է անհանգստացնի մեր ամբողջ ազգին: Մենք հայի թոռներին որեւէ ղեկավար աշխատանքի հնարավարություն չպետք է տանք: Պետք է խստագույնս արձագանքենք նմաններին աջակցող որոշակի պետական պաշտոնյաների նկատմամբ», -ասել է նա:

Ադըգյոզալովի խոսքով` նրանք, որոնք հայտարարում են, թե «հայ ժողովուրդը ադրբեջանական ժողովրդի թշնամին չէ», կամ բարեկամություն են անում հայերի հետ, «հայի կաթ են ծծել»:

«Պետական բոլոր կառույցները, ադրբեջանական հասարակության ակտիվիստները պետք է նման դեպքերին ամենախիստ վերաբերմունք ցուցադրեն, եւ թույլ չտան հայերի թոռներին իրենց հետ միասին բնակվել միեւնույն ավանում: Այդչափ հանդուրժողականությունը, մարդասիրությունը հարված է մեր ազգային ինքնությանը եւ սպառանալիք է մեր անկախությանը» -հայտարարել է նա:

«Ենի Մուսավաթ» թերթն` անդրադառնալով Ադրբեջանում պաշտոնական մակարդակով տարվող հայատյացությանը, գրել է.

«Ադրբեջանում հայերին չվիրավորող եւ ընդդիմախոսին հայ չանվանող շատ քիչ մարդ կարող է գտնվել, որն այդպես է վարվում լավ դաստիարակված լինելու, նման համոզմունք չունենալու, կամ էլ համամարդկային առումով` «հանդուրժողական» լինելու պատճառով: Եթե Ադրբեջանում որեւէ մեկը մյուսին «հայ» կամ «հայամետ» չի անվանում, ուրեմն զգուշանում է արտասահմանյան կապերի պատճառով եւ ոչ թե տոլերանտության, խաղաղության գաղափարը յուրացրած լինելու, կամ առաջադեմ հայացք ունենալու համար: Հասարակական հատվածում հայատյացություն «չլինելը» պայմանավո րված է Արեւմուտքի առաջ ստանձնած պարտավորության պատճառով: Այդտեղ պարզապես լավ են հասկանում, որ հայատյացություն դրսեւորեն` Արեւմուտքը չի համագործակցի իրենց հետ»:

Անցյալ տարվա նոյեմբերի սկզբին Ադրբեջանի ազգային ռադիոհեռուստատեսության փորձագիտության, ծրագրավորման եւ վերլուծության բաժնի ղեկավար Թավաքյուլ Դադաշեւը ադրբեջանական ԶԼՄ-ներին կոչ էր արել շարունակել ինչքան հնարավոր է շատ վիրավորանքներ օգտագործել հայերին վերաբերվող նյութերում: