Դիզայներ Նուռը կանանց միամսյակի առթիվ յուրահատուկ ցուցադրություն է ներկայացրել
ОБЩЕСТВОՔանդակագործ, նկարիչ, դիզայներ Նուռի` տարբեր հավաքածուների լավագույն նմուշներն ամփոփվել են «ԵրևանՈՒՀԻ» խորագրով ցուցահանդեսում: Երևանի քաղաքապետարանի աջակցությամբ` բացառիկ այս ցուցադրությանը հնարավոր կլինի ծանոթանալ առաջիկա մեկ ամսվա ընթացքում՝ Երևանի պատմության թանգարանում:
«Ցուցահանդեսը նվիրված է կանանց: Այստեղ ամենակարևոր տեղն է զբաղեցնում հարսանեկան զգեստը, որը ստեղծել ենք Լիլիթ Մարգարյանի հետ: Զգեստի հեղինակը նա է, ես պատրաստել եմ զարդերը: Այս զգեստը կարելի է կրել այսօր, չլինելով հին»,- «Արմենպրես»-ի փոխանցմամբ` ցուցահանդեսի մեկնարկին նշեց դիզայները:
Նա տեղեկացրեց, որ ցուցահանդեսին ներկայացված է «Արատտա» հավաքածուն, ինչպես նաև որոշ նկարներ «Թռչուններ» հավաքածուից և գրաֆիկական աշխատանքներ: «Այն ամենն, ինչ ես պատրաստում եմ, մեկ օրինակ է, երբեք չի կրկնվում և եզակի է»,-հավելեց նա:
Ցուցադրված «Արատտա» հավաքածուն ներկայացնում է պատմական Հայաստանի տարբեր քաղաքները խորհրդանշող բրոզնե և արծաթյա զարդեր: Այն ստեղծվել է 2008 թվականին, բազմիցս ցուցադրվել տարբեր երկրներում և արժանացել բարձր գնահատականի:
Երևանի քաղաքապետի տեղակալ Արամ Սուքիասյանը ցուցահանդեսի բացման մեկնարկին նշեց, որ Երևանի պատմությունում ներկայացվում են նաև ժամանակից ստեղծագործողների աշխատանքները:
«Նուռի ստեղծագործությունների` հիմնականում զարդարվեստի ականատեսն ենք: Վստահ եմ, որ շատ դուր կգա ձեզ: Ուրախ եմ այս ցուցահանդեսի բացման կապակցությամբ »,-նշեց նա:
«ԵրևանՈՒՀԻ» խորագրով ցուցահանդեսի բացմանը ներկա էր նաև ազգագրագետ, նկարչուհի Լուսիկ Ագուլեցին, ով հրաշք որակեց Նուռի աշխատանքները:
Նուռը ծնվել է 1971 թվականին Երևանում: Հիմնական մասնագիտական կրթությունը ստացել է Երևանում, ուսումը շարունակել Մոսկվայում, ապա կատարելագործվել ԱՄՆ-ում: Ունեցել է անհատական ցուցահանդեսներ ինչպես Հայաստանում, այնպես էլ արտասահմանում, բազմիցս մասնակցել է մրցույթների: Հայաստանի դիզայներների միության անդամ է:



