Իտալական կինոյի շաբաթը Երևանում նվիրվում է Կանանց միջազգային օրվան
ОБЩЕСТВОՄարտի 7-11-ը Երևանում անցկացվելիք «Իտալական կինոյի շաբաթը» նվիրվում է Կանանց միջազգային օրվան: Մարտի 2-ին այդ մասին մամուլի ասուլիս ում հայտարարեց Հայաստանում Իտալիայի դեսպանությանգործերի ժամանակավոր հավատարմատար Մաուրիցիո Կրոչատելլին: Նա նշեց, որ յուրաքանչյուր օր «Մոսկվա» կինոթատրոնում ցուցադրվելու է 5 ֆիլմ, որոնք նկարահանվել են 2010-14 թթ., ֆիլմերի ցուցադրությունն անվճար է: Մաուրիցիո Կրոչատելլին հույս հայտնեց, որ ինչպես անցյալ տարի, այս անգամ ևս մեծ թվով այցելուներ կունենան:
Դեսպանության մշակութային ծրագրերի պատասխանատու,Երևանի պետական համալսարանի դասախոս Լաուրա Պաչենտին, ներկայացնելով ծրագիրը, նշեց, որ ֆիլմերը նվիրված են իտալական հասարակությանը հուզող հարցերին, սակայն բոլորի կենտրոնական թեման կինն է և կնոջն առնչվող տարբեր խնդիրներ: «Ֆիլմերում ներկայացված է կանանց համապարփակ աշխարհը, կան տարբեր կանացի կերպարներ՝ ուժեղ, թույլ կին, մայր, սիրուհի՝ կինն իր ողջ էությամբ: Ի տարբերություն իտալական կինոյում 1980-ական թթ. ընդունված կերպարների՝ այս ֆիլմերում կինը ներկայացված է այլ կերպ՝ զերծ հասարակության կողմից պարտադրվող ստերեոտիպերից»,- ասաց Լաուրա Պաչենտին: Ժամանակագրական առումով ֆիլմերի թեմատիկան ընդգրկում է 1950-ականներից մինչև մեր օրերը:
Լաուրա Պաչենտին նշեց նաև, որ Հայաստանում աշխատելիս շատ է շփվում հայ կանանց հետ, գիտե նրանց խնդիրները և նաև դա հաշվի առնելով է ընտրվել ֆիլմերի ցանկը: «Կարծում եմ՝ թեև իտալացի կանայք չէ, որ պետք է ինչ-որ բան սովորեցնեն հայ կանանց, պարզապես դիտելով այս ֆիլմերը՝ հայ կանայք կարող են տեսնել հենց իրենց հուզող խնդիրները»,- ասաց դեսպանատան մշակութային հարցերի պատասխանատուն:
Մաուրիցիո Կրոչատելլին, «Արմենպրես»-ի հարցին ի պատասխան, հավելեց, որ առաջիկայում նախատեսվում է անցկացնել նաև այլ մշակութային միջոցառումներ: Հունիսին տեղի կունենա Հայաստանի պետական կամերային նվագախմբի և հոբոյահար Ջանֆրանկո Բորտոլատոյի՝ բարոկկո երաժշտությանը նվիրված համատեղ համերգը՝ «Հոբոյի հմայքը խորագրով»: Հոկտեմբերին տեղի կունենա ավանդական «Իտալերեն լեզվի շաբաթը», որը 16 տարի անցկացվում է ողջ աշխարհում: Այս տարի միջոցառման թեման իտալական նորաձևությունն ու դիզայնն է: Կանցկացվեն նաև այլ միջոցառումներ, որոնք դեռևս նախապատրաստական փուլում են:



