«Թրամփի երթուղին» ունի ոչ միանշանակ հեռանկարներ, սակայն նախագիծը միայն կշահեր Ռուսաստանի մասնակցությունից. Գալուզին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Թրամփի երթուղին ունի ոչ միանշանակ հեռանկարներ, սակայն նախագիծը միայն կշահեր Ռուսաստանի մասնակցությունից։ Այս մասին RTVI-ին տված հատուկ հարցազրույցում ասել է ՌԴ ԱԳ նախարարի տեղակալ Միխայիլ Գալուզինը։

Միխայիլ Գալուզինի խոսքով՝ «Թրամփի երթուղու» նախագիծը «դատարկ տեղից» չի առաջացել։

«Դեռևս 2022-2023 թվականներին Հարավային Կովկասում տրանսպորտային և տնտեսական կապերի վերականգնման հետ կապված բոլոր հարցերը, իսկ նման կապերի վերականգնումը ղարաբաղյան հակամարտության կարգավորման վերաբերյալ Ռուսաստանի, Հայաստանի և Ադրբեջանի եռակողմ պայմանավորվածությունների մաս էր կազմում, քննարկվել և համաձայնեցվել էին Ռուսաստան-Ադրբեջան-Հայաստան եռակողմ աշխատանքային խմբի շրջանակներում՝ երեք պետությունների կառավարությունների ղեկավարների տեղակալների մակարդակով», - հիշեցրել է Միխայիլ Գալուզինը։

Ինչպես նշել է Ռուսաստանի ԱԳ փոխնախարարը, հենց այն ժամանակ էլ քննարկվել են երկաթուղային հաղորդակցության վերականգնման մոդալները, այդ թվում՝ Հայաստանի և Ադրբեջանի երկաթուղիները կապելու կամ օղակելու մոդալները։

«Այլ հարց է, որ ոչ մեր մեղքով են այդ քննարկումները, այդ երկխոսությունը եռակողմ աշխատանքային խմբի շրջանակներում ընդհատվել։ Այն շարունակելը հիմա չափազանց դժվար է, քանի որ Հայաստանը, որքան հասկանում եմ, ապագա երկաթուղու կանոնադրական կապիտալի 49%-ը խոստացել է ամերիկյան կողմին»,- հիշեցրել է Գալուզինը։

Սմոլենսկայայի հրապարակում կարծում են, որ «Թրամփի ճանապարհ» նախագծի իրականացումը ոչ միանշանակ հեռանկարներ ունի։

«Օրինակ՝ ԱՄՆ-ի և Իսրայելի կողմից Իրանի դեմ իրականացված չհրահրված ագրեսիայից հետո, իմ կարծիքով, դժվար թե իրանական կողմը հիացած լինի այն հանգամանքով, որ իր սահմաններից անմիջապես հյուսիս կլինի Ամերիկայի Միացյալ Նահանգների ներկայությունը։ Ավելին, կա փորձագետների կարծիք, որ չինական կողմը նույնպես դժվար թե գոհ լինի, որ ամերիկյան կողմը վերահսկելու է Կենտրոնական Ասիայից Եվրոպա տրանսպորտային-լոգիստիկ երթուղու «Թրամփի ճանապարհի» տեսքով որևէ հատված»,- պարզաբանել է Միխայիլ Գալուզինը։

Հիշեցնենք, որ հունիսի սկզբին Հայաստանի ԱԳ նախարար Արարատ Միրզոյանը և ԱՄՆ պետքարտուղար Մարկո Ռուբիոն ստորագրել են TRIPP-ի իրականացման շրջանակային համաձայնագիր։ Այնուհետև Նիկոլ Փաշինյանը կառավարության նիստում հայտարարել է, որ ԱՄՆ-ում «Թրամփի երթուղու» ֆինանսավորման համար հիմնադրամ է ստեղծվել։

«Այնպես որ, հեռանկարները ոչ միանշանակ են, և մենք կարծում ենք, որ այս նախագիծը միայն կշահեր ռուսական մասնակցությունից։ Որովհետև, նախ, ամենայն հավանականությամբ, ճանապարհը ստիպված կլինեն կառուցել ռուսական երկաթուղու լայնությամբ, որպեսզի ապահովվի անխափան կապը Ադրբեջանի հետ։ Ավելին՝ հայկական երկաթուղիները գտնվում են «Հարավկովկասյան երկաթուղի» փակ բաժնետիրական ընկերության կառավարման ներքո, որը Ռուսական երկաթուղիների դուստր ձեռնարկությունն է»,- պարզաբանել է ԱԳ փոխնախարարը։

Ռուսաստանի ԱԳՆ-ում նշում են, որ Հայաստանի տարանցումը պետք է իրականացվի ԵԱՏՄ նորմերին և կանոններին համապատասխան, որից Հայաստանը, ինչպես հայտարարում է, չի ցանկանում դուրս գալ։

«Դե, և վերջապես, «Թրամփի երթուղին» կանցնի ռուս սահմանապահների կողմից պահպանվող գոտով, որոնք արդեն տասնամյակներ շարունակ իրենց հայ գործընկերների հետ միասին ծառայություն են իրականացնում հայ-իրանական և հայ-թուրքական սահմանին։ Այնպես որ, այս կամ այն կերպ, անհրաժեշտ կլինի հաշվի առնել Ռուսաստանի կարծիքը, անհրաժեշտ կլինի հաշվի առնել ԵԱՏՄ-ի կարծիքը»,- եզրափակել է Միխայիլ Գալուզինը։

Հետևեք մեզ՝ այստեղ