ՌԴ խոշորագույն ավիաընկերությունների յուրաքանչյուր 5-րդ ինքնաթիռը տեխնիկական անսարքությունների պատճառով չի դուրս գալիս չվերթի

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ռուսական խոշորագույն ավիաընկերությունները չեն շահագործում իրենց ունեցած օդանավերի գրեթե 20%-ը՝ պահեստամասերի պակասի և տեխնիկական սպասարկման անհրաժեշտության պատճառով։ Ինչպես գրում է «Կոմերսանտ»-ը, ռուսաստանյան ուղևորահոսքի ավելի քան 90%-ն ապահովող 11 ավիաընկերությունների 673 ինքնաթիռներից 130-ն այժմ պարապուրդի է մատնված։ Մինչդեռ մասնագետները նշում են, որ ամռան սեզոնին պլանային սպասարկման պատճառով օդանավերի ընդհանուր թվի մինչև 10%-ի չվերթների չմեկնելը նորմալ ցուցանիշ է համարվում։ Ավելին, եթե հաշվից դուրս թողնենք «Աերոֆլոտ» խումբը, որին բաժին է ընկնում խոշոր ընկերությունների օդանավերի կեսը, ապա մյուս ութ փոխադրողների մոտ չի թռչում պարկի գրեթե մեկ երրորդը՝ 322 ինքնաթիռից 93-ը

Այս ամառ ամենամեծ պարապուրդն ունի մասնավոր խոշորագույն «S7» ավիաընկերությունը, որի 104 օդանավից բաղկացած ավիապարկի մեկ երրորդը չի թռչում․ շարժիչների խնդիրների պատճառով կայանված է 32 միավոր «Ա320neo» և մեկ «Embraer»։ Նմանատիպ խնդրի առաջ են կանգնել նաև «Ուրալյան ավիաուղիները», որոնք չեն շահագործում իրենց 51 ինքնաթիռներից 10-ը, այդ թվում՝ բոլոր ութ «Ա321neo»-ները և մեկական «Ա320» ու «Ա321»։ «Utair»-ի պարագայում 59 օդանավից գետնին է մնացել 9-ը, ընդ որում՝ դրանցից յոթը շահագործումից դուրս են բերվել դեռևս 2023-2025 թվականներին, ներառյալ՝ բոլոր երեք հեռամագիստրալային «Boeing 767»-ները։ Իսկ «Nordwind» ավիաընկերությունում պատկերն է՛լ ավելի մտահոգիչ է․ այս ամառ չվերթներ չի իրականացնում 27 ինքնաթիռից 12-ը, այդ թվում՝ հինգ հեռամագիստրալային «Ա330»-ներից երեքը և չորս հեռագնաց «Boeing 777»-ներից երեքը։

«Red Wings» ավիաընկերությունը պարապուրդի է մատնել իր 26 օդանավերից հինգը, այդ թվում՝ երեք «Boeing 777»-ներից երկուսը։ Բացի այդ, ընկերության ունեցած 20 միավոր «SSJ 100»-ներից երկուսը չեն թռչում արդեն մի քանի ամիս, իսկ երրորդը չվերթներից հեռացվել է հունիսի 18-ին՝ շարժիչների անսարքության պատճառով։ «Smartavia»-ն դադարեցրել է իր 13 օդանավերից երեքի շահագործումը, ներառյալ՝ երկու «Ա320neo»-ները և մեկ «Boeing 737»-ը։ Իրավիճակն է՛լ ավելի բարդ է չարտերային խոշորագույն փոխադրող «Azur Air»-ի մոտ, որի օդանավերի շարժիչների հետ կապված լուրջ խնդիրներ էին հայտնաբերվել. «Ռոսավիացիայի» ստուգումներից հետո ընկերության 23 ինքնաթիռներից թռիչքի թույլտվություն է ստացել միայն 6-ը, ինչը նշանակում է, որ ավիապարկի 74%-ը կայանված է։ Իսկ «Ազիմուտ» ընկերությունում, որն անցյալ շաբաթ հայտարարել էր ավիավառելիքի հետ կապված ճգնաժամային իրավիճակի մասին, պարապուրդի մեջ է գտնվում 19 միավոր «SSJ 100» օդանավերից 4-ը։ Այնուամենայնիվ, ընկերությունից հայտնել են, որ իրենց բոլոր օդանավերը շահագործվում են՝ հաշվի առնելով տեխնիկական սպասարկման պլանային փուլերի անցումը։

«Աերոֆլոտ» խմբի մոտ, որն ունի 349 ինքնաթիռ, ընդհանուր առմամբ չի թռչում 37 օդանավ։ Դրանց մեծ մասը բաժին է ընկնում «Ռոսիա» ավիաընկերությանը, որի 136 օդանավից պարապուրդի մեջ է գտնվում 30-ը։ Մասնավորապես, շահագործման մեջ են ութ հեռամագիստրալային երկհարկանի «Boeing 747»-ներից միայն երկուսը, տասը «Boeing 777»-ներից չորսը և 78 «սուպերջեթերից» (SSJ 100) 61-ը։ Ընդ որում, երկու «SSJ 100» դադարել են չվերթներ իրականացնել վերջերս՝ հունիսի 24-ին՝ շարժիչի անսարքության պատճառով, իսկ մնացածը կայանվել են 2022-2025 թվականների ընթացքում։ Ինչ վերաբերում է բուն «Աերոֆլոտ» ավիաընկերությանը, ապա նրա 171 օդանավից չի թռչում ընդամենը յոթը, այդ թվում՝ վեց «Airbus 320neo»-ներից երեքը, 12 «Ա330»-ներից մեկը, յոթ «Ա350»-ներից մեկը, ինչպես նաև երկու «Boeing 777»։

Ինչպես նշում են «Կոմերսանտ»-ի հետ զրուցած փորձագետները, խոշորագույն ավիաընկերությունների կողմից օդանավերի մեկ երրորդի չշահագործվելը «վատ ցուցանիշ չէ» մի ոլորտի համար, որն արդեն հինգերորդ տարին է, ինչ գտնվում է պատժամիջոցների ներքո։ Այնուամենայնիվ, պարբերականի զրուցակիցները կանխատեսում են, որ 2027 թվականից սկսած ավիապարկի մաշվածությունն ու դուրսգրումն է՛լ ավելի կխորանա՝ օդանավերի հնացման և ռեսուրսների սպառման պատճառով, ինչը հատկապես վերաբերում է «SSJ 100» մոդելներին։

Հետևեք մեզ՝ այստեղ