2027 թվականին Հայաստանը Կաննի կինոփառատոնում ներկայանալու է որպես Պատվո երկիր. մանրամասներ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

«Հայ ռեժիսորներ Կաննի 2027» ծրագիրը կմիավորի 4 հայ և 4 արտասահմանցի ռեժիսորների՝ համահեղինակելու և համառեժիսորելու 4 կարճամետրաժ ֆիլմեր, որոնց պրեմիերան կանցկացվի «Քննադատների շաբաթ»-ում՝ Կաննի կինոփառատոնի 2027 թվականի ընթացքում:  Ընտրված կինոգործիչները նաև իրենց լիամետրաժ նախագծերը կներկայացնեն միջազգային ոլորտի մասնագետներին Կաննի 80-րդ կինոփառատոնի ժամանակ:   

Tert.am Life-ի հետ զրույցում Կինոռեժիսորների և կինոպրոդյուսերների գիլդիայի նախագահ Արտեմ Բաղդասարյանը մանրամասներ է պատմել:

-Ներկայացրեք, ի՞նչ պայմանավորվածություններ են ձեռք բերվել Կաննում:

-Կաննում մենք հասանք շատ կարևոր և աննախադեպ պայմանավորվածության. ՀՀ ԿԳՄՍ նախարարության հետ համատեղ մեզ հաջողվեց հաստատել, որ 2027 թվականին Հայաստանը Կաննի կինոփառատոնում ներկայանալու է որպես Պատվո երկիր (Country of Honor)։ Այս կարևորագույն իրադարձության շրջանակներում կիրագործվի «NEXT STEP STUDIO» ծրագիրը, որը կմիավորի 4 հայ և 4 միջազգային երիտասարդ կինոռեժիսորների։ Նրանք համատեղ կստեղծեն և կնկարահանեն 4 կարճամետրաժ ֆիլմեր։ Եվ ամենակարևոր ձեռքբերումն այն է, որ այս ֆիլմերն արդեն իսկ ունեն երաշխավորված ցուցադրություն Կաննի կինոփառատոնի հեղինակավոր Critics’ Week (Քննադատների շաբաթ) ծրագրում։

-Ի՞նչ հնարավորություններ է դա ստեղծում հայ կինոարտադրողների համար:

-Սա ուղիղ կամուրջ է դեպի բարձրագույն միջազգային կինոարդյունաբերություն։ Նախ՝ ծրագիրը և հատկապես միջազգային ռեժիսորների հետ համատեղ աշխատանքը մեր կինոստեղծողներին տալիս է միջազգային ստանդարտներով համատեղ արտադրության (co-production) պրակտիկ փորձ և կապեր։ Երկրորդ և ամենագլխավոր հնարավորությունը՝ ընտրված հայ ռեժիսորները Կաննի կինոփառատոնում ոչ միայն կներկայացնեն իրենց նկարահանած կարճամետրաժները, այլև հնարավորություն կունենան իրենց մշակման փուլում գտնվող լիամետրաժ նախագծերը անձամբ ներկայացնելու (pitching) միջազգային պրոդյուսերներին, դիստրիբյուտորներին և արդյունաբերության այլ առանցքային մասնագետների։ Սա լիամետրաժ ֆիլմերի համար ֆինանսավորում և միջազգային գործընկերներ գտնելու բացառիկ հարթակ է։

-Ինչպե՞ս կարող են կինոարտադրողները դիմել և ինչպե՞ս է կատարվելու ընտրությունը:

-Դիմումների գործընթացը բավականին հստակ է և համապատասխանում է միջազգային չափանիշներին: Կարող են դիմել 25-40 տարեկան, Հայաստանում բնակվող և անգլերենին ազատ տիրապետող այն ռեժիսորները, ովքեր արդեն ունեն առնվազն մեկ ավարտված կարճամետրաժ և առավելագույնը մեկ լիամետրաժ ֆիլմ։ Պարտադիր պայման է, որ դիմորդն ունենա զարգացման փուլում գտնվող լիամետրաժ նախագիծ՝ հաստատված պրոդյուսերի հետ (խաղարկային, վավերագրական, հիբրիդային կամ ադապտացիա):

Դիմորդները պետք է ներկայացնեն մեկ ընդհանուր PDF փաթեթ, որը կներառի մոտիվացիոն նամակ, ռեժիսորի հայտարարություն (Director's statement), սինոփսիս, մինչև 12 էջանոց տրիտմենտ, CV և նախորդ աշխատանքների հղումներ: Ընտրությունը կատարվելու է նախագծի գեղարվեստական արժեքի և ռեժիսորի նախորդ աշխատանքների որակի հիման վրա։

-Ովքե՞ր են լինելու ընտրող հանձնաժողովում:

-Որպեսզի ապահովվի առավելագույն օբյեկտիվություն և կինոարտադրության միջազգային բարձրագույն չափանիշների պահպանում, ընտրության գործընթացն ամբողջությամբ վստահված է Կաննի կինոփառատոնին։ Մասնակիցներին ընտրելու են բացառապես Կաննի Critics’ Week (Քննադատների շաբաթ) ծրագրի միջազգային փորձագետներն ու ընտրող հանձնաժողովի անդամները։

-Ի՞նչ այլ գործունեություն է իրականցնում Հայաստանի կինոռեժիսորների և պրոդյուսերների գիլդիան այս օրերին այդտեղ:

-Կաննում մեր օրակարգը միայն այս ծրագրով չի սահմանափակվում: Այս օրերին Գիլդիան շատ ակտիվ աշխատում է Կաննի կինոշուկայում «Հայկական տուն» (Armenian House) հարթակի զարգացման և ընդլայնման ուղղությամբ, որի հիմքերը դրել ենք դեռ նախորդ տարի։ Մենք հանդիպումներ ենք ունենում միջազգային գործընկերների հետ տարբեր երկրներից, քննարկում ենք հովանավորչական փաթեթներ և նոր համատեղ արտադրության հնարավորություններ՝ նպատակ ունենալով ավելի հաստատուն և ճանաչելի դարձնել հայկական կինոարտադրության ներկայացվածությունը համաշխարհային շուկայում։

-Ի՞նչ այլ հետաքրքիր նորությունների կարող ենք սպասել:

-Մեր առաջիկա ծրագրերը բազմաշերտ են և միտված են ոլորտի արդիականացմանը: Գիլդիան այսօր մեծ ուշադրություն է դարձնում նոր տեխնոլոգիաներին, մասնավորապես՝ կինոարտադրության մեջ արհեստական բանականության գործիքների ինտեգրմանը։

Որպես դրա վառ և մասշտաբային ապացույց՝ այժմ ընթացքի մեջ են «Մաուգլի» ընտանեկան դիտման համար նախատեսված 90 րոպեանոց անիմացիոն ֆիլմի աշխատանքները։ Այս նախագիծը եզակի է նրանով, որ ամբողջությամբ նկարվում է արհեստական բանականության միջոցով և նախատեսված է միջազգային վարձույթի համար։ Պրեմիերան նախատեսում ենք արդեն օգոստոսին։

Բացի այդ, մշակման փուլում է գտնվում Վիլյամ Սարոյանի ստեղծագործությունների հիման վրա նոր, խիստ յուրահատուկ՝ ձևաչափով 10 մասանոց կինոնախագիծը։ Այնպես որ, հայկական կինոն թևակոխում է շատ ակտիվ, նորարարական և գլոբալ ինտեգրման փուլ։

Հետևեք մեզ՝ այստեղ