Ամենատարածված ճանապարհորդական ֆոբիաները

Բացի ավանդական ֆոբիաների տեսակներից՝ վախ փակ տարածություններից, բարձրությունից, սողուններից, մութ սենյակներից, վերելակներից և սարդերից, կան ոչ ավանդական ճանապարահորդական ֆոբիաներ:

Իսկապես այդպես է, որքան էլ որ դրանցից շատերը տարօրինակ կամ զավեշտալի թվան: Դե էլ ինչ ճանապարհորդական ֆոբիա, եթե առաջին հերթին վախ ճանապարհորդությունից չլինի:

Հոդոֆոբիա` վախ ճանապարհորդելուց, ճանապարհներից

Եթե որոշ տեսակի ֆոբիակիրներ վախենում են միայն ճանապարհորդության առանձնահատուկ տեսակներից, ասենք օրինակ` ինքնաթիռով, նավով ուղևորություններից, ապա այս տեսակի ֆոբիայով տառապողները առհասարակ չեն սիրում ճանապարահորդությունը և հետևաբար “like” չեն արել մեր ֆեյսբուքյան էջը…

Ի դեպ, հոդոֆոբիան նաև համարում են վախ երկար ճանապարհներից: Օրինակ՝ աշխարհի ամենաերկար ձգվող ճանապարհը՝ ամերիկյան Ալյասկա նահանգի Դալթոն մայրուղին, մեղմ ասած խուճապ է առաջացնում հոդոֆոբիայով տառապողների մոտ:

Ճանապարհորդական ֆոբիաների տեսակները.

Աէրոֆոբիա՝ վախ օդային տրանսպորտի տեսակներով ուղևորություններից

Լինի դա ինքնաթիռ, ուղղաթիռ, ռազմական կարևորության ուղղաթիռ, թե կործանիչ, այս ճանապարհորդական ֆոբիայի տեսակը համարվում է աշխարհում ամենատարածված ֆոբիաներից մեկը:

Հելիոֆոբիա՝ վախ արևից

Այս ֆոբիայով տառապողները նախընտրում են ճանապարհորդել ձմռան կամ աշնան ամիսներին և իրենց ընտրության վայրն են դարձնում ոչ արևադարձային կամ տապ երկրները:

Էսկալաֆոբիա՝ վախ մետրոների շարժասանդուղքներից

Ամենատարածված ֆոբիաների տեսակներից մեկը սա է. այո՛, իրականում շարժասանդուղքների հանդեպ ոչ բարյացակամ զգացմունքներ է տածում մեր մոլորակի բնակիչների մի ստվար զանգված: Եվ հատկապես իրենց մոտ նման սուր վախի զգացում է առաջացնում մետրոյի շարժասանդուղքը, քանի որ այստեղ այն խառնվում է մեկ այլ ֆոբիայի՝ ակրոֆոբիայի (վախ բարձրությունից) հետ:

Կրիոֆոբիա՝ վախ ծայրահեղ ցրտից

Լապլանդիան, հեռավոր հյուսիսային պետությունները, նորարար սառցե հյուրանոցները և քաղաքները այս ֆոբիայով տառապողների նախընտրելի ցուցակում չեն:

Սա պարզապես քմահաճույք կամ տաք երկրի նախապատվություն չէ, այլ նման ֆոբիայով տառապող մարդիկ իսկապես չեն կարողանում գոյատևել խիստ ցրտաշունչ ձմռան և ծայրահեղ ցրտի պայմաններում:

Ատեֆոբիա՝ վախ ավերակներից

Այս ֆոբիան չես դասի ամենից հաճախ հանդիպող ճանապարհորդական ֆոբիաների թվին, սակայն ամենայուրօրինակներին կարելի է: Ավերակների, հին քաղաքների, փլատակների տեսարանները, ինչպես օրինակ՝ իտալական Պոմպեյ քաղաքը, պարզապես խուճապ ու նյարդային գերլարվածություն են առաջացնում են նման ֆոբիայով տառապողների մոտ:

Լիմնոֆոբիա` վախ լճերից

Լիմնոֆոբիայով տառապողները չեն այցելում լճեր, լճառատ քաղաքներ կամ երկրներ` նախընտրելով սահմանափակվել ոչ խորը լողավազանի այցելությամբ: Խորը և խորհրդավոր լճեր տեսնելիս այս ֆոբիայով տառապողների մոտ առաջանում է խուճապ:

21-րդ դարի ամենաակտուալ ֆոբիան. նոմոֆոբիա՝ վախ հայտնվել առանց բջջային կապի

Եթե շատերի(-ս) համար նոմոֆոբիան կլիներ իսկական փրկություն (բայց նախընտրելի է ամեն դեպքում կարճաժամկետ), ապա 21-րդ դարի թոհուբոհի պայմաններում ռիթմիկ կենսակերպ ունեցող շատ շատերի համար նոմոֆոբիան իսկական հիվանդություն է՝ վախ զրկվել բջջային կապից, հիմնականում ճանապարհորդության ժամանակ:

Նման ֆոբիայով տառապողները, ի դեպ, ցանկացած ճանապարհորդության վայր ընտրելիս, նույնիսկ ջունգլիների մտամոլոր արահետները, տեղեկանում և ձեռք են բերում “երաշխավորագիր” բջջային կապի հասանելիության և անխափան աշխատանքի մասին:

Ի դեպ, գիտնկանները պնդում են, որ այս ֆոբիան ամենից արագ զարգացող տեսակն է, որով արդեն տառապում է մեր մոլորակի բնակչության 66%-ը: Նախանշաններ՝ տրամադրության կտրուկ անկում, ագրեսիվության դրսևորում, նյարդային լարվածություն, անհանդուրժողականություն, խուճապային պահվածք. այս ամենը և ավելին բնորոշ է այն մարդկանց, ովքեր ճանապարհորդության որևէ պահին ակամա հայտնաբերում են, որ բջջային կապն այլևս հասանելի չէ:

Հետաքրքիր փաստ` գոյություն ունի ամենաերկար անուն ունեցող ֆոբիան, որը կրկին կապված է ճանապարհորդության հետ:

Խորը շունչ ենք քաշում և գրում` հիպոպոտոմոնստրոսեսկվիպեդալիոֆոբիա` վախ երկար բառերից: (TRAVELBLOG.am-ը պատասխանատվություն չի կրում այս բառի մեջ վրիպակների համար):

Դե բնական է, նման ֆոբիայով տառապողների համար Թաիլանդի մայրաքաղաք Բանգկոկի իրական անունն ամենևին էլ աչքի լույս չէ: Այն բաղկացած է 32 բառից և գրանցված է Գինեսի համաշխարհային ռեկորդների գրքում որպես քաղաքի ամենաերկար անուն: