Դեկորատիվ տա՞րր, թե՞ գործնական «մանրուք». ինչի՞ համար է նախատեսված կոշիկի կրունկից վեր գտնվող օղակը. «Փաստ»

«Փաստ» օրաթերթը գրում է.

Ժամանակակից մարզական կոշիկների, կեդերի մեծ մասի, ինչպես նաև որոշ այլ տեսակի կոշիկների հետևի մասում՝ կրունկից անմիջապես վերև, լինում է փոքրիկ օղակ՝ լեզվակ։ Շատերն այն համարում են պարզապես դեկորատիվ տարր, և իրապես քչերը գիտեն դրա իրական գործնական նպատակը։ Այդ աննկատելի «մանրուքը», որը հայտնի է որպես heel tab (կրունկային օղակ կամ լեզվակ), կարող է շատ ավելի հեշտացնել այդ կոշիկի տիրոջ կյանքը և նույնիսկ երկարացնել կոշիկի կյանքը։

Կոշիկի կրնկի լեզվակը սկզբնապես ծառայել է որպես ծանր կոշիկներ հագնելու ֆունկցիոնալ միջոց: Առաջին անգամ այն օգտագործվել է ռազմական և աշխատանքային կոշիկներում 20-րդ դարի սկզբին՝ ծանր կամ նեղ կոշիկներ հագնելու գործընթացը պարզեցնելու համար, քանի որ նման կոշիկները դժվար էր հագնել ինքնուրույն։ Հետագայում կոշիկների սպորտային մոդելներն են վերցրել այդ հարմար տարրը, այդ թվում՝ վազքի և բասկետբոլի կոշիկները, քանի որ այդ լեզվակով կոշիկը ավելի հեշտ է արագ փոխել ու առանց կեղտոտվելու տեղավորել ուր պետք է։

Սպորտային կոշիկների հարցում մասնագիտացած փորձագետների բացատրության համաձայն, կրունկային օղակը շատ հարմար տարր է մի քանի կարևոր գործառույթներով։

Նախևառաջ՝ այդ լեզվակը բավականին հեշտացնում է հատկապես մարզական կոշիկները հագնելը։ Դա նրա ամենատարածված և ակնհայտ, թեև հաճախ անտեսվող նպատակն է։ Երբ հագնում եք սպորտային կոշիկներ, հատկապես նեղ կամ բարձրակրունկ սպորտային կոշիկներ, պարզապես բռնեք այդ օղակից։ Այդ պարզ շարժումը թույլ է տալիս հեշտությամբ հագնել կոշիկը առանց կրունկի հատվածը դեֆորմացնելու, տեղաշարժելու կամ վնասելու։ Դա ոչ միայն պարզեցնում է գործընթացը, այլ նաև օգնում է երկարացնել սպորտային կոշիկների կյանքը՝ պահպանելով դրանց ձևը և ամբողջականությունը։

Կայունության ֆունկցիան։ Նրանց համար, ում կոշիկները չափազանց մեծ են կամ բավականաչափ կայուն չեն ոտքի վրա, այդ օղակը կարող է իսկական օգնություն լինել: Նրա միջով կարելի է անցկացնել կոշիկի քուղը՝ ստեղծելով լրացուցիչ ֆիքսում կոճի շուրջ: Դա օգնում է կայունացնել ոտքը, կանխել կոշիկի ներսում անցանկալի շարժումը և ապահովել ավելի լավ հենարան ակտիվ գործունեության ժամանակ։

Տեղափոխման և չորացման հեշտությունը: Փոքր օղակը շատ ավելի է հեշտացնում կեղտոտ կոշիկների տեղափոխումը՝ հատկապես մարզումից կամ զբոսանքից հետո: Բռնելով օղակից՝ կարելի է հեշտությամբ բարձրացնել սպորտային կոշիկը՝ առանց ձեռքերը կեղտոտելու: Ավելին, սպորտային կոշիկը լվանալուց հետո այդ առանձնահատկությունը դառնում է անփոխարինելի. heel tab-ի միջոցով սպորտային կոշիկները կարելի է կախել չորանալու համար՝ ապահովելով օդի ավելի լավ շրջանառություն և արագացնելով չորացման գործընթացը: Դա հատկապես հարմար է, օրինակ՝ ճանապարհորդության կամ լեռնագնացության ժամանակ, երբ անհրաժեշտ է չորացնել կոշիկները դաշտային պայմաններում։

Բացի այս ամենը, որոշ օղակներ ունեն անդրադարձնող տարրեր, որոնք մեծացնում են հետիոտնի տեսանելիությունը մթության մեջ և ապահովում են լրացուցիչ անվտանգություն։

Այսպիսով, սպորտային կոշիկի հետևի մասում գտնվող օղակը ոչ միայն դիզայնի տարր է, այլ նաև լավ մտածված ֆունկցիոնալ «մանրուք»:

ԿԱՄՈ ԽԱՉԻԿՅԱՆ 

Մանրամասները՝ «Փաստ» օրաթերթի այսօրվա համարում