Ե՞րբ և ի՞նչ գույնով պետք է ներկել Զատիկի ձվերը. հոգևորականը մանրամասնում է

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Այս տարի Սուրբ Զատիկը նշվելու է ապրիլի 5-ին։ Հայ ժողովրդի համար սա ոչ միայն տարվա ամենամեծ տոներից մեկն է, այլ նաև խոր հոգևոր սպասման և վերածննդի խորհրդանիշ։

Իսկ  թե ինչպես պետք է ճիշտ պատրաստվել ու նշել Զատիկը,  MediaHub-ը պարզեց՝ զրուցելով Տեր Շահե քահանա Հայրապետյանի հետ։

«Քրիստոնյան պետք է ամբողջ օրերին աղոթքի մեջ լիներ, հաճախեր եկեղեցի, որպեսզի իմաստավորվեր հավկիթի ներկումը, որը խորհրդանշում է Քրիստոսի արյունը, որը թափվեց և փրկեց ամբողջ  տիեզերքը։ Մեր հայրերն ու հատկապես Գրիգոր Տաթևացին  իր «Քարոզգրքում» նշում է, որ ձուն ինքը տիեզերքն է. միջի սպիտակ զանգվածը մթնոլորտն է, իսկ մեջտեղի դեղինը՝ երկիրը։ Այսինքն՝ Քրիստոսը ոչ միայն մարդուն, այլ նաև ամբողջ տիեզերքին սատանայի իշխանությունից ազատություն պարգևեց»,- նշեց  Տեր Շահեն։

Մշակութաբաններն ու հոգևորականները նշում են, որ ավանդաբար Զատիկին հավկիթները ներկվում են  կարմիր, իսկ ի՞նչ խորհուրդ ունի այն։

«Կարմիր ներկված հավկիթը խորհրդանշում է Քրիստոսի արյունը, որը թափվեց մարդկության և ողջ տիեզերքի փրկության համար»,- ասաց Տեր Շահե քահանան։

Քահանայի խոսքով՝ տոնի սեղանի պարունակությունը հիմնականում ժողովրդական է, բայց դա էլ մեծ խորհուրդ ունի։ «Սովորաբար քրիստոնյան սեղանին դնում է չամիչով փլավ, որը խորհրդանշում է հավատացյալներին, որոնք քաղցրություն են տալիս աշխարհին, սպիտակը ամբողջ մարդիկ են։ Հաջորդը ձուկն է, որովհետև մարդիկ ծոմ պահած վիճակում էին գնացել եկեղեցի, և հիմա թեթև կերակուրով պետք է մտնեն ուտիքի մեջ, և իհարկե, դրվում է խաշած հավկիթը»,- ներկայացրեց հոգևոր հայրը։

Միմյանց հետ ձվերը «կռվեցնելու» ավանդույթը նույնպես ժողովրդական, բայց սիրված սովորույթ է, որն արտահայտում է ուրախություն և միասնականություն։

Նշենք, որ ձուն ներկում են շաբաթ երեկոյան` մայրամուտից հետո։

Շատ հոգևորականներ նշում են, որ հասարակությունը Զատիկը հաճախ դիտարկում է միայն որպես տոնական առիթ՝ առանց այն հոգևոր խորությամբ հասկանալու։ Այս առումով ի՞նչ քայլեր է անում եկեղեցին, որ հասարակությունը Սուրբ Զատիկը պարզապես տոն չդիտարկի։ 

«Մեր «հզոր» պետությունն իր գործը կատարեց և եկեղեցու պատմության դասագիրքը վերացրեց, դրա համար քահանան ի՞նչ պետք է անի. ինքը իրենից մի հազար հատ կլոն հանի, գնա ամեն մեկին հուշի, թե ինչ պետք է արվի Զատիկի ժամանա՞կ, մեր հասարակությանը արդեն  գաղափարապես հետ են տարել»,- եզրափակեց խոսքը տեր Շահե քահանան։

Ալիտա Եղիազարյան

Հետևեք մեզ՝ այստեղ