Թրամփն ու Զելենսկին Ֆլորիդայի հանդիպմանը կբախվեն լուրջ տարաձայնությունների կարևորագույն հարցերի շուրջ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Ուկրաինայի նախագահ Վլադիմիր Զելենսկին և ԱՄՆ նախագահ Դոնալդ Թրամփը կիրակի կհանդիպեն Ֆլորիդայում՝ Ուկրաինայում պատերազմի դադարեցման ծրագիրը մշակելու համար։ Նրանք բախվելու են լուրջ տարաձայնությունների՝ կապված կարևորագույն հարցերի և ռուսաստանյան օդային հարձակումների հետ, հայտնում է Reuters-ը։։

Զելենսկին լրագրողներին հայտնել է, որ Թրամփի Ֆլորիդայի նստավայրում կայանալիք հանդիպման ժամանակ նախատեսում է քննարկել Ուկրաինայի արևելքում գտնվող վիճելի Դոնբասի տարածաշրջանի ճակատագիրը, Զապորոժիեի ատոմակայանի ապագան և այլ թեմաներ։ Ըստ Ուկրաինայի փոխարտգործնախարար Սերգեյ Կիսլիցայի, Ուկրաինայի նախագահն ու նրա պատվիրակությունը Ֆլորիդա են ժամանել շաբաթ ուշ երեկոյան։

Մոսկվան բազմիցս պնդել է, որ Ուկրաինան զիջի ամբողջ Դոնբասը, նույնիսկ այն շրջանները, որոնք դեռ գտնվում են Կիևի վերահսկողության տակ։ Ռուսաստանցի պաշտոնյաները դեմ են արտահայտվել վերջին առաջարկի մյուս կետերին, ինչը կասկածի տակ է դնում՝ արդյոք Ռուսաստանի նախագահ Վլադիմիր Պուտինը կհամաձայնի կիրակնօրյա բանակցությունների արդյունքներին։

Ուկրաինայի նախագահը Axios պարբերականին ուրբաթ հայտնել է, որ դեռ հույս ունի մեղմացնել Դոնբասից ուկրաինական զորքերի ամբողջական դուրսբերման մասին ԱՄՆ առաջարկը։ Հակառակ դեպքում, ըստ Զելենսկու, շաբաթներ տևած բանակցությունների արդյունք հանդիսացող 20 կետից բաղկացած ամբողջ ծրագիրը պետք է դրվի հանրաքվեի։ Ըստ Axios-ի, ԱՄՆ պաշտոնյաները հանրաքվե անցկացնելու Զելենսկու պատրաստակամությունը դիտարկել են որպես կարևոր քայլ առաջ և նշան, որ նա այլևս չի բացառում տարածքային զիջումները։ Այդուհանդերձ, նա նշել է, որ Ռուսաստանը պետք է համաձայնի 60-օրյա հրադադարի, որպեսզի Ուկրաինան կարողանա պատրաստվել և անցկացնել այդ քվեարկությունը։

Հասարակական կարծիքի վերջին հարցումը ցույց է տալիս, որ ուկրաինացի ընտրողները նույնպես կարող են մերժել այդ ծրագիրը։ Վաշինգտոնի ժամանակով 13։00-ին նախատեսված Զելենսկիի և Թրամփի առանձնազրույցը տեղի կունենա շաբաթներ տևած դիվանագիտական ջանքերից հետո։

Եվրոպացի դաշնակիցներն ակտիվացրել են ջանքերը՝ ուրվագծելու Կիևի անվտանգության հետպատերազմյան երաշխիքները, որոնք կստանան Միացյալ Նահանգների աջակցությունը։ Կիևն ու Վաշինգտոնը շատ հարցերում համաձայնության են եկել, և Զելենսկին ուրբաթ հայտարարել է, որ 20 կետից բաղկացած ծրագիրը կատարված է 90%-ով։ Սակայն այն հարցը, թե որ տարածքները կփոխանցվեն Ռուսաստանին, մնում է չլուծված։

Մինչ Մոսկվան պնդում է ստանալ ամբողջ Դոնբասը, Կիևը ցանկանում է, որ քարտեզը սառեցվի մարտական գործողությունների ներկայիս գծերով։ Միացյալ Նահանգները, ձգտելով փոխզիջման, առաջարկել է ստեղծել ազատ տնտեսական գոտի, եթե Ուկրաինան հեռանա այդ տարածաշրջանից, թեև պարզ չէ, թե ինչպես է այդ գոտին գործելու գործնականում։

Զելենսկին և նրա եվրոպացի դաշնակիցները մտահոգություն ունեն, որ Թրամփը կարող է «վաճառել» Ուկրաինան և եվրոպական տերություններին ստիպել վճարել ավերված երկրին աջակցելու հաշիվները։ Սա տեղի է ունենում այն ֆոնին, երբ 2025 թվականին ռուսաստանյան զորքերը օրական գրավում էին 12-ից 17 քառակուսի կիլոմետր տարածք։

Ռուսաստանը վերահսկում է ամբողջ Ղրիմը, որը բռնակցել է 2014 թվականին։ Ուկրաինա ներխուժելուց գրեթե չորս տարի անց Մոսկվան վերահսկողություն է հաստատել երկրի տարածքի մոտ 12%-ի վրա, ներառյալ Դոնբասի մոտ 90%-ը, Զապորոժիեի և Խերսոնի մարզերի 75%-ը, ինչպես նաև Խարկովի, Սումիի, Նիկոլայևի և Դնեպրոպետրովսկի մարզերի առանձին շրջաններ, տեղեկացնում է լրատվամիջոցը։

Հետևեք մեզ՝ այստեղ