Հայաստանը Հնդկաստանի առանցքային գործընկերն է տարածաշրջանում. հնդիկ վերլուծաբաններ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Հնդկաստանը Հայաստանը դիտարկում է որպես Հարավային Կովկասում իր առանցքային գործընկեր: Այս մասին Նյու Դելիում միջազգային, այդ թվում հայկական լրատվամիջոցների՝ NEWS.am-ի, Armenpress-ի և CivilNet-ի հետ հանդիպմանը նշել են Հնդկաստանի առաջատար վերլուծական կենտրոնի՝ Դիտորդական հետազոտական հիմնադրամի հետազոտողները (Observer Research Foundation, ORF): Նրանք ընդգծել են, որ Հնդկաստանի ներկայությունը Եվրասիայում հետզհետե խորանում է, աճում է հետաքրքրությունը տարածաշրջանային հաղորդակցությունների, երկկողմ համագործակցությունների նկատմամբ։

Հայաստանի հետ հարաբերությունները՝ առաջնահերթություն Հնդկաստանի համար

Հայաստանը Հնդկաստանի համար հետզհետե ավելի առանցքային և հուսալի գործընկեր է դառնում, նշում են հետազոտական հիմնադրամի վերլուծաբանները:

Կենտրոնի վերլուծաբան Ալեքսեյ Զախարովի խոսքով՝ Հնդկաստանը առաջնահերթություն է տալիս Հայաստանի հետ իր հարաբերություններին ամրապնդելով ոչ միայն քաղաքական ու տնտեսական, այլեւ  պաշտպանական կապերը:

«Հայաստան-Հնդկաստան հարաբերությունները զգալիորեն բարելավվել են հատկապես պաշտպանության ոլորտում: Հնդկաստանը առաջնահերթ ուշադրություն է դարձնում տարածաշրջանում Հայաստանի հետ հարաբերություններին: Այժմ շատ քննարկումներ են ընթանում մարդկանց միջև կապերի բարելավման շուրջ՝ երկու երկրների միջև ավելի անմիջական կապեր հաստատելու միջոցով»,- նշել է նա՝ հավելելով, որ Հնդկաստանը շահագրգռված է նաև Վրաստանի հետ համագործակցության խորացմամբ։

Վերլուծաբան Ռաջոլի Սիդհարթ Ջայապրակաշը Հայաստանը բնութագրում է որպես Հնդկաստանի ռազմավարական գործընկեր՝ ընդգծելով Նյու Դելիի վստահությունը հարաբերությունների կայունության և հուսալիության հարցում:

«Մենք, իհարկե, հասկանում ենք, որ Հայաստանը Հնդկաստանի ռազմավարական գործընկերն է, և որ Հնդկաստանն ու Հայաստանը միմյանց շահերի դեմ ոչինչ չեն անի»,- նշել է նա:

Թուրքիա–Ադրբեջան–Պակիստան համագործակցությունը մտահոգում է Հնդկաստանին

Թուրքիայի, Ադրբեջանի և Պակիստանի միջև զարգացող ռազմական ու քաղաքական համագործակցության ֆոնին Հայաստանը դառնում է Հնդաստանի համար էլ ավելի կարևոր գործընկեր, ընդգծում են հնդիկ հետազոտողները։

Թուրքիա–Ադրբեջան–Պակիստան եռակողմ համագործակցության մասին խոսելով՝ ORF–ի ռազմավարական խորհրդատու Աջայ Բիսարիան նշեց, որ Հնդաստանը, Եվրասիայում վարվող քաղաքականության շրջանակում ակտիվ երկխոսության մեջ լինելով ինչպես Ադրբեջանի, այնպես էլ Հայաստանի հետ, միևնույն ժամանակ լուրջ անվտանգության մտահոգություններ ունի այդ դաշինքի առնչությամբ:

«Վերջին Հնդկաստան-Պակիստան հակամարտության ընթացքում մենք նկատեցինք թուրքական անօդաչուների լայն կիրառություն։ Այդ հարցը մենք քննարկել ենք Թուրքիայի հետ։ Դա մի քանի առումներով վտանգում է հարաբերությունները» - ասաց նա։

Վերլուծաբան Ալեքսեյ Զախարովն իր հերթին ընդգծեց, որ այդ եռակողմ համագործակցությունը Հնդաստանի համար ակնհայտ ռազմավարական մարտահրավերներ է ստեղծում։

Չնայած մտահոգություններին՝ հնդիկ հետազոտողները նշում են, որ Նյու Դելին շարունակում է պահպանել տնտեսական հարաբերությունները թե՛ Թուրքիայի, թե՛ Ադրբեջանի հետ։

«Ադրբեջանի հետ դեռ կան մի շարք էներգետիկ նախագծեր, , իսկ Թուրքիայի հետ տնտեսական համագործակցությունը բավական ամուր է»,- նշեց Զախարովը:

Հնդաստանը Հայաստանը տեսնում է Հյուսիս-Հարավ տրասպորտային միջանցքի մասնակից

Հնդկաստանը կարևորում է Հայաստանի դերը որպես Հյուսիս–Հարավ միջազգային տրանսպորտային միջանցքի (INSTC) մաս՝ նշում են հնդիկ վերլուծաբանները: Մինչ այդ միջանցքի ծրագրում այժմ ակտիվ ներգրավվածություն ունի Ադրբեջանը, հնդիկ վերլուծաբանների խոսքով՝ Հնդկաստանը շահագրգռված է այդ նախագծին Հայաստանի մասնակցությամբ: 

«Հիմնական երկաթուղային գիծը անցնում է Իրանի տարածքով, այնուհետև՝ Ադրբեջանի: Այժմ տրանսպորտային միջանցքի համար դիտարկվում են նաեւ այնպիսի ուղիներ, որոնք չեն անցնում Ադրբեջանի տարածքով: Այդ տեսակյունից Հայաստանի և Իրանի միջև ընդլայնվող հաղորդակցություններից Հնդկաստանը կարող է օգտվել»,- նշեց վերլուծաբան Ալեքսեյ Զախարովը:

Նրա խոսքով՝ անգամ INSTC-ի պաշտոնական շրջանակներից դուրս Հնդկաստանը հետաքրքրված է Հայաստանի հետ հաղորդակցության բարելավմամբ և այնպիսի գործնական երթուղիների ստեղծմամբ, որոնք կուժեղացնեն կապը երկու երկրների միջև։

Հայաստան–Ադրբեջան գործընթացները՝ զգուշավոր լավատեսության հիմք

Հայաստան–Ադրբեջան խաղաղության գործընթացի վերջին զարգացումների նկատմամբ հնդկական կողմը դրական, բայց զգուշավոր վերաբերմունք ունի:

Հնդիկ վերլուծաբանները, թեեւ նշում են, որ ներկա, հարաբերականորեն հանգիստ իրավիճակը համագործակցությունների հնարավորություններ է բացում, բայց եւ զգուշավոր են գնահատականներ հնչեցնելիս:

«Թեեւ Հայաստանի և Ադրբեջանի, ինչպես նաև Հայաստանի և Թուրքիայի հարաբերություններում որոշակի առաջընթաց կա, դրանք արմատապես չեն բարելավվել, քանի որ ռազմավարական շահերի համընկնում չկա»,- նշեց Ռաջոլի Սիդհարթ Ջայապրակաշը:

Նա հավելեց, որ Հնդաստանը ողջունում է խաղաղությանն ուղղված ցանկացած քայլ, սակայն շարունակում է ուշադիր հետևել զարգացումներին։

Հնդիկ հետազոտողները ընդգծեցին, որ Հայաստանի և Ադրբեջանի միջև ավելի կանխատեսելի միջավայրը կնպաստի տարածաշրջանային հաղորդակցությունների ընդլայնմանը և Հնդաստան–Հայաստան համագործակցության խորացմանը։,

Գայանե Ալեքսանյան, Նյու Դելի

Հետևեք մեզ՝ այստեղ