Տեղի է ունեցել հայ մեծ բանաստեղծ և հասարակական գործիչ Վահան Տերյանի 140–ամյակին նվիրված գիտաժողով

КУЛЬТУРА 5 Ноябрь, 2025 19:25

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ԿԳՄՍ նախարարության աջակցությամբ և ԳԱԱ Մանուկ Աբեղյանի անվան Գրականության ինստիտուտի և «Ջավախք» հայրենակցական բարեգործական հասարակական կազմակերպության նախաձեռնությամբ կազմակերպվել է հայ մեծ բանաստեղծ և հասարակական գործիչ Վահան Տերյանի 140–ամյակին նվիրված գիտաժողով:

Բացման խոսքով հանդես են եկել ԿԳՄՍ նախարարի տեղակալ Ալֆրեդ Քոչարյանը, ԱԺ պատգամավոր, «Ջավախք» հայրենակցական բարեգործական կազմակերպության նախագահ Շիրակ Թորոսյանը, բանասիրական գիտությունների թեկնածու, Վահան Տերյանի ընտանիքի ներկայացուցիչ Գևորգ Էմին-Տերյանը:

Նախարարի տեղակալ Ալֆրեդ Քոչարյանի նշմամբ՝ գիտաժողովի անցկացումը հնարավորություն է նորովի գնահատելու Տերյանի դերը հայ գրականության և մշակույթի զարգացման գործում։

«Վահան Տերյանը մեր մշակութային պատմության այն անհատականություններից է, որի գրական ժառանգությունն ունի ոչ միայն գեղագիտական, այլև գաղափարական արժեք։ Այս գիտաժողովը վկայում է Վահան Տերյանի ժառանգության գիտական ուսումնասիրության շարունակականության և արդիականության մասին: Վահան Տերյանի 140-ամյակի միջոցառումների շրջանակում այս տարի վերաբացվել է բանաստեղծի վերակառուցված և նորացված տուն-թանգարանը նրա ծննդավայրում՝ Ջավախքի Գանձա գյուղում: Բացման արարողությանը մասնակցել են Վրաստանի և Հայաստանի պատվիրակությունները՝ երկու երկրների նախարարների գլխավորությամբ: Այդ առիթով հատուկ շնորհակալություն ենք հայտնում Վրաստանի մշակույթի նախարարությանը, «Ջավախքին աջակցություն» հիմնադրամին, «Ջավախք» հայրենասիրական բարեգործական հասարակական կազմակերպությանը և այն բոլոր բարերարներին, որոնք իրենց ներդրումն են ունեցել տուն-թանգարանի վերակառուցման և վերաբացման գործում: ԿԳՄՍ նախարարության ֆինանսական աջակցությամբ իրականացվել է «Վահան Տերյանի ինտերակտիվ տուն-թանգարան» ծրագիրը: Այդ համատեքստում ստեղծվել է Վ. Տերյանի կերպարի 3D եռաչափ մոդելը, որը հասանելի է այցելուներին հայերեն, անգլերեն և վրացերեն: Միևնույն ժամանակ, նախարարության կողմից ֆինանսական աջակցություն է տրամադրվել թանգարանի կայքի ստեղծման և «Տերյանական օրեր» ամենամյա միջոցառման կազմակերպման համար»,- ասել է նախարարի տեղակալը և հավելել՝ Տերյանի ստեղծագործական ժառանգությունը խորհրդանշական կամուրջ է երկու երկրների մշակութային և կրթական համագործակցության զարգացման և ամրապնդման համար։

Ալֆրեդ Քոչարյանի նշմամբ՝ ԿԳՄՍ նախարարությունը շարունակելու է աջակցել այն նախաձեռնություններին, որոնք նպաստում են հայ մեծ բանաստեղծի գրական ժառանգության ուսումնասիրմանը և հանրահռչակմանը: Նա շնորհակալություն է հայտնել գիտաժողովի կազմակերպիչներին և մասնակիցներին մաղթել արդյունավետ աշխատանք։

Գևորգ Էմին-Տերյանը և Շիրակ Թորոսյանն ընդգծել են Վահան Տերյանի 140–ամյակին նվիրված գիտաժողովի անցկացման կարևորությունը՝ նշելով, որ այն ընդգրկում է մեծ բանաստեղծի գործունեության ամբողջ շրջանակը:

Հետևեք մեզ՝ այստեղ