Հայաստանյան 4 թանգարան ներկայացրին յուրահատուկ նախաձեռնություններ Երևանի նորաձևության շաբաթվա շրջանակում

ОБЩЕСТВО 31 Октябрь, 2025 23:35

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երևանի նորաձևության շաբաթվա շրջանակում Հայաստանի չորս թանգարանները միավորվեցին՝ ներկայացնելու արվեստի, նորաձևության և մշակութային ժառանգության միաձուլման բացառիկ նախաձեռնություններ։ «Կերպի ձևը» ընդհանուր թեմայի ներքո յուրաքանչյուր թանգարան հանդես եկավ ինքնատիպ ցուցադրությամբ՝ բացահայտելով նորաձևության և կերպարվեստի, ավանդույթի և նորարարության փոխկապակցվածությունը։
Ցուցահանդեսները նախաձեռնել էին ՀՀ ԿԳՄՍ նախարարությունը, Հայաստանի նորաձևության և հագուստի պալատը, Մշակույթի զարգացման հիմնադրամը։

Առաջին անգամ Հայաստանի ազգային պատկերասրահում ներկայացվեցին հայ դիզայներների հագուստներ, որոնք ստեղծվել էին թանգարանի մշտական
ցուցադրության գործերից ոգեշնչվելով։ Քսանհինգ հայ դիզայներներ ներկայացրին հագուստներ, որոնց հիմքում ընկած էին ինչպես հայ, այնպես էլ համաշխարհային արվեստի տարբեր դարաշրջանների վարպետների ստեղծագործությունները։

Դիզայներները ոգեշնչվել էին Վարդգես Սուրենյանցի, Հովհաննես Այվազովսկու, Գարզուի, Ժանսեմի, Մարտիրոս Սարյանի, Հակոբ Հովնաթանյանի և այլոց աշխատանքներից՝ ստեղծելով ժամանակակից ձևերի մեջ արտահայտված արվեստ։

Ռուսական արվեստի թանգարանում բացվեց ցուցահանդես, որը ներկայացրեց նորաձևության երկակի բնույթը։ Ցուցադրությունը համադրեց ռուս հայտնի նկարիչ Արթուր Ֆոնվիզինի (1882–1973) «Կնյազևսկայա Տատյանա Բորիսովնայի դիմանկարը» ջրաներկ աշխատանքը (երկկողմանի՝ հակառակ կողմում նատյուրմորտով) և Moment of White բրենդի զգեստների հավաքածուն։

Այս եզակի համադրությունը ցույց տվեց կերպարվեստի և ժամանակակից նորաձևության փոխազդեցությունը՝ ընդգծելով դրանց միջև եղած լարվածությունն ու ներդաշնակությունը։

Սերգեյ Փարաջանովի անվան թանգարանը ներկայացրեց ցուցահանդես, որը միավորեց 20-րդ դարի հայկական արվեստը և ժամանակակից նորաձևությունը։ Անցյալ տարվա հաջողված նախաձեռնությունից ոգեշնչված՝ այս տարի էլ այցելուները հնարավորություն ստացան տեսնելու նոր ձևով վերաիմաստավորված Փարաջանովյան աշխարհը։

Հայ դիզայներներ Վահան Խաչատրյանը և Մանե Մելիքյանը ներկայացրին իրենց աշխատանքները՝ ստեղծված Փարաջանովի արվեստից և գեղագիտական մոտեցումներից
ներշնչված։ Ցուցադրությունը վերածեց թանգարանը նորաձևության և արվեստի ստեղծագործական երկխոսության հարթակի։

Հովհաննես Շարամբեյանի անվան ժողովրդական արվեստների թանգարանի ցուցադրությունը միավորեց ավանդականը և ժամանակակիցը, բացահայտելով հայկական ստեղծագործական միտքի շարունակականությունը։ Թանգարանի հարուստ հավաքածուից ընտրված նմուշները՝ ժանեկագործություն, ասեղնագործություն, մաքրամե, կանացի տարազներ, ինչպես նաև արծաթի զարդարվեստ՝ զուգաթելի և հատիկի տեխնիկաներով, ներկայացրին հայ վարպետների նրբաճաշակությունն ու արհեստավարժությունը։
Ավանդական արվեստին զուգահեռ ցուցադրվեցին ժամանակակից մոտեցումներ՝ TUMO ստուդիաների ուսանողների Hand by hand-ի կողմից ստեղծված հսկայական
ձեռագործ աշխատանքները և LOOM WEAVING բրենդի զգեստները, որոնք խորհրդանշեցին նոր սերնդի ջանքերը՝ վերաիմաստավորելու հայկական գործվածքի ավանդույթները։
«Կամրջելով անցյալը և ներկանը» հիշեցրեց, որ մշակույթը կենդանի է այնքան ժամանակ, որքան այն զարգանում է՝ պահպանելով արմատները և ներշնչելով նորարարությանը։
Ցուցադրությունները թանգարաններում շարունակվում են։

Հետևեք մեզ՝ այստեղ