Այս միջադեպերի դեմը պետք է առնվի. Սլավիկ Ղազարյանը՝ ծեծված մրցավարի մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

MediaHub-ը գրել էր, որ Մանկապատանեկան ֆուտբոլի առաջնության ժամանակ, ավելի հստակ՝  «Անի 2014» - «Աբովյան 2014» խաղի ժամանակ, ըստ մեր զրուցակցի՝ Անի ակումբի անվտանգության աշխատակիցները և ակումբի մարզիչը ծեծել են մրցավար Արմեն Խաչատրյանին: 

Այս պատմության շարունակությունն էլ մեզ հասանելի է դարձել: Ըստ այդմ, MediaHub-ը տեղեկացավ, որ որոշում է կայացվել և այսուհետ ՀՖՖ Մանկապատանեկան ֆուտբոլի մրցումների 2025-2026 մրցաշրջանի Մ-8, Մ-9, Մ-10, Մ-11 և Մ-12 տարիքային խմբերի առաջնությունների (որտեղ հաշիվ և գոլեր չեն արձանագրվում) և ՀՖՖ աղջիկների մանկապատանեկան ֆուտբոլի Մ-11 և Մ-13 հանդիպումներին ՀՖՖ մրցավարական և տեսչական բաժինն այլևս չի նշանակի սպասարկող անձնակազմ: Խաղերը կսպասարկվեն տվյալ խաղի դաշտի տեր ակումբի ներկայացուցիչների (մարզիչներ, ֆուտբոլիստներ) կողմից: 

Արդյո՞ք մրցավարների մրցումներին չմասնակցելը կապ ունի միջադեպի՝ ավելի կոնկրետ, մրցավարին ծեծի ենթարկելու հետ. MediaHub-ը զրուցեց ՀՖՖ մրցավարական կոմիտեի նախագահ Սլավիկ Ղազարյանի հետ:

-Պարոն Ղազարյան, MediaHub-ը նոր որոշման մասին է տեղեկացել, արդյո՞ք Մանկապատանեկան ֆուտբոլի մրցումներին ՀՖՖ մրցավարական և տեսչական բաժինն այլևս չի մասնակցի, արդյո՞ք սա կապ ունի Մանկապատանեկան ֆուտբոլի առաջնության ժամանակ մրցավարին ծեծի ենթարկելու միջադեպի հետ:

-Ոչ, դա դրա հետ ընդհանրապես կապ չունի, կապված է նրա հետ, որ խաղերը շատ-շատ են այս տարի, բացի այդ Մ-8-ից միչև Մ-12-ը առանց միավորների, առանց գնդակ հաշվելու խաղեր են: Այդ տարիքի խաղերի ժամանակ միավոր ու առաջնություն չկա, ուղղակի իրար հետ խաղում են, ամբողջ աշխարհում էլ այդպես է: Օրինակ, եթե ակադեմիայի երեխաները դատում են իրենց խաղերը, շատ հնարավոր է, հետագայում իրենցից ընտրենք, ապագայում մրցավար դառնան:

-Արդյո՞ք հետքայլ չի սա հայկական ֆուտբոլում, ամեն դեպքում, անգամ մանկապատանեկան խաղերի ժամանակ, երբ մրցավարներ էին լինում, ավելի պրոֆեսիոնալ էին խաղերը:

-Չէ, այդպես չի, ախր դա վերաբերվում է միայն 8-ից 12 տարեկաններին, բայց 13, 14, 15, 16, 17, 18 տարեկանների խաղերը ՀՖՖ մրցավարական և տեսչական բաժինը սպասարկելու է, անգամ 3 մրացավարով: 

-Մրցավարին ծեծելուց հետո արդյո՞ք մրցավարները Ձեզ չեն բողոքել, չեն դժգոհել, վստահո՞ւմ են ՀՖՖ-ին:

-Միջադեպ էր եղել, միջադեպի հետ կապված ՀՖՖ կարգապահական և էթիկայի կոմիտեն քննում է գործը, և այսօր պետք է քննարկվի, պետք է սպասենք իրենց որոշման: 

-Իսկ ինչ-որ խնդիրներ եղե՞լ են միջադեպից տուժած մրցավարի հետ, բողոքներ եղե՞լ են:

-Նա իմ լավագույն մրցավարներից է: Ղազարյան Սլավիկը այն մարդը չի, որ իր մրցավարներից մեկին բան ասեն, ծեծեն կամ հայհոյեն, իսկ Ղազարյան Սլավիկը հանգիստ քնի: Այս պահին սպասում ենք որոշմանը, պետք է արդար որոշում կայացվի, անկախ կոմիտե է, ոչ մեկս չի խառնվում, սպասենք:

-Խոսե՞լ եք միջադեպում ներգրավված մրցավարի հետ, ի՞նչ է ասել, ո՞վ է մեղավոր:

-Իսկ ի՞նչ եք կարծում՝ խոսե՞լ եմ, եթե մրցավարների մազին որևէ մեկը կպնում է, առաջինը մրցավարի հետ ե՛ս եմ խոսում: Այսօր կքննարկվի կոմիտեում, ես սպասում եմ կոմիտեի որոշմանը: 100% իդեալական մրցավարություն աշխարհում չկա, իմ մրցավարները եթե սխալ են անում, մենք նայում ենք ամեն ինչը, պատժում եմ, բայց դա չի նշանակում, որ սխալի դեպքում պետք է իրենց ծեծել, հայհոյել և այլն: Այս միջադեպերի դեմը պետք է առնվի, կարգ ու կանոնով արդար պետք է իրականացվի:

Մարիաննա Արամյան

Հետևեք մեզ՝ այստեղ