«Երաժշտություն հանուն ապագայի» հիմնադրամի կրթաթոշակառուները մասնակցում են «Մոսկվան դիմավորում է ընկերներին» XXII միջազգային փառատոնին

КУЛЬТУРА 4 Октябрь, 2025 14:24

Հոկտեմբերի 1-ից 10-ը կանցկացվի «Մոսկվան դիմավորում է ընկերներին» միջազգային փառատոնը։ Այն համարվում է Վլադիմիր Սպիվակովի միջազգային բարեգործական հիմնադրամի ամենամասշտաբային նախագիծը։ Վլադիմիր Սպիվակովն արդեն երկու տասնամյակից ավելի է, ինչ Մոսկվայում միավորում է հազարավոր տաղանդավոր երաժիշտների աշխարհի տարբեր անկյուններից։

«Երաժշտություն հանուն ապագայի» հիմնադրամի պատանի երաժիշտներն արդեն երրորդ անգամ են մասնակցում Վլ․ Սպիվակովի «Մոսկվան դիմավորում է ընկերներին» միջազգային փառատոնին։ Փառատոնների շրջանակներում հիմնադրամի կրթաթոշակառուները հանդես են գալիս Մոսկվայի լավագույն համերգասրահներում՝ Ռախմանինովի, «Большой театр»-ի, «Дом музыки»-ի համերգասրահներ։ Սա արդեն ավանդույթ կարելի է համարել միջազգային փառատոնի շրջանակներում։

Մոսկվայում համերգային ելույթներ կունենան․

դաշնակահար Էդգար Մխիթարյանը (Մոսկվայի Պ. Ի. Չայկովսկու անվան պետական կոնսերվատորիա, Ս․ Ռախմանինովի համերգասրահ, ելույթը՝ հոկտեմբերի 4-ին ժամը 14։00-ին),

դաշնակահարուհի Էլեն Խաչիկյանը (Զուրաբ Ծերեթելիի արվեստի պատկերասրահ, ելույթը՝ հոկտեմբերի 5-ին ժամը 15։00-ին),

ֆլեյտահար Ալեք Սահակյանը (Զուրաբ Ծերեթելիի արվեստի պատկերասրահ, ելույթը՝ հոկտեմբերի 5-ին ժամը 15։00-ին),

ջութակահարուհի Մարիամ Սմբատյանը (Ամենասուրբ Կույս Մարիամի հռոմեակաթոլիկ տաճար, ելույթը՝ հոկտեմբերի 6-ին ժամը 15։00-ին),

շեփորահար Արտյոմ Ավետիսյանը (Ամենասուրբ Կույս Մարիամի հռոմեակաթոլիկ տաճար, ելույթը՝ հոկտեմբերի 6-ին ժամը 15։00-ին)։

Առցանց համերգային ելույթներ կունենան․

դաշնակահարուհի Արաքս Աշճյանը (ելույթը՝ հոկտեմբերի 3-ին ժամը 14։00-ին)

սաքսոֆոնահար Դավիթ Հակոբյանը (ելույթը՝ հոկտեմբերի 8-ին ժամը 18։00-ին),

դաշնակահար Մարկ Մինասյանը (ելույթը՝ հոկտեմբերի 8-ին ժամը 18։00-ին),

ջութակահարուհի Արփի Արաբյանը (ելույթը՝ հոկտեմբերի 9-ին ժամը 15։00-ին),

ջութակահարուհի Անահիտ Խիզանցյանը (ելույթը՝ հոկտեմբերի 9-ին ժամը 15։00-ին),

դաշնակահարուհի Մարի Դանիելյանը (ելույթը՝ հոկտեմբերի 9-ին ժամը 15։00-ին)։

«Երաժշտություն հանուն ապագայի» հիմնադրամը և Վլադիմիր Սպիվակովի միջազգային բարեգործական հիմնադրամը երկար տարիներ է, ինչ սերտ համագործակցում և կյանքի են կոչում բազմաթիվ ծրագրեր։ Հայ պատանի երաժիշտները մասնակցել են Սպիվակովի միջազգային բարեգործական հիմնադրամի կազմակերպած տարբեր միջոցառումների։ Այս տարի ապրիլի 30-ին «Հնչեղ ապագա» խորագրի ներքո Երևանում տեղի ունեցավ երկու հիմնադրամների կրթաթոշակառուների hամատեղ համերգը։