«Սպասում են՝ մեռցնեն երեխուս, տան ձեռնե՞րս»․ առողջական խնդիրներով նորակոչիկը շարունակում է մնալ հոսպիտալում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Առողջական խնդիրներով բանակ զորակոչված 18-ամյա Ավետիք Մաթևոսյանի ընտանիքն ահազանգում է, որ նրա վիճակը օրեցօր վատանում է զինվորական հոսպիտալում։ 

«Դողը և էպիլեպտիկ նոպաները չեն անցնում։ Ամեն օր վիճակն ավելի վատանում է։  Շնչառությունը չի հերիքում, ընկնում է գետնին, անգիտակից է դառնում։ Արդեն անգամ ձայներ է լսում», – NEWS.am-ի հետ զրույցում պատմեց Ավետիքի մայրը՝ նշելով, որ որդու մոտ դեռ մինչեւ բանակ զորակոչվելը նոր սկսվող էպիլեպսիա է ախտորոշվել եւ մի շարք այլ առողջական խնդիրներ․ «Մանկուց առողջական խնդիրներ ունի, աչքերի հետ խնդիրներ ունի, սրտի առիթմիա, սիրտը՝ օվալաձև ծակ է»։

Ինչպես է ստացվել, որ առողջական նման խնդիրներով՝ Ավետիքին բանակ են զորակոչել։ Ավետիքի տատիկի խոսքով՝ բժշկական հանձնաժողովը ընթացակարգերը ձևական է կատարել։

«Ասել են՝ հանվի, հանվել է, հետո՝ Ավետիք ջան, բարի ծառայություն քեզ, ու հետազոտությունն ավարտվել է», – նշեց նա։

Հարազատները նշում են, որ Ավետիքի բժշկական փաստաթղթերը փոխանցել է զինկոմիսարիատի պաշտոնյաներից մեկին՝ Մալյան ազգանունով, որն ունի փոխգնդապետի կոչում։ Սակայն, նրանց խոսքով, այդ փաստաթղթերը հետագայում անհետացել են։

«Եթե մարդուն պիտի ազատեին, թող ազատեին։ Բայց ի՞նչ արեց այդ մարդը՝ իմ երեխուն ուրիշի տե՞ղն ուղարկեց։ Բժշկական ամբողջ թղթապանակը տարանք, բայց դրանցից միայն անգինայի թուղթ է մնացել։ Հիմա երեխու ձեռքերն ահավոր դողում են։ Երբ հաց ենք տալիս, չի կարողանում ինքնուրույն ուտել։ Այսքան երկար ինչու՞ են պահում։ Սպասում են՝ մեռցնեն, տան ձեռնե՞րս։ Իմ երեխուն գերի եմ տվել», - վրդովմունքով նշեց Ավետիքի տատիկը։ 

Ավետիք Մաթևոսյանը ծառայության է զորակոչվել այս տարվա հունիսի 27-ին։ Նա միայն մի քանի օր է զորամասում անցկացրել, ծառայության մնացած ժամանակահատվածը մեկ հոսպիտալից մյուսն է տեղափոխվել։  

Արդեն ավելի քան երկու շաբաթ է՝ նա գտնվում է Կանազի կայազորային կլինիկական հոսպիտալում  հոսպիտալում։ Ընտանիքի անդամները պնդում են, որ նա պատշաճ բժշկական զննում չի ստանում։ Մինչդեռ պաշտպանության նախարարության՝ դեպքի առնչությամբ NEWS․am-ին տրամադրված պարզաբանման մեջ նշվում է, որ Ավետիքը դեղորայքային բուժում է ստանում, հոսպիտալում նրա վիճակի կլինիկական դիտարկում է իրականացվում։ 

Նախարարությունից նշել են՝ հետազոտությունների արդյունքներից կախված՝ կարող է քննարկվել Ավետիքի առողջական վիճակի պատճառով վաղաժամկետ զորացրման հնարավորությունը։

Հետևեք մեզ՝ այստեղ