Երբ սեռը դառնում է դատավճիռ. «Շնորհավոր, աղջիկ է». Ելենա Արշակյանի նոր գեղարվետսկան ֆիլմը շուտով մեծ էկրանին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ելենա Արշակյանի նոր գեղարվետական ֆիլմը՝ «Շնորհավոր, աղջիկ է» կյանքի ու պատահականությունների մասին է:  

Ֆիլմն անդրադառնում է ցավոտ, հուզիչ և բոլորին դիպչող թեմայի՝ սեռով պայմանավորված հղիության ընդհատման խնդրին։  Tert.am Life-ը ներկա է եղել ֆիլմի նկարահանումներին, զրուցել ստեղծագործական թիմի հետ: Եթե ֆիլմի օգնությամբ կարողանանք գոնե մի փոքրիկի կյանք փրկել, ես կկարծեմ, որ մեր առջև դրված խնդիրը լուծել ենք...  

Ելենա Արշակյանը վստահ է՝ կյանքում պատահական ոչինչ չի լինում։

«Դեռ 2021 թվականին ես և Անահիտ Մխիթարյանն ունեինք այս ֆիլմի սցենարը, երբ մտածում էինք դիպլոմային աշխատանքի մասին, սակայն թեման փոխվեց, և ուրիշ ֆիլմ նկարեցինք։ Բայց սցենարը պահպանվել էր։ Տարիներ անց, երբ առաջարկ ստացանք Նիդերլանդների դեսպանատան կողմից՝ նկարահանել ֆիլմ սելեկտիվ աբորտների մասին, մենք մեկ շաբաթ անց արդեն ներկայացրեցինք այն։ Սցենարը հաստատվեց, ու շատ արագ անցանք աշխատանքի։ Այնպիսի տպավորություն էր, որ ֆիլմը մեզ էր սպասում»,- անկեղծացավ ռեժիսորը:

Ռեժիսորի խոսքով՝ սելեկտիվ աբորտների խնդիրը բավականին տարածված է Հայաստանում։

«Եթե մենք կարողանանք ֆիլմի օգնությամբ գոնե մի փոքրիկի կյանք փրկել, ես կկարծեմ, որ մեր առջև դրված խնդիրը լուծել ենք։ Մենք պատմում ենք պատմություն, որը կարող է տեղի ունենալ ցանկացած հայ ընտանիքում»,- ընդգծեց Ելենա Արշակյանը:

Նա նաև հավելեց՝ հանդիսատեսի համար անակնկալ կլինի դերասանուհի Նարե Հայկազյանի վերադարձը․

«Վաղուց Նարե Հայկազյանը չի երևացել էկրաններին, ու կարծում եմ՝ նրա հայտնվելն այս նախագծում անսպասելի կլինի»։

Դերասանական կազմը՝ խոստումնալից և հուզիչ կերպարներով

Ֆիլմում գլխավոր հերոսուհուն մարմնավորում է դերասանուհի Անահիտ Մանուկյանը։ Դերակատարների թվում են նաև՝ Արմեն Էլբակյանը, Հարութ Արշակյանը, Աշոտ Տեր-Մաթևոսյանը, Սոֆյա Պողոսյանը, Անահիտ Մսրյանը, որոնց հետ զրույցները կներկայացնենք առաջիկայում:

«Այս նախագծով ուզում ենք ասել, որ ցանկացած երեխա իրավունք ունի ապրելու, և սեռը դատավճիռ չէ։ Եվ՛ ինձ, և՛ Անահիտին այս թեման միշտ հուզել է։ Անչափ երջանիկ եմ, որ հենց մեզ առիթ ընձեռվեց նկարահանել այս ֆիլմը։ Շատ պատասխանատու աշխատանք ենք անում։ Ֆիլմի պրեմիերան նախնական պլաններով նախատեսված է սեպտեմբերի 5-ին, որից հետո ֆիլմը կապրի իր առանձին կյանքով», -նշեց ռեժիսորը։

Ֆիլմն արտադրվում է ՀՀ-ում Նիդերլանդների դեսպանության հետ համատեղ:

Նիդերլանդների կառավարությունը, որը նաև աջակցում է նախագծին, կարևորում է կանանց իրավունքների պաշտպանությունը։
«Մենք տարբեր ծրագրեր ենք իրականացնում կանանց հզորացման ուղղությամբ, բայց հասկացանք, որ կանանց վերարտադրողական իրավունքների հետ կապված խնդիր կա Հայաստանում։ Ուղղակի հաճախ չենք տեսնում, թե ինչ է կատարվում մեր շուրջ։ Սելեկտիվ աբորտների խնդիրը բավականին տարածված է, հատկապես մարզերում։ Իրական պատմությունների վրա համոզվեցինք, որ կան կանայք, ովքեր ստիպողաբար գնում են հղիության արհեստական ընդհատման, որպեսզի կարողանան արու զավակ լույս աշխարհ բերել։ Սա մտահոգիչ է, քանի որ, առաջին հերթին, գործ ունենք կանանց վերարտադրողական առողջության հետ։
Բացի այդ, մեզ համար կարևոր է, որ կանայք իրենք կարողանան կատարել իրենց ընտրությունը։ Մտածում էինք՝ ինչ ճանապարհով բարձրաձայնել խնդիրը, որ լինի հուզիչ և փոխող։ Կարծում ենք՝ միակ ճիշտ ուղին խաղարկային հուզիչ ֆիլմն է, որը ցույց կտա, թե ինչ է կատարվում աղջկա հոգում, երբ ստիպված է լինում կատարել սեռով պայմանավորված հղիության ընդհատում»,- մեզ հետ զրույցում նշեց Նիդերլանդների դեսպանության քաղաքական և տնտեսական քաղաքականության պատասխանատու Լարիսա Հարությունյանը:

Թեման շատ արդիական է, հուզիչ ու բոլորիս դիպչող...
Դերասանուհի Նարե Հայկազյանն, ով երկար ժամանակ չկար էկրաններին, ֆիլմի առաջարկն ընդունել է հուզմունքով։

«Հանդիպեցինք Ելենա Արշակյանի հետ ու հասկացա, որ գերագույն հաճույք է կին ռեժիսորի հետ աշխատելը։ Պատմությունն ինձ շատ վրդովեց ու հուզեց։ Մարմնավորում եմ Մետաքսյա Գաբրիելյանի կերպարը՝ մի կին դերասանուհու, ում հետ կենցաղային վարման նմանություններ շատ կան։ Հետաքրքիր կերպար է, և թեման շատ արդիական է, հուզիչ ու բոլորիս դիպչող»,- կարծում է Նարե Հայկազյանը: Դերասանուհին նշեց, որ իր համար՝ որպես կերպար, սա նաև խոստովանանք է։  «Ասել մարդկանց, որ չի կարելի գնալ այդ քայլին։ Հայ կանանց համար պտղաբերությունը պիտի լինի որպես պարգև։ Իրական կյանքում չէի վարվի այնպես, ինչպես կերպարս է վարվում։ Կերպարս գուցե դիտվում է որպես բացասական, բայց երբ հանրության առջև խոստովանում է՝ ամեն ինչ փոխվում է։ Ինձ համար շատ սիրելի կերպար է։ Ելենան կարողացել է կերպարի մեջ գտնել այդ խիտ ասելիքը։
Նման կարևոր ասելիքով ֆիլմում շատ վաղուց չէի ներկայացել։ Լարվածություն կա։ Ուզում եմ լավագույնն անել։ Հավատում եմ, որ պատահական չէ, որ հայտնվեցի այստեղ ու Ելենան ինձ տեսավ այս դերում», – անկեղծացավ դերասանուհին։

 

Հետևեք մեզ՝ այստեղ