Էլ ովքե՞ր կդառնան սոցփաթեթի շահառու և հնարավորություն կունենան օգտվել անվճար կամ արտոնյալ պայմաններով բժշկական օգնությունից. «Փաստ»

«Փաստ» օրաթերթը գրում է.

Էկոնոմիկայի նախարարությունն առաջարկում է փոփոխություն և լրացումներ կատարել կառավարության 2012 թվականի դեկտեմբերի 27-ի N 1691-Ն որոշման մեջ։ Այս նախագիծն ուղղված է անասնաբույժների սոցիալական վիճակը բարելավելուն։ Նախարարությունը հիշեցնում է, որ օրենսդրական կարգավորումների համաձայն՝ անասնաբուժության բնագավառում անասնաբույժների միջոցով իրականացվող աշխատանքները համարվում են ծանր, վնասակար և առանձնապես ծանր, առանձնապես վնասակար աշխատանքներ։ Անասնաբույժների կողմից բազմիցս բարձրացված խնդիրները վերաբերում են ցածր աշխատավարձերին, որը հնարավորություն չի տալիս հոգալ և՛ ընտանիքի կարիքները, և՛ պատշաճ բժշկական ծառայություններից օգտվել, և՛ հանգիստը կազմակերպել։

«Գյուղատնտեսական ծառայությունների կենտրոն» ՊՈԱԿ-ի անասնաբույժ-մասնագետները և բնակավայրերում միջոցառումներ իրականացնող անասնաբույժներն անմիջական շփում ունեն պատվաստանյութերի հետ, որոնք պարունակում են ապաակտիվացված կենդանի շտամներ՝ հարուցիչներ, ինչպես նաև հիվանդությունների հետ, օրինակ՝ բրուցելոզի հարուցչի հետ, վարակվում են բրուցելոզ հիվանդությամբ՝ արյունառում կամ պատվաստում իրականացնելիս կամ «Համարակալում» ծրագրի շրջանակներում միջոցառում իրականացնելիս, ինչպես նաև քիչ չեն տարբեր աստիճանի ծանրության վնասվածքներ ստանալու դեպքերը և այլն։ Այսպիսով՝ անասնաբույժներն իրենց մասնագիտական գործունեության ընթացքում գրեթե ամեն օր առնչվում են մի շարք ռիսկերի հետ։

Կազմակերպության անասնաբույժները հիմնականում երիտասարդ մասնագետներ են, և մասնագիտական գործունեության իրականացման գրավչությունը գրեթե բացակայում է, քանի որ երիտասարդ անասնաբույժ մասնագետները միայն ցածր աշխատավարձով չեն կարող թեկուզ տարին մեկ անգամ օգտվել բուժզննության ծառայությունից, կազմակերպել հանգիստը հանրապետության որևէ հանգստյան տանը, իսկ «Պատվաստում» և «Համարակալում» ծրագրերի շրջանակներում միջոցառումներ իրականացնող անասնաբույժ մասնագետների միջին տարիքային շեմը 60 տարեկան և ավելի է:

Սա վկայում է այն մասին, որ մասնավորաբար՝ բնակավայրերում այս ծրագրերն իրականացնող անասնաբույժները մոտիվացիա չունեն, քանի որ անասնաբուժական ծառայության մատուցման համար ստացած վճարը չի բավարարում ամենամյա բուժզննում կամ արձակուրդ հանգստյան տներում կազմակերպելու համար։

Բնակավայրերում գյուղատնտեսական կենդանիների վարակիչ հիվանդությունների կանխարգելիչ և ախտորոշիչ միջոցառումներ իրականացնող անասնաբույժների թիվը տարեցտարի նվազում է, և մասնագիտական սերնդափոխությունը չի ապահովվում։ Այս ամենը հաշվի առնելով՝ կարևորվում է անասնաբույժներին սոցփաթեթի շահառու դառնալու հնարավորության ապահովումը։

Նախագծով առաջարկվող կարգավորման շրջանակը ներառում է կազմակերպության թվով 550 անասնաբույժ։ Սոցփաթեթի յուրաքանչյուրի շահառուին նախատեսվում է փոխանցել 72 հազար դրամ, տվյալ բյուջետային տարում ծախսը կկազմի 39 մլն 600 հազար դրամ։ Պետության կողմից երաշխավորված անվճար և արտոնյալ պայմաններով բժշկական օգնությունից օգտվելու համար՝ մոտ 60 հազար դրամ մեկ շահառուի համար, տարեկան ծախսը կկազմի 33 մլն դրամ։ Այսպիսով, 550 անասնաբույժի համար սոցփաթեթի շահառու դառնալու նպատակով անհրաժեշտ ֆինանսական միջոցները կկազմեն 72 մլն 600 հազար դրամ։

Մանրամասները՝ «Փաստ» օրաթերթի այսօրվա համարում