Հորոսկոպ. Նորալուսինն ու լիալուսինը աստղագուշակության մեջ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Լուսինը մեծ նշանակություն ունի աստղագուշակության մեջ, այն խորհրդանշում է զգացմունքները, թաքնված արձագանքներն ու ապրումները, մոր հետ հարաբերությունները և հուզական բանականությունը։ Աստղագուշակության մեջ լուսնի ցիկլերը նույնպես խորհրդանշական են: Այսօր կխոսենք նորալուսնի և լիալուսնի մասին աստղագուշակության տեսանկյունից:

Քանի որ նորալուսինը և լիալուսինը պարբերաբար տեղի են ունենում ամեն ամիս, հնարավոր է հետևել ցիկլերին և կրկնվող հուզական արձագանքներին և զգացողություններին: Լուսինը շատ արագ է շարժվում՝ յուրաքանչյուր նշանի մեջ մնալով երկուսուկես օր և 28 օրում անցնում է կենդանակերպի ամբողջ շրջանը։

Աստղագուշակության մեջ նորալուսինը խորհրդանշում է զարթոնքի և ծաղկման շրջանը: Այդ պահին զգացվում էներգիայի ներհոսք, գործելու, նախագծեր սկսելու և նորի մեջ խորասուզվելու ցանկություն: Նորալուսնի էներգիան հարկ է օգտագործել կյանքում փոփոխություններ մտցնելու համար: Սկսել սպորտով զբաղվել, գրանցվել լեզվի դասընթացների, փոխել քնի ռեժիմը և սննդակարգը. այս ամենը և շատ ավելին պետք է սկսել ոչ թե երկուշաբթի օրվանից, այլ նորալուսնի ժամանակ՝ ավելի կայուն արդյունքի հասնելու համար: Նորալուսինը տևում է երկու շաբաթ:

Այնուհետև սկսվում է լիալուսինը․ աստղագուշակության մեջ այն խորհրդանշում է նորալուսնին հակադիր փուլը։ Այդ ժամանակը լավ է օգտագործել հանգստանալու, գործերն ավարտելու և վերջնական որոշումներ կայացնելու համար: Հաճախ լիալուսինը համընկնում է որոշ գործերի և խնդիրների գագաթնակետին, որը վերջակետ է դնում դրանց վրա կամ բացահայտում խոցելի կողմերը: Լիալուսինը պետք է օգտագործել հին իրերից և ճնշող կապերից ազատվելու, երկար ձգձգվող հարցը պարզելու և վերջնական որոշում կայացնելու համար։

Ե՛վ նորալուսինը, և՛ լիալուսինը կարող են շատ զգացմունքային օրեր լինել, եթե լուսինը ակտիվ է ձեր ծննդյան աղյուսակում: Նորալուսնի ժամանակ ի հայտ է գալիս ապրելու և գործելու ցանկությունը. սա ավելի միանշանակ փուլ է։ Մինչդեռ լիալուսինն ուղեկցվում է կամ վերջակետ դնելու ցանկությամբ, կամ ուշադրությունից ու պարտավորություններից թաքնվելու ցանկությամբ։ Բացի այդ, լիալուսինը ավելի զգացմունքային է, քան նորալուսինը: Լիալուսնի ժամանակ մարդիկ հակված են ավելի սուր արձագանքելու դժվարություններին կամ կոնֆլիկտներին. նրանք կարող են լինել ավելի կտրուկ ու կոպիտ, կամ, ընդհակառակը, չափազանց խոցելի և վիրավորվող: Լիալուսինը զգացմունքների դրսևորման մեջ ծայրահեղությունների և գործողությունների դրսևորման գագաթնակետի շրջան է:

Եթե զգայուն եք լուսնի փուլերի նկատմամբ, ապա նորալուսնի և լիալուսնի էներգիան կարող եք ի շահ ձեզ օգտագործել՝ ձեր կյանքը ներդաշնակեցնելու համար: Պետք չէ հարմարվել երկնային մարմինների շարժումներին, սակայն ուշադրություն դարձրեք, թե ինչպես են դրանք ազդում ձեր զգացմունքների և գործողությունների վրա՝ ինքներդ ձեզ ավելի լավ հասկանալու համար: