Կվերականգնվեն Հայրենական Մեծ պատերազմի զոհերին նվիրված հուշարձանները

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Գործարար Մհեր Ավետիսյանի նախաձեռնությամբ կվերակառուցվեն Հայաստանում Հայրենական Մեծ պատերազմի զոհերի հիշատակին նվիրված հուշահամալիրները։

«Այս տարվա մայիսին կլրանա մեր պապերի՝ ֆաշիզմի հանդեպ տարած հաղթանակի 80-ամյակը։ Ճիշտ է, այդ չարիքն այս անգամ փորձեց Ուկրաինայի տարածքում գլուխ բարձրացնել, և հիմա արդեն մեր սերունդն է կռիվ տալիս, որ վերջնականապես վերացնի ֆաշիզմը։ Մենք սկսել ենք այսպիսի մի նախաձեռնություն՝ վերականգնում ենք Հայաստանում հայրենական մեծ պատերազմի զոհերին նվիրված շուրջ 900 հուշահամալիրները։ Դրանցից 600–ը պետության միջոցներով է կառուցվել, 300-ից ավելին՝ ժողովուրդն է կառուցել»,–NEWS.am–ի հետ զրույցում ասաց Մհեր Ավետիսյանը:

Նրա խոսքով, նախաձեռնության նպատակը Հայաստանի պատմության կարևորագույն էջերից մեկը երիտասարդ սերնդին հասանելի դարձնելն է ու ամեն ինչ անելը, որ երիտասարդներն իմանան Հայրենական Մեծ պատերազմին Հայաստանի մասնակցության ու հաղթանակի մասին։

«Այդ հուշահամալիրները վերականգնելով և բարելարգելով ևս մեկ անգամ հարգանքի տուրք կմատուցենք մեր պապերին, և նրանց սերունդները կիմանան իրենց պապերի հերոսական սխրանքների մասին։ Նրանք կիմանան, որ իրենց երակներում հոսում է մարշալ Բաղրամյանի ու Բաբաջանյանի արյունը։ Սա կլինի առիթ, որ հայ ազգի մեջ հաղթանակը կրկին զարթոնք ապրի»,–նշեց նա։

Նախաձեռնության շրջանակում Մհեր Ավետիսյանը՝ ԿԳՄՍ նախարարության համաձայնությամբ, շրջում է Հայաստանի բոլոր մարզերով, գույքագրում հուշարձաններն ու արձանագրում, թե վերակառուցման ինչ միջոցներ են անհրաժեշտ։ Նրա խոսքով, նախաձեռնությունը կյանքի կոչելու համար առավելագույնը երեք տարի է անհրաժեշտ։

«Շատ գյուղերում հուշահամալիրները բարեկարգված ու խնամված են այն աստիճանի, որ զարմացած եմ։ Անկեղծ ասած, չէի սպասում նման արդյունք, մտածում էի, թե ընդհանրապես լքված են այդ հուշահամալիրները, բայց ոչ։ Իհարկե, կան տեղեր, որտեղ իսկապես, համարյա թե ավերված են։ Ցավելի է, որ որոշ դեպքերում երիտասարդները չգիտեն անգամ, թե ինչ հուշարձան է իրենց գյուղի տարածքում»,–ասաց Մհեր Ավետիսյանը։

 Հետևեք մեզ՝ այստեղ