Մալաթիա-Սեբաստիայում քաղաքացին 3 արջերի հետ փակվել էր տանը՝ մերժելով բացել դուռը ոստիկանության առջև

ОБЩЕСТВО 25 Март, 2025 18:15

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մի ամբողջ օրվա լարված ջանքերի արդյունքում Վայրի բնության և մշակութային արժեքների պահպանման հիմնադրամը (FPWC) ՀՀ ՆԳՆ և մի շարք կառույցների հետ համատեղ կարողացավ փրկել Երևանի Մալաթիա-Սեբաստիա վարչական շրջանի բնակելի տարածքում տարիներ շարունակ անազատ պայմաններում պահվող երեք գորշ արջի, որոնք ուշ գիշերով տեղափոխվել են Վայրի կենդանիների փրկարար կենտրոն (WRC)։

Քաղաքացին երկար տարիների ընթացքում իր սեփական տարածքում՝ բնակելի շենքերով, մանկապարտեզներով և դպրոցներով շրջապատված բակում, անազատ պայմաններում պահել է գորշ արջերի: Սկզբնապես երկու կենդանիներ են եղել, որոնք հետագայում դարձել են չորսը: Սիլիկյան թաղամասում պահվող այս կենդանիներից մեկն արդեն իսկ փրկվել էր և տեղափոխվել էր Վայրի կենդանիների փրկարար կենտրոն:

Առավոտյան ժամերից մինչև ուշ գիշեր FPWC թիմը, Կենդանիների փրկության միջազգային կազմակերպության (IAR) ներկայացուցիչները, Մալթիա-Սեբաստիա վարչական շրջանի դատախազության և ՇՄՆ աշխատակիցները, ոստիկանները, փրկարարները, կենդանասերները և լրագրողները անձրևի տակ հսկողություն էին իրականացնում Սվաճյան փողոցում։ Կենդանիների տերը փակվել էր տանը՝ մերժելով բացել դուռը ոստիկանության առջև և հերքելով, որ արջերը պահվում են անբարենպաստ պայմաններում։

Միայն դատարանի որոշմամբ ձեռք բերված թույլտվության և ժամեր տևած բանակցությունների արդյունքում թիմը կարողացավ մուտք գործել տարածք և գործի անցնել։ Սա ավարտին հասցրեց դեռևս 2019թ.-ից քաղաքացիների ահազանգերով սկիզբ առած պայքարը, որի նպատակն էր ազատել ինչպես արջերին, այնպես էլ վերացնել բնակելի թաղամասում մանկապարտեզներից և դպրոցներից ոչ հեռու գտնվող վտանգավոր իրավիճակը։

Գործողությանը մասնակցել են նաև կենդանասերների համայնքի ներկայացուցիչներ, որոնք մտահոգված էին կենդանիների ճակատագրով: Հիմնադրամի գործընկեր՝ Կենդանիների փրկության միջազգային կազմակերպության (IAR) հիմնադիր Ալան Նայթը և աշխատակից Էյդան Սիրսը հատուկ ժամանել էին Հայաստան՝ մասնակցելու արջերի փրկությանը:

Նախնական զննությամբ պարզվել է, որ արու արջը չափազանց ճարպակալած է (մոտ 300 կգ) և ատամների մեծ մասը կոտրված ու վնասված է։ Մյուս երկու առանձնյակները էգեր են, որոնցից մեկը ծնվել է հենց այդ նույն նեղ ու կեղտոտ վանդակում, որտեղ էլ ապրել է ողջ կյանքում։ Կենդանիները գտնվել են ծայրահեղ անբարենպաստ պայմաններում՝ զրկված մասնագիտական խնամքից, համապատասխան սննդից և անհրաժեշտ կենսապայմաններից: Նրանք պահվել են ինքնաշեն վանդակներում, որոնց անվտանգության պայմանները չէին բացառում կենդանիների փախուստի հնարավորությունը՝ ստեղծելով լուրջ վտանգ շրջակա բնակիչների համար:

Այժմ արջերը տեղափոխվել են Վայրի կենդանիների փրկարար կենտրոն (WRC), որտեղ կստանան մասնագիտական խնամք և բուժօգնություն։ Արու առանձնյակի համար պլանավորվում է հատուկ ատամնաբուժական վիրահատություն՝ նրան ցավերից ազատելու և ուտելու կարողությունը հնարավորինս վերականգնելու նպատակով։

FPWC-ն հորդորում է քաղաքացիներին շարունակել զգոն լինել և անմիջապես հայտնել վայրի կենդանիների անօրինական պահման կամ վատ վերաբերմունքի դեպքերի մասին:

Վայրի բնության և մշակութային արժեքների պահպանման հիմնադրամը (FPWC) առաջատար բնապահպանական կազմակերպություն է Հայաստանում: Հիմնադրամի կողմից և Կենդանիների փրկության միջազգային կազմակերպության աջակցությամբ ստեղծված Վայրի կենդանիների փրկարար կենտրոնը (WRC) եզակի հաստատություն է, որն ապահովում է վտանգված և փրկված կենդանիների պահպանությունն ու խնամքը: Կենտրոնի հիմնման օրվանից մի քանի տասնյակ արջեր փրկվել և ապաստան են գտել այստեղ՝ ազատվելով ռեստորանների, բենզալցակայանների, ավտոկայանների և այլ մասնավոր անբարենպաստ պայմաններից: Կենտրոնում կենդանիներն ստանում են մասնագիտական խնամք, հատուկ մշակված սննդակարգ և անհրաժեշտ կենդանաբուժական օգնություն՝ ներառյալ ձմեռման նախապատրաստական աշխատանքները:

Կենդանիների փրկության միջազգային կազմակերպությունը (IAR) համաշխարհային ճանաչում ունեցող կառույց է, որը մասնագիտացած է վայրի կենդանիների փրկության և վերականգնման ոլորտում: Հայաստանում IAR-ը FPWC-ի ռազմավարական գործընկերն է՝ համատեղ իրականացնելով Արջերի փրկության ծրագիրը: