Գեղարքունիքում մեկնարկել են դպրոցական առարկայական օլիմպիադաները

Փետրվարի 1-ից Գեղարքունիքի մարզի հանրակրթական դպրոցներում մեկնարկել են դպրոցական առարկայական օլիմպիադաների տարածքային փուլերը: Գիտելիքների չափման մրցաշարին մասնակցում են մարզի հիմնական, միջնակարգ եւ ավագ դպրոցները:

Աշակերտների գիտելիքների եւ ուսման առաջադիմության ամենամյա ստուգատեսն անցկացվում է 16 առարկաների գծով: Օլիմպիադաներն անցկացվում են առցանց՝ օնլայն տարբերակով եւ դպրոցներում:

Ինչպես «Արմենպրես»-ին տեղեկացրեցԳեղարքունիքի մարզպետարանիաշխատակազմի ԿՄՍ վարչությանկրթության բաժնի վարիչ ՀամբարձումՍաֆարյանը, ըստ կարգի՝ մաթեմատիկա, ֆիզիկա, կենսաբանություն, աստղագիտություն, ինֆորմատիկա առարկայական օլիմպիադաների առաջին փուլը բոլոր դպրոցներում առցանց է անցկացվում՝ միասնական թեստով: Պատրաստի ձեւաթղթերն ուղարկվում են օլիմպիադաների անցկացման եւ համակարգման կենտրոն:

Մնացած առարկաները՝ ռուսաց լեզու, հայոց լեզու, հայ եկեղեցու պատմություն, պատմություն, անգլերեն, ֆրանսերեն, գերմաներեն, հայ գրականանություն, նախնական զինվորական պատրաստություն, անցկացվում են գրավոր ձւեով եւ 4 փուլով՝ դպրոցական, տարածքային, մարզային եւ հանրապետական: Իսկ գիտելիքների անցկացման առցանց տարբերակն անցկացվում է 3 փուլով՝ դպրոցական, մարզային եւ հանրապետական: Առցանց տարբերակով անցկացվող մրցաշարը համակարգվում է Կրթության եւ գիտության նախարարության համապատասխան կայքի միջոցով:

Ըստ Հ. Սաֆարյանի՝  օնլայն տարբերակով Գեղարքունիքի մարզից մասնակցության հայտ են ներկայացրել 4050 դպրոցական:

Առցանց տարբերակով օլիմպիադայում գերակշռում են մաթեմատիկայի մասնակիցները՝ 1947 եւ կենսաբանության  մասնակիցները՝ 575:

Օլիմպիադաների անցկացումը դպրոցներում հսկվում  են օլիմպիադաների հանձնաժողովների նախագահների կազմկոմիտեների կողմից:

Օլիմպիադաների առաջին փուլի անցկացումը կտեւի մինչեւ փետրվարի 12-ը, իսկ տարածքային փուլը կմեկնարկի փետրվարի 20-ին:

Խոսրով Խլղաթյան