ԵԱՏՄ-ում քննարկում են անդամ երկրների ֆինանսական օրենսդրությունները ներդաշնակեցնելու հարցը

Եվրասիական տնտեսական հանձնաժողովի տնտեսական և ֆինանսական հարցերով խորհրդատվական հանձնաժողովի անդամները քննարկել են Եվրասիական տնտեսական միության անդամ երկրների օրենսդրության ներդաշնակեցման հետ կապված հարցեր ֆինանսական ոլորտում: 

Ինչպես հաղորդում է «Արմենպրես»-ը, վկայակոչելով Եվրասիական տնտեսական հանձնաժողովի պաշտոնական կայքը, հունվարի 18-ին տեղի է ունեցել հանձնաժողովի հերթական նիստը, որը նախագահել է տնտեսական և ֆինանսական քաղաքականության հարցերով նախարար Տիմուր Սուլեյմանովը: 

Խորհրդատվական հանձնաժողովի անդամները դիտարկել  են նաև Եվրասիական տնտեսական միության անդամ երկրների օրենսդրությունների ներդաշնակեցումը միջազգային չափանիշներին համապատասխանեցնելու հնարավորությունը: Ֆինանսական ոլորտում ԵԱՏՄ անդամ երկրների օրենսդրությունների ներդաշնակեցումը միջազգային պահանջներին համապատասխանեցումը համարվում է ԵԱՏՄ-ում  ներդաշնակեցված ֆինանսական համակարգի ձևավորման հիմնական տարրերից մեկը: 

Քննարկման ընթացքում ԵՏՀ տնտեսական և ֆինանսական հարցերի նախարար Տիմոջուր Սուլեյմանովն ընդգծել է, որ հանձնաժողովի խնդիրն է ներդաշնակեցնել ֆինանսական ոլորտը՝ հաշվի առնելով լավագույն միջազգային փորձը: 

Խորհրդատվական հանձնաժողովում ներկայացվել է միասնական բորսային տարածք ստեղծելու մասին նախագիծը, որը ներառված է նաև Եվրասիական տնտեսական միության ստեղծման պայմանագրում: Սակայն նման տարածքի ստեղծման հստակ չափանիշները, հնարավորություններն ու ձևավորման  ճանապարհային քարտեզը կողմերը դեռ պետք է հստակեցնեն: 

Խորհրդատվական հանձնաժողովի նիստի ընթացքում քննարկվել են նաև Եվրասիական տնտեսական միության արժութային շուկայի զարգացման հնարավորությունները;